Thursday 23 April 2009

الكراسى الموسيقية

"نجاح الآخرين هو فشلى، و لابد من أن يفشل الآخرون، لكى أنجح أنا"
مش عارفة ليه المفهوم ده متأصل و مترسخ و متشعب و متــ....حاجات كثيرة قوى فى وجدان الكثير من الناس، يعنى لما (س) يشوف أن (ص) عمل حاجة حلوة أو حصلت له حاجة كويسة أو حتى مناسبة سعيدة ،أو يسمع عنه أنه حقق نجاح كبير -أو حتى صغير- فى حاجة معينة.....ينزل عليه الخبر كالصاعقة وفجأه يسمع فى ودانه حاجة كده زى صدى الصوت بتقول كلام من نوعية
فاشل ...فاشل...فااااااشل
أو يمكن يكون الصوت مختلف شوية، ويكون من نوعية
تعيس ...تعيس...تعيييييس
و ياه بقى لو كان من نوعية
حظوظ.....حظوظ.....حظووووووظ
و يا سلام ...يا سلام بقى لو همه الإثنين بيشتغلوا فى نفس المجال، تبقى كارررررثة و مصيييبة ، ويبدأ (س) يدور و يدعبس و يد.....حاجات كثيرة قوى برضه علشان يلاقى أى عيب فى اللى عمله (ص)، أو يبدأ يقلل منه و طبعا غنى عن الذكر أنه فى أغلب الأحوال لو (س) ده ربنا كرمه و نجح فى حاجة ، (ص) هيعمل المثل،.. ما القلوب عند بعضها!!!!!، (طبعا إلا من رحم ربى) قعدت أفكر فى السبب فى المفهوم العجيب ده،.......... يمكن علشان منذ الطفولة لما بيجوا يشجعوا الطفل علشان يذاكر (أو حتى علشان يعمل أى حاجة) بيقولو له "ذاكر علشان ما تبقاش أقل من فلان ؟ و عشان فلان مايجبش درجات أكثر منك و يبقى شكلك وحش"؟؟
يعنى تشجيعهم له مش يذاكر علشان يتعلم و اللا حتى علشان يجيب درجات عالية،لاااااااااااا.... المهم فى الموضوع أن درجاته تكون أعلى من درجات زمايله، و بالتالى كل ما زمايله يفشلو ,ده معناه إن فرصته أحسن للنجاح.
آآه، يبقى الموضوع بقى ما بقاش بينه و بين العلم و الكتاب ، لأ... ده كده بقت مسألة شخصية، بينه و بين الأعداء( ما هم بقو أعداء خلاص) فكل ما هينجحوا هيكون ده فشل ليه و برضه العكس صحيح، يعنى بطريقة التفكير دى ،لما واحد يطلع الأول بمجموع 60% (علشان التلامذة اللى فى فصله ما بيذاكروش)، هيبقى أحسن من واحد جايب 95% بس طالع الحداشر على الفصل (علشان الفصل اللى هو فيه كله تلامذة شاطرين).

يبقى بدل ما كل واحد فيهم يركز على العلم، هيركز على إزاى يخللى زميله يفشل، و لو اطمن إن زميله مش بيجتهد ، هيقلل من مذاكرته ...ما هو يتعب نفسه ليه؟؟؟؟ العلم مش فارق معاه، المهم الترتيب.

ولو واحد بقى من الناس اللى ما بيحبوش المذاكرة و مفيش بينهم و بينها عمار ، هيتضايق من اللى بيذاكروا جدا و يحس إن هم سبب تعاسته ، لأن دول هم السبب فى إن شكله بايخ ،

لأن لو ما كانوش شاطرين كان زمانه طالع الأول بمجموع 49,99% قد الدنيا ، فهيركززززززز طاقته كلها فى الحقد والتفكير السلبى ، بدل ما يركزها على نفسه و يشوف إزاى يحسن و يطور من نفسه و يكون متميز هو كمان، و ده طبيعى لأن

الإحساس السلبى بيوقف التفكير الإيجابى

و دى كلها صورة مصغرة من اللى بيحصل فى الحياة عموما من الكبار قبل الصغيرين،

-الظاهر الحياة هتقلب لفصل كبير بعد ما كانت مسرح كبير-

طب و بعديييين؟؟؟؟؟؟؟؟

فبعد التفكير و الفحص، توصلت إلى إن النجاح فى أى مجال فى الحياة بيتبصله على إنه لعبة الكراسى الموسيقية، يعنى لو احنا 6 يبقى مافيش غير 5 كراسى و لو كنا 5 يبقى بقدرة قادر الكراسى بقو 4 بس ، يعنى لو عملنا إييه بالذى لاااااازم و أكييييد هيكون فى حد مالوش مكان و كل واحد خايف ليكون الحد ده، علشان كده بيزق و يوقع غيره على الأرض علشان خاطر يقدر يلاقى كرسى يقعد عليه أوعلى الأقل علشان مايبقاش شكله وحش إذا هو اللى وقع-،.............. إنما لأ و ألف لأ

و أنا على يقين أن"النجاح و أى حاجة حلوة فى الحياة ليست كراسى موسيقية"، و لما بنقول " مش ممكن كلنا نطلع الأول" فى رأى إن الجملة دى مش كاملة وعلشان تبقى كاملة يبقى المفروض تتقال

"مش ممكن كلنا نطلع الأول فى نفس الوقت و فى نفس المجال و بنفس المكانة و بنفس البصمة"

و ركزززززززز قوى على كلمة نفس البصمة دى، لأن ده معناه إن ممكن قوى كلنا نكون أوائل ،كل واحد ببصمته و سمته و أسلوبه و تميزه من غير ما يحتاج أنه يشغل نفسه بإزاى يهد الآخر أو يحل محله و الدليل على كده إن فى كل المجالات هتلاقى ناس ناجحة كثير وناس بيشتغلوا فى نفس المجال و كل واحد فيهم له مميزاته الخاصة اللى بتختلف عن الآخر و متقدرش تحط واحد منهم مكان الثانى أو تقول إن ده يحل محله، لأن كل ناجح حط البصمة بتاعته هو بس اللى محدش يقدر يكررها، و لو حد حاول يقلده هيكون نسخة،و مهما نجح فى تقليده، أعلى حاجة هيوصل لها ،أنه هيكون نسخة كويسة

إنما الشخص الآخر هيفضل الأصل لأن بصمته ماحدش هيقدر يحطها غيره،.... فمترضاش لنفسك إنك تكون مجرد نسخة ، إنما اعمل لنفسك مكانك الخاص بك و اطمئن إن لك رزقك اللى متحدد لك و ماحدش هياخده غيرك ، و أى زيادة فى رزق الآخرين مش معناه نقص فى رزقك انت

فـ.... لا تصارع الآخرين على أماكنهم و لكن اصنع لنفسك مكانا بجوارهم

وخليك أصل جديد ..أصل لنفسك و كل أصل بيجيب كرسيه معاه من غير ما يحتاج أنه يزق حد علشان يقعد

8 comments:

  1. موضوع متميز ومحدش كتب عنه قبل كده

    برافو برافو
    هايلة

    ReplyDelete
  2. ميمى
    شكرا ليكى لتشجيعك الجميل ده، و أنا سعيدة جدااااا
    إنه عجبك، ربنا يعزك و يكرمك دايما

    ReplyDelete
  3. يبدو أنني سأرد على كل المواضيع :)

    صدقيني لو قلت أنني كنت أفكر بهذا الأمر الأيام الماضية ..

    كيف يمكن أن تكون أنت أنت ... لك بصمتك كما قلت ..

    تفعل ما تراه انت مناسبا ... كما يترائى لك وليس كما يترائى للناس ...

    هذا هو سر النجاح ....

    ان يكون لك دائما طعم يختلف عن الآخرين ...

    موضوع جميل ينم عن موهبة جديرة بالاحترام ..

    تحياتي ..

    ReplyDelete
  4. moro_wbs

    من دواعى سرورى ان حضرتك تعلق على كل المواضيع :)

    و فعلا هذا من أهم أساسيات النجاح و التميز، أتمنى من الله أن يعيننا جميعا على أن نكون كذلك

    جزاك الله خيرا على تعليقك و على تشجيعك

    أتمنى لك كل التوفيق

    ReplyDelete
  5. السلام عليكم ورحمه الله وبركاته
    موضوع هايل جدا يا فراشه اسمحيلى انى اختصر اسمك فى (فراشه)
    وانا متفقه معاكى فى كل كلمه كتبتيها هنا بس اسمحيلى برضوا اتبنى وجهه النظر المعاكسه ليهاوده مش معناه اطلاقا انى متبنيه الفكره دى ولكن حتى علشان نوازن بين الواقعيه والامل
    يعنى اصللا ليه الاب والام بيقولوا لولادهم ذاكر علشان تجيب درجات اعلى من فلان لانهم ببساطه شايفين الواقع المحيط وان الفرص المتاحه بقيت قليله جدا وزى ما انتى شبهتيها بالظبط كراسى موسيقيه بس عدد الكراسى الى متوفر اقل من نص الناس الى عايزه تلاقى مكان تعد عليه . ده غير التعليم الى بيطلع ناس مش متعلمين اصلا
    ولو اتكلمنا على نطاق اكبر المرحله دى هتلاقى ان اى خطوه او اى نجاح فى مجتماعنا بيترجم لمعيار مادى اولا واخيرا بقى النجاح =فلوس وناس كتير ظروفهم مش مستريحه وبيدوروا على اى منفذ يساعدهم فى عيشه كريمه
    يعنى ممكن مانفسرهاش ان نجاح شخص اخر معناه فشله هو شخصيا لكن يمكن يكون نابع من انه انسان يستحق عيشه كريمه مثل الاخرين
    طولت عليكى بس الموضوع فعلا شدنى
    وفى الاول والاخر الرزق ده بأيد ربنا ولازم الانسان يرضى بقضاء ربنا ليه

    ReplyDelete
  6. روح طفلة

    و عليكم السلام و رحمة الله و بركاته
    أشكرك على تعليقك على الموضوع ، و يسعدنى دايما إنى اسمع وجهة نظرك
    و بالنسبة للمحيط اللى حوالينا ففعلا الفرص قليلة جدا ، بس ده للى عايز فرصة موجودة، يعنى إيه؟؟
    د.طارق السويدان بيعمل برنامج اليومين دول اسمه (أكاديمية إعداد القادة) و كان فى حلقة من الحلقات اتكلم عن موضوع الفرصة ده و قال ان نسبة الفرصة اللى بتيجى للانسان هى اتنين فى الألف
    !!!!!
    فالناجحين دول بيصنعو فرصتهم بنفسهم ، و عطا مثال على كده أنه يعرف شاب عايز يدرس تخصص معين ،بس التخصص ده زحمة جدا و المنافسة فيه هتكون شديدة و هيكون فعلا الفرص المتاحة قليلة جدا، بس د.طارق قال " ده هم اللى يقلقوا منه ، مش العكس" لأن الشاب ده بيقرأ أربعين كتاب فى الشهر، يبقى هو مايقلقش إنما هم اللى يقلقو

    و ده قصدى بالظبط، إنه لما يكون انسان متميز بجد و مركز على نفسه اكثر من تركيزه على (مين عمل إيه) فهيفرض وجوده و هيصنع فرصته هو لأنه ساعتها هيكون عملة نادرة و مش زيه زى أى حد
    و فى مثال تانى شفته بعينيه، إن كان فيه شاب تخرج من كلية هندسة زيه زى أصحابه، فاصحابه و زمايله كل واحد فيهم راح يدور على شغل أول ما اتخرج و طبعا الفرص كانت قليلة جداا و فييين و فين لما لقو شغل، و لما لقوه كمان كان بمرتب قليل
    بس هو بقه عمل إيه ؟ هو مارحش يدور على شغل -و طبعا كل زمايله كانو بينتقدوه- و قعد سنه كاملة ياخد كورسات و يتعلم حاجات كتير محدش من زمايله اتعلمها، و بعد السنة ديه بقى هو معاه خبرات نادرة و ساعتها الشركات هيه اللى كانت بتجرى وراه و اشتغل فعلا بمرتب أكبر بكتيييير من مرتبات أى حد تانى فى دفعته
    يعنى هو مادخلش نفسه فى زحمة الكراسى الموسيقية و لكن ركز على نفسه و بقى مميز و جاب كرسيه معاه و قعد و كمان حط رجل على رجل

    و هوه ده بالظبط اللى أقصده ، إن كل انسان يركز على نفسه و يصنع فرصته بنفسه، و قصص حياة الناجحين مليااانة أمثلة من النوع ده

    و ربنا وعدنا فى سورة الكهف أنه مش هيضيع أجر أى انسان يحسن عمله، فدورنا اننا نحسن عملنا و نحسن الظن بالله أنه هيكرمنا و مش هيضيع أجرنا


    أنا مبسوطة جدا جدا بتعليقك و بالمناقشة العلمية الذيذة ديه و دايما منورانى إن شاء الله

    تحياتى ليكى يا جميلة و جزاك الله ألف خير

    ReplyDelete
  7. موضوع جمييييييييييييييييييل من إنسانه أروع وأجمل
    وبجد بيناقش حاجه مهمه جدااااااااا في حياتنا
    وفكرة "نجاح الآخرين هو فشلى، و لابد من أن يفشل الآخرون، لكى أنجح أنا"
    بجد فكرة خطيره جداااااااااااا
    لكن تسمحيلي أتكلم في الموضوع من ناحيه تانيه وإن كان هيكون ليس له علاقه
    لكن أنا هقول أنا فاشله
    أيوه أنا فاشله
    لالالالالالالالالالالالالالا
    أنا مش فاشله
    أنا فشلت!!!!!
    أه فشلت وفشلت كتييييير جدااااااااااا
    بس عارفين إتعلمت إيه من فشلي

    أول حاجه إن الفشل هو أول طريق النجاح
    فعلشان كده سيبي طفلك من صغره يجرب مش بقولك سبيه يفشل
    لا سبيه يجرب ولو وقع مره
    المره التانيه هيتعلم يقوم
    والمره التالته مش هيقع

    مش تعوديه إنتي على الفشل!!!!!!!!!!!!

    إنه يفشل في حاجات ده بعد كده هيعلمه حاجات كتيييييير مهمه ومفيده ليه في حياته زي ما أنا كمان إتعلمتها

    وأنا هقولك الفشل عمل فيا إيه
    أنا كتير كنت بشوفها نهاية الدنيا
    وكنت بحس إني مهما عملت هفضل أفشل
    لكن لاقيت إن سبب وقوعي كتير هو إني أقول كده
    وطول ما هحط في دماغي إن الدنيا هتقف على كده مش هعرف حتى أحاول تاني
    وليس الفشل هو الذي يجعل منا فاشلين لكن إذا توقفنا عن المحاولات وقبلنا
    هذا الفشل نكون فاشلين 000

    ورأيت أن من يفشل باستمرار يكون :

    لأنه اخترع بعض الكلمات المحبطة مثل :

    هذا مستحيل - صعب - لا أقدر - هل فعلها أحد قبلنا - تعبت من كثرة
    الإحباطات والفشل الذي مررت به.

    ليس المهم ماحدث لي في الماضي ولكن ماذا سأفعل الآن هو الذي سيصنع الفرق
    في حياتي .

    وحتى تتغير الأمور يجب أن اتغير أنا وليس الأخرين .

    فلن أرضي أن أعيش على هامش الحياة وكأني لا وزن لي ولا قيمة .

    إنه من المستحيل أن أغير امسي . . ., وقد يكون صعباً ان أغير يومي ,

    ولكن بالتعليم من فشلي في الماضي وأخطائي كل شيء ممكن غداً - بإذن الله -

    لأن سأضع أمام أعيني أن قدرتي غير محدودة على الإطلاق . . . . غير محدودة . . . غير محدودة . . . .بشكل غير طبيعي

    وهذا ليس غرور بل إنها ثقه


    لو أردت ان أكون ناجحه سأعطي فوق طاقتي فقط 1% عندها سأشعر بأني أعطي
    و أحقق نجاح حقيقي

    فأفعال صغيرة تقودني إلى نجاحات كبيرة .

    طموحاتي بالحياة تحدثها افعال صغيرة 0

    وأنت إن كانت نظرتك المبدئية هي فشل اعتبرها تجربة تعلمت منها وأستفدت منها
    لأن كل شيء خلقه الله تعالى بسبب

    وماحدث لك حدث بسبب ربما كان يهيئك لأمر ما 00000

    وأنت في يديك تكون أو لا تكون !!!!!!!!!


    ربما ما يراه الناس منك هو فشل هو بالحقيقة خطوة نحو نجاحك الأكيد

    لذالك اريدك ان تصعد . . . فوق فشلك .

    صدقني لو شغلت فكرك بالنجاح ستنجح باذن الله ولو شغلت فكرك بالفشل ستفشل


    وهناك حكمة تقول: "أذهب خلف حلمك مع رغبة جادة وعزم وتصميم "فاما أن تنجح واما أن تتعلم وتكبر" 0

    فهكذا علمني الفشل000!

    علمني الفشل ألاّ أيئس ، فكما خلق الله الضراء فقد أوجد السراء ،
    فقليل من الأمل يجعل للحياة طعماً آخر ، ومقدار الرضا يزيد مساحة الإيمان في القلب
    علمني الفشل أن احذف كلمة
    " لو " من مفردات قاموسي ، وتعويضها بـ

    " إنا لله وإنا إليه راجعون "

    "اللهم أجرني في مصيبتي واخلف لي خيرا منها"

    "قدر الله وماشاء فعل"

    وبجد آسفه جداااااااااا على الإطاله وخروجي عن نطاق الموضوع
    وأتمنى حضرتك ماتزعلي مني
    لكي تحياتي وأمنياتي لكِ بمزيد من التميز

    ReplyDelete
  8. Eman Ayman

    ربنا يعزك دايما و يكرمك، و سعيدة فعلا إن الموضوع عجبك
    ..............
    بالنسبة لكلامك الأكثر من رااااائع، حقيقى مش قادرة أقول لك أنا سعيدة بيكى قد إيه، ما شاء الله عليكى ، ربنا يزيدك وعى و حسن تعبير

    و بجد ما تعتذريش خاااالص، بالعكس، باسعد جدا لما باشوف كلامك و تعليقك و انت بجد بتُزيدى المدونة ثراءا، و عقبال ما تعملى المدونة بتاعتك إن شاء الله، و آجى أعلق عندك
    :)

    ربنا يوفقك دايما و ينور بصيرتك للخير

    ReplyDelete