الكراسى الموسيقية

"نجاح الآخرين هو فشلى، و لابد من أن يفشل الآخرون، لكى أنجح أنا"

مش عارفة ليه المفهوم ده متأصل و مترسخ و متشعب و متــ....حاجات كثيرة قوى فى وجدان الكثير من الناس، يعنى لما (س) يشوف أن (ص) عمل حاجة حلوة أو حصلت له حاجة كويسة أو حتى مناسبة سعيدة ،أو يسمع عنه أنه حقق نجاح كبير -أو حتى صغير- فى حاجة معينة.....ينزل عليه الخبر كالصاعقة وفجأه يسمع فى ودانه حاجة كده زى صدى الصوت بتقول كلام من نوعية

فاشل ...فاشل...فااااااشل

أو يمكن يكون الصوت مختلف شوية، ويكون من نوعية

تعيس ...تعيس...تعيييييس

و ياه بقى لو كان من نوعية

حظوظ.....حظوظ.....حظووووووظ

و يا سلام ...يا سلام بقى لو همه الإثنين بيشتغلوا فى نفس المجال، تبقى كارررررثة و مصيييبة ، ويبدأ (س) يدور و يدعبس و يد.....حاجات كثيرة قوى برضه علشان يلاقى أى عيب فى اللى عمله (ص)، أو يبدأ يقلل منه و طبعا غنى عن الذكر أنه فى أغلب الأحوال لو (س) ده ربنا كرمه و نجح فى حاجة ، (ص) هيعمل المثل،.. ما القلوب عند بعضها!!!!!، (طبعا إلا من رحم ربى) قعدت أفكر فى السبب فى المفهوم العجيب ده،.......... يمكن علشان منذ الطفولة لما بيجوا يشجعوا الطفل علشان يذاكر (أو حتى علشان يعمل أى حاجة) بيقولو له "ذاكر علشان ما تبقاش أقل من فلان ؟ و عشان فلان مايجبش درجات أكثر منك و يبقى شكلك وحش"؟؟

يعنى تشجيعهم له مش يذاكر علشان يتعلم و اللا حتى علشان يجيب درجات عالية،لاااااااااااا.... المهم فى الموضوع أن درجاته تكون أعلى من درجات زمايله، و بالتالى كل ما زمايله يفشلو ,ده معناه إن فرصته أحسن للنجاح.

آآه، يبقى الموضوع بقى ما بقاش بينه و بين العلم و الكتاب ، لأ... ده كده بقت مسألة شخصية، بينه و بين الأعداء( ما هم بقو أعداء خلاص) فكل ما هينجحوا هيكون ده فشل ليه و برضه العكس صحيح، يعنى بطريقة التفكير دى ،لما واحد يطلع الأول بمجموع 60% (علشان التلامذة اللى فى فصله ما بيذاكروش)، هيبقى أحسن من واحد جايب 95% بس طالع الحداشر على الفصل (علشان الفصل اللى هو فيه كله تلامذة شاطرين).

يبقى بدل ما كل واحد فيهم يركز على العلم، هيركز على إزاى يخللى زميله يفشل، و لو اطمن إن زميله مش بيجتهد ، هيقلل من مذاكرته ...ما هو يتعب نفسه ليه؟؟؟؟ العلم مش فارق معاه، المهم الترتيب.

ولو واحد بقى من الناس اللى ما بيحبوش المذاكرة و مفيش بينهم و بينها عمار ، هيتضايق من اللى بيذاكروا جدا و يحس إن هم سبب تعاسته ، لأن دول هم السبب فى إن شكله بايخ ،

لأن لو ما كانوش شاطرين كان زمانه طالع الأول بمجموع 49,99% قد الدنيا ، فهيركززززززز طاقته كلها فى الحقد والتفكير السلبى ، بدل ما يركزها على نفسه و يشوف إزاى يحسن و يطور من نفسه و يكون متميز هو كمان، و ده طبيعى لأن

الإحساس السلبى بيوقف التفكير الإيجابى

و دى كلها صورة مصغرة من اللى بيحصل فى الحياة عموما من الكبار قبل الصغيرين،

-الظاهر الحياة هتقلب لفصل كبير بعد ما كانت مسرح كبير-

طب و بعديييين؟؟؟؟؟؟؟؟

فبعد التفكير و الفحص، توصلت إلى إن النجاح فى أى مجال فى الحياة بيتبصله على إنه لعبة الكراسى الموسيقية، يعنى لو احنا 6 يبقى مافيش غير 5 كراسى و لو كنا 5 يبقى بقدرة قادر الكراسى بقو 4 بس ، يعنى لو عملنا إييه بالذى لاااااازم و أكييييد هيكون فى حد مالوش مكان و كل واحد خايف ليكون الحد ده، علشان كده بيزق و يوقع غيره على الأرض علشان خاطر يقدر يلاقى كرسى يقعد عليه أوعلى الأقل علشان مايبقاش شكله وحش إذا هو اللى وقع-،.............. إنما لأ و ألف لأ

و أنا على يقين أن"النجاح و أى حاجة حلوة فى الحياة ليست كراسى موسيقية"، و لما بنقول " مش ممكن كلنا نطلع الأول" فى رأى إن الجملة دى مش كاملة وعلشان تبقى كاملة يبقى المفروض تتقال

"مش ممكن كلنا نطلع الأول فى نفس الوقت و فى نفس المجال و بنفس المكانة و بنفس البصمة"

و ركزززززززز قوى على كلمة نفس البصمة دى، لأن ده معناه إن ممكن قوى كلنا نكون أوائل ،كل واحد ببصمته و سمته و أسلوبه و تميزه من غير ما يحتاج أنه يشغل نفسه بإزاى يهد الآخر أو يحل محله و الدليل على كده إن فى كل المجالات هتلاقى ناس ناجحة كثير وناس بيشتغلوا فى نفس المجال و كل واحد فيهم له مميزاته الخاصة اللى بتختلف عن الآخر و متقدرش تحط واحد منهم مكان الثانى أو تقول إن ده يحل محله، لأن كل ناجح حط البصمة بتاعته هو بس اللى محدش يقدر يكررها، و لو حد حاول يقلده هيكون نسخة،و مهما نجح فى تقليده، أعلى حاجة هيوصل لها ،أنه هيكون نسخة كويسة

إنما الشخص الآخر هيفضل الأصل لأن بصمته ماحدش هيقدر يحطها غيره،.... فمترضاش لنفسك إنك تكون مجرد نسخة ، إنما اعمل لنفسك مكانك الخاص بك و اطمئن إن لك رزقك اللى متحدد لك و ماحدش هياخده غيرك ، و أى زيادة فى رزق الآخرين مش معناه نقص فى رزقك انت

فـ.... لا تصارع الآخرين على أماكنهم و لكن اصنع لنفسك مكانا بجوارهم

وخليك أصل جديد ..أصل لنفسك و كل أصل بيجيب كرسيه معاه من غير ما يحتاج أنه يزق حد علشان يقعد