Thursday 14 January 2010

اصنع ( نوبل ) الخاصة بك


" هل انت مقدر نفسك؟"
من ضمن الحاجات المهمة للإنسان ، إنه يشعر بإنه متقدر من الآخرين ، و لكن السؤال الأهم، و قبل ما تكون بتسعى للتقدير من الغير، هو: هل أنت بتقدر نفسك بشكل إيجابى سليم؟؟؟؟
شكل إيجابى سليم إزاى يعنى؟؟؟؟

يعنى مثلا، تكون مش بتقلل من نفسك كل شوية ، و مش بتقول على نفسك صفات سيئة ، و إنك تكون بتقدّر قيمة نفسك و بتشعر إنك بتعمل حاجة مفيدة، مهما كانت الحاجة المفيدة دى صغيرة فى شكلها، و لكنك بيكون عندك ثقة إن لها أثر و عمق فى حياة الآخرين، حتى و لو كان الأثر ده ، مجرد رسم ابتسامة على وجوه الغير. و إن تكون معظم الأعمال اللى بتقوم بها بتاخد فيها نية كبيرة لربنا سبحانه و تعالى، فبتكون طامحا فى الثواب الكبير اللى على قدر نيتك الكبيرة،و لأنك بتعمل كل ده فالنتيجة إنك فى خلال يومك بتكون فى حالة من الإمتنان و الرضا، و بالتالى، بيكون عندك إحساس بالسعادة والثقة بالنفس

أتمنى بجد إنك تكون بتفكر بالطريقة دى، و تكون بتقدّر نفسك بشكل إيجابى ،..مع ذلك ، فأظن إن كثير من الناس مش بيفكروا كده، ده ممكن يكونوا بيفكروا بطريقة عكس كده تماما

طيب إزاى نفكر بالطريقة الإيجابية اللى ذكرناها؟؟؟؟؟؟
أول حاجة لازم تدركها جيدا ، إن الشخص اللى بيفكر فى نفسه بشكل إيجابى صحى و سليم، هو فى حقيقة الامر إنسان نافع للغير ، و لكن على الجانب الآخر ، الشخص اللى بيقلل من نفسه بشكل كبير، فده بيمارس نوع من أنواع الأنانية

!!!!!!!!!!!!!!!!
نعم.....الأنانية، إزاااى؟؟؟؟؟
ممكن حد يفتكر إن الإنسان لما يبحث عن إيجابياته و يقدّر نفسه ، فده نوع من أنواع الغرور أو التفكير فى النفس الزائد عن اللزوم أو التمركز حول الذات و الأنانية، و علشان كده ،و علشان يثبت لنفسه إنه إنسان معتدل و مش أنانى و لا حاجة ، فبيعدد سلبياته بشكل متكرر و يركز عليها و يضيف عليها كمان ، و مش بعيد يبدأ يقولها للناس، فى حين إن الحقيقة اللى هو مش مدركها إنه هو كده مش معتدل و لا حاجة، ده بالطريقة دى، بيبقى هو اللى متمركز حول ذاته و بيمارس نوع من أنواع الأنانية
فالشخص المغرور متمركز حول ذاته بإنه بيفكر فى نفسه كثير و بيزود من الأنا بتاعته زيادة عن اللزوم، أما بالنسبة للشخص اللى بيقلل من قيمته باستمرار، فهو برضه متمركز حول ذاته ، و بررررضه بيفكر فى نفسه كثير ، و لكنه بيقلل منها زيادة عن اللزوم
ممكن تكون أول مرة تنظر لها بالنظرة دى، إن كلا الشخصين بيتمركزوا حول نفسهم بشكل مبالغ فيه، و لكن واحد بالزيادة قوى ، و التانى بالناقص قوى.
و يمكن كثير من الناس بتتجه للتركيز على سلبياتها ، ظنا منهم إن دى حاجة كويسة وصفة جميلة، و إنهم كده فى الأمان و بعيدين كل البعد عن الأنانية و عن التمركز حول الذات، و كمان لإن المجتمع و المفاهيم الموجودة بتساعد على حاجة زى كده، فالنتيجة إنهم بيتجهوا للسلوك ده أكثر، ظنا منهم إنهم كده تمام و فى السليم
!!!!!!!!!!!!!!!!!!

و لكن العكس هو الصحيح، و لما الإنسان يقلل من قيمته باستمرار، فده هيكون تأثيره سلبى جدا على ثقته بنفسه، فتقدر توصف وضع الشخص ده ببساطة
(إنه قلل ثقته بنفسه من كُتر ما فكر فى نفسه)
و النتيجة الطبيعية لكده إنه هيشعر بالضيق و الإحباط



طب وليه ده كله؟؟ انت قادر-بعون الله- على إنك تقدّر نفسك بشكل إيجابى و تستمتع بحياتك بما يرضى الله و بما ينفعك و ينفع غيرك، ....و مع ذلك ممكن حد يكون بيسأل نفسه ( طيب هو هيقدر نفسه ليه ؟ و على إيه؟ ) ، و الإجابة ببساطة......إن يكفى إن ربنا -سبحانه وتعالى- اختارك و اصطفاك أنت لتكون أسمى و أكثر الكائنات تعقيدا و أكثرهم رُقيّا، ربنا -سبحانه و تعالى- اختارك أنت لتكون بشرا، ....أحيانا بنشوف الكائنات الأخرى ، زى نملة أو ذبابة أو أى كائن آخر ، سواءا على الطبيعة أو فى برامج التليفزيون، و بنتعجب من شكله و من طريقة حياته و من عاداته الغذائية، و بننسى إن كان ممكن جدااااااا أى حد من الناس اللى بيتفرجوا دول يكون هو نفسه الكائن الآخر ده ، و ساعتها كان باقى البشر هينظروا لحياته بتعجب، أو يستخدموا حياته لتصوير برنامج تليفزيونى، أو يعملوا عليه تجارب، أو يخترعوا حاجة لقتله و التخلص منه أو أو أو، و لكن بدلا من ذلك كله ، اختارك الله -سبحانه و تعالى- و فضّلك و كرمك بألا تكون أحدا من هذه الكائنات، و بإن تكون المكلّف بخلافة الله فى الأرض، ...أكيد ده له دلالة كبيرة على قيمتك فى الحياة


و لذلك، فتقديرك لنفسك الصحى السليم، هو فى حقيقته هيكون مش نابع من كبر الأنا و من التكبر و العياذ بالله، و لكن هيكون نابع من تقديرك لتكريم ربنا -سبحانه و تعالى- لك ، و شكرك على نِعَمُه عليك التى لا تعد و لا تحصى ، و حينها هتستمد طاقة تقديرك لنفسك من امتنانك لهذا التكريم و من شكرك على هذه النِعَم، و من عدم إنكارك لكل ذلك ، فلا يجوز أبدا أبدا و لا يصح إن الإنسان يقلل من قيمة هذه النعم و هو متصور إنه بالشكل ده يبقى إنسان كويس و متواضع

!!!!!!!!!!!!!!!!

فقد قال الله تعالى فى كتابه الكريم " و لقدْ مَكّناكُم فِى الأَرضٍ و جَعَلنا لَكُم فِيهَا مَعايِشَ قَلِيلاً ما تَشْكُرُون* و لَقَد خَلقْنَاكُم ثُم صَوّرنَاكُم ثُم قُلنا لِلمَلائكَةِ اسجُدوا لأدَمَ فَسَجَدوا إلا إبليسَ لم يكُن مِنَ السَاجِدين" صدق الله العظيم (سورة الأعراف- آية 10، 11)

شوف تكريم ربنا سبحانه و تعالى لك ، و شوف قوله تعالى ( قليلا ما تشكرون)، فاستشعر عظمة هذا التكريم و كن أنت من الشاكرين ، وكن فى حالة امتنان لنعم الله عليك، و استشعر مسؤليتك تجاه النعم دى و تجاه دورك فى الحياة كإنسان ، وعندها هتشعر بسعادة و راحة نفسية و هتقدر تفيد من حولك و تنجز وتشعر بسعادة الإنجاز، مهما كان الأنجاز ده صغير فى مظهره، طالما إنه شىء حلال

و يوجد الموقف المعروف فى مجال التنمية البشرية عن عاملىّ بناء مشتركين فى بناء نفس المبنى ، و عندما تم توجيه سؤال لأحد العاملين عن طبيعة عمله ، فأجاب بممل إنه لا يفعل شىء سوى وضع و ترتيب بعض الطوب و الأعمدة . و عندما تم توجيه نفس السؤال للعامل آخر، كانت الإجابة مختلفة تماما ، لإنه أجاب باعتزاز وفرحة بإنه بيقوم ببناء صرح عملاق ....... هل لاحظت الفرق؟ كلاهما كان بيعمل نفس العمل و لكن رؤية كل واحد منهما لما يفعله و تقديره لهذا العمل مختلفة ، ليه؟؟؟ لإن الرؤية دى نابعة من تقدير كل واحد لقيمة نفسه ، و بالتالى قيمة اللى نَفسُه دى بتعمله.


وعندما سُإلت سيدة ألمانية عن وظيفتها ، فأجابت بأنها مدرسة رياض أطفال ، و لكن الطريقة السعيدة و الفخورة اللى أجابت بها جعلت السائل يسألها " إنت بتحبى شغلك قوى كده؟" ، فأجابت بكل اعتزاز : " طبعا، أنا بابنى ألمانيا المستقبل" ،

يااااااه ، انظر لرؤيتها لنفسها إنها إنسانة مؤثرة وإن لها بصمتها و أهميتها فى المجتمع ، جعلها تنظر لعمق ما تفعله ، و تقدّر ده بشدة و تدرك إن مستقبل بلدها بيعتمد عليها و على معاملتها لهؤلاء الأطفال. لك إنك تتخيل الفرق بين مدرّسة بتقدر قيمة نفسها و بتنظر لما تفعله على إنها بتبنى مستقبل بلادها ، و أخرى لا تقدر قيمة نفسها و صورتها عن نفسها سلبية و سيئة فبتنظر لعملها على إنها مجرد بتروح المدرسة تدى كام حصة و خلاص،.... و ابدأ بقى تصور و تخيل الصورتين فى كل المهن و كل الفئات، و شوف الفرق

تفتكر مين اللى هينجح أكثر ، مين اللى هيكون أسعد ؟ مين اللى هيؤثر بشكل إيجابى فى من حوله أكثر؟؟؟

أكيد انت عرفت الإجابة، أكيد الشخص اللى مقدر نفسه تقدير إيجابى سليم ، ...و علشان كده هتجد إن تقدير الذات الصحى الإيجابى بعييييييد كل البعد عن فكرة الأنانية و التمحور حول الذات ، ده العكس هو الصحيح ؛ فكل من يقدّر نفسه ، سيقدّر ما يفعله و يرى عمق تأثيره ، و سيجتهد للنجاح ولإفادة الآخرين ، و هيتقن فى عمله لأن عمله الجيد هيكون انعكاس لذاته الجيدة.

و سبحان الله ، من المنظور الإيمانى هنجد إن الإسلام حث على إن كل حاجة نعملها ناخد فيها نية كبيرة لله –سبحانه و تعالى – ، و على قدر كبر النية و على قدر التفكير فى معانى أعمق و تأثير أوسع لما تفعله، كلما كبر ثوابك بسبب كبر نيتك،... و من منظور التنمية البشرية ، هنجد تأثير ده ، إن كلما كان تفكيرك فى معانى أكبر و أعمق لما تفعله ، كلما زاد تقديرك لنفسك و ثقتك فى نفسك و زاد إتقانك لعملك و إفادتك لمن حولك و زاد إنجازك فى الحياة، و الإنجاز ده يعتبر من أكبر القوى المحفزة ، و من أقوى الحاجات اللى بتقضى على الإحباط ، و من أكثر المشاعر التى تبعث على السعادة و الرضا و الثقة بالنفس.


و إذا كان سبق لك محاولات غير ناجحة أو سبق لك أن فعلت أشياء تتضايق أو تخجل منها ، فأنت قادر إنك تغير ده حالا و تقرر من الآن فصاعدا إنك ستتخلى عن أنانية التفكير السىء فى الذات، و هتشجع نفسك ، فممكن الإنسان يتضايق عندما لا يجد تشجيعا من الآخرين و لكن لازم ياخد باله علشان لا يكون هو نفسه واحد من الآخرين دول اللى مش بيشجعوه ،.. و مهما حصل تقدر تقرر إنك تقدر قيمة نفسك و قيمة ما تفعله ، يعنى أى حاجة سيئة هتكون عملتها ،مش هتكون أكثر من ديناميت (ألفريد نوبل)

!!!!!!!!!!!!!!!!


فالعالم الشهير (ألفريد نوبل) مخترع الديناميت ، فى الأصل فكّر فى اختراع الديناميت لتسهيل حفر المناجم ، و لكن اللى لم يكن فى حسبانه إن الديناميت هيستخدم كسلاح فى الحروب و هيستخدم لقتل الآلاف من الناس.

تصور كده فكرة إن واحد ينظر لنفسه كل يوم و يتخيل إنه سبب فى مرض و تشريد و قتل الآلاف من الرجال و النساء والأطفال،.... لدرجة إن إحدى الصحف الفرنسية لقبته بـ ( تاجر الموت) و بأنه ( الشخص الذى أصبح ثريا عن طريق إيجاد أسرع الطرق لقتل الآخرين) ،............ و مع إن استخدام اختراعه استخداما خاطئا ، لم يكن خطؤه هو أو ذنبه هو ، و لكنه شعر بالندم و الضيق الشديد لذلك . كان من الممكن جدا إنه يفكر فى نفسه على إنه إنسان سىء و عالِم مدمر أدى إلى دمار العالم بدلا من إفادته ، و كان ممكن جدا يستسلم للفكرة دى و يدخل فى دوامة الإحباط و هدم و تدمير الذات بالمزيد و المزيد من الأفكار السلبية، لكن هو لم يفعل ذلك ، و لإنه مقدر نفسه صح و عنده صورة إيجابية عن ذاته ، رفض و تمرد على فكرة إن دى تكون آخر حاجة يسيبها للبشرية ، و لا يمكن إن اسمه يقترن بالخراب و الدمار، و علشان كده ، لم يستسلم و قرر يعمل عمل مفيد و سخر ثروته الكبيرة لعمل جائزة (نوبل)؛ ليتم منحها للذين أثروا فى حياة البشر بشكل إيجابى و لتشجيع العلماء من جميع أنحاء العالم على نفع البشرية.

و من خلال تقديره الإيجابى لذاته استطاع إنه يعبّر عن معدنه و جوهره الحقيقى كعالِم يريد الخير و النفع و ليس الدمار و القتل.

و بالنسبة لك ، أيا كانت الأشياء الغير الناجحة أو الغير جيدة التى بدرت منك فى الماضى تجاه نفسك أو تجاه أى أحد – بقصد منك أو بدون قصد- فمش هتكون سببت دمار و أذى قد اللى سببه الديناميت، و من رحمة ربنا سبحانه و تعالى إن أبواب مغفرته و رحمته للناس مفتوحة دائما ، قال تعالى " قُل يَا عِبَادِى الذينَ أسْرَفُوا على أنفُسِهِم لا تقنَطُوا مِن رَحْمَةِ الله إنّ اللهَ يغفِرُ الذّنُوبَ جَمِيعًا إنّهُ هُوُ الغَفُورُ الرحِيم" صدق الله العظيم (سورة الزمر- آية 53)

و اقتران الياء بلفظة عبادى ، يدل على تشريف و تكريم عظيم لك، فتذكر أنك عبدا لله ، و ده فى حد ذاته أكبر قيمة و تشريف ممكن تناله ، فلابد أن تستمد من ذلك قيمتك وأن تقدر ذاتك بشكل إيجابى و تكون فى حالة امتنان و شكر ، فأنت خليفة الله فى الأرض و ربنا سبحانه و تعالى نفخ فيك من روحه ، كما قال تعالى " فَإذا سَوّيتُه و نَفَختُ فيهِ مِن روحِى فَقَعُوا له سَاجِدِين" صدق الله العظيم (سورة ص- آية 72)

و عندما ترى نفسك بأنك قيّم ، فلابد أنك ستفعل ما يعبر عن قيمتك ، و عندها تجتهد و تسعى لإفادة الغير و للنجاح بشكل أكبر و بسعادة أكثر، فمن الآن فصاعدا ،تذكر أنه من الأنانية أن تقلل من قيمة نفسك ، فقدّر نفسك جيدا و فكر فى معانى أكبر لكل ما تفعله ، و اتقن فيه و اجعله خير انعكاس لتقديرك الإيجابى لذاتك


و كما صنع (ألفريد نوبل) جوائز( نوبل) و أفاد الغير ، فافعل انت أيضا ما تعبر به عن تقديرك لنفسك و ما تفيد به غيرك، و اصنع ( نوبل ) الخاصة بك


==================================

معذرة لطول فترة الغياب الماضية و التى افتقدتكم جميعا فيها ، جزاكم الله خيرا على السؤال و الاهتمام ،

بارك الله فيكم جميعا و وفقنا لما يحب و يرضى

39 comments:

  1. السلام عليكم
    حمداً لله على سلامتك ولعودتك الطيبة
    موضوع موفق ومن الممكن أن يستغل
    الفرد أقصى تاقاته لتحقيق كل ما يصبو إليه
    جزاك الله خيراً
    خالص تقديرى

    ReplyDelete
  2. ازيك فراشة اخبارك اية

    تغيبى وترجعى بااحلى المواضيع

    بجد بوست اكثر من رائع

    تسلمى علية

    مش تغيبى علينا تانى كتير

    ربنا يوفقك ويكرمك

    مع خالص تحياتى

    ReplyDelete
  3. السلام عليكم ورحمه الله وبركاته
    حمدالله على سلامتك يا دكتوره نهى والف سلامه عليكى
    وبجد موضوعك حلو جدااااااا
    وحقيقى كان بقالى فتره بفكر فى الموضوع ده ان الواحد لازم يقدر نفسه ويحبها بجد علشان يقدر يعيش فى الدنيا دى وان ده مش معناه ابدا الانانيه
    فربنا يكرمك ويعزك انتى بجد لميتى الموضوع بشكل رائع جدا
    وجميل جدا اخيارك لعنوانين مواضيعك
    ربنا يوفقك دايما ويباركلك فى وقتك

    ReplyDelete
  4. شوف تكريم ربنا سبحانه و تعالى لك ، و شوف قوله تعالى ( قليلا ما تشكرون)، فاستشعر عظمة هذا التكريم و كن أنت من الشاكرين ، وكن فى حالة امتنان لنعم الله عليك، و استشعر مسؤليتك تجاه النعم دى و تجاه دورك فى الحياة كإنسان ، وعندها هتشعر بسعادة و راحة نفسية و هتقدر تفيد من حولك و تنجز وتشعر بسعادة الإنجاز، مهما كان
    الأنجاز ده صغير فى مظهره، طالما إنه شىء حلال
    البوست كله ماشاء الله حلو جدااا جزاك الله خيراا د:نهى وفكرة ربط تقدير الذات بشكر الله عجبتنى جدااا
    تسلم أيد حضرتك.

    ReplyDelete
  5. ياااه يا نهى
    كنتِ فييين !
    بجد افتقدنا وجودك ومقالاتك المميزة جدا
    ماتغيبيش علينا كتير كده تانى:)

    ReplyDelete
  6. السلام عليكم يا نهى
    وعوده حميده مفيده ومتفاءله الصراحه
    ربنا يكرمك الحقيقه انا بكتسب معنويات قويه جدا بقرايه كلماتك فعلا احيان كتيره بنكون مش مقدرين نفسنا ونعايب على الاخرين تجاهلهم لاعمالنا
    اصنع نوبل لنفسك ما اجمل التعبير دا
    والنيه الكبيره لاخذ الاجر من الله سبحانه وتعالى
    ربنا يوفقنا جميعا لهدف رضاه اول
    ودمتى بكل الخيرا

    ReplyDelete
  7. عودة مؤثرة كما عهدتك دوما يا نهى .........موضوع جميل ورائع.. فعلا الإيجابية أمر بناء لشخصية إسلامية معتدلةوالسلبية آفة المجتمعات آجمع ...ربي يلهمك دوما
    ..البصيرة ويزيدك نور على نور

    ReplyDelete
  8. د/نهى
    متميزه كعادتك
    حمداً لله على سلامتك
    تقبلي مروري
    محمد البنا
    طريق النجاح

    ReplyDelete
  9. اللهم احسن ظنى بك واحسن ظن الناس بى واجعلنى خيرا مما يظنون
    احييكى على البوست الهادف والمثمر
    فعلا التقليل الدائم فى الذات ينافى الطبيعى وكذلك الكلام دائما عن الذات ينافى التواضع

    ReplyDelete
  10. عمرو جويلى
    ==========
    و عليكم السلام و رحمة الله و بركاته
    الله يسلم حضرتك ، جزاك الله خيرا

    أشكر حضرتك على رأيك ، و كلام حضرتك سليم و فى محله

    أشكر لحضرتك تعليقك و مرورك الكريم
    جزاك الله خيرا

    ReplyDelete
  11. Tamer Nabil
    ===========
    الحمد لله ، ربنا يكرم حضرتك ، و أتمنى تكون بأفضل حال إن شاء الله

    أشكر حضرتك على رأيك فى البوست، ربنا يكرمك

    و بإذن الله ربنا يعيننى و ألا أغيب كذلك عن التدوين


    وفقك الله للخير دائما

    جزاك الله خيرا

    ReplyDelete
  12. روح طفلة
    ========

    و عليكم السلام ورحمة الله و بركاته

    الله يسلمك يا دعاء :) ، ربنا يكرمك ، و اشكرك على سؤالك علىّ و اهتمامك

    سعيدة بجد إن الموضوع عجبك

    "وحقيقى كان بقالى فتره بفكر فى الموضوع ده ان الواحد لازم يقدر نفسه ويحبها بجد علشان يقدر يعيش فى الدنيا دى وان ده مش معناه ابدا الانانيه "

    فعلا كلامك سليم و طالما باعتدال و بدون افراط أو تفريط

    ربنا يكرمنا و يعزنا جميعا بإذن الله :) ، و بجد سعدت جدا بملاحظاتك على الموضوع و اللى حقيقى باستفيد منها
    ، وأتمنى إن كل المواضيع تنال إعجابك بإذن الله

    أشكرك على دعائك الجميل - اللى جاى فى الصميم- :) ، و ربنا يوفقك و يكرمك يا رب

    جزاك الله كل خير

    ReplyDelete
  13. عفوا أنا أميرة
    =============

    أهلا و سهلا بالأميرة سلمى
    :)
    أشكرك على رأيك فى البوست ، ربنا يكرمك
    و سعيدة بجد برأيك و بتعليقك اللى استفدت منه

    الله يسلمك يا سلمى

    ربنا يكرمك و يوفقك لكل خير بإذن الله

    جزاك الله خيرا

    ReplyDelete
  14. موناليزا
    ========
    "ياااه يا نهى
    كنتِ فييين"

    :)

    أهلا بيكى ، معلش شوية تعب كده بيزيدوا على كل فترة فبعدت عن التدوين الفترة اللى فاتت

    أشكرك ، ربنا يكرمك و انت كمان بجد وحشتينى

    إن شاء الله ربنا يعيننى إنى ماغيبش كده :) ، أشكرك على شعورك الجميل
    ربنا يعزك و يوفقك لكل خير

    جزاك الله خيرا

    ReplyDelete
  15. بسنت
    ====
    و عليكم السلام و رحمة الله و بركاته

    ربنا يكرمك ، حقيقى أشكرك على رأيك

    وبجد اكثر شىء بيسعدنى لما باعرف إن قارىء البوست تأثر به بشكل إيجابى

    ربنا يوفقك لكل خير بإذن الله، أشكر لك مرورك الجميل

    لكِ خالص تحياتى

    جزاك الله خيرا

    ReplyDelete
  16. كلمات من نور
    ============

    أهلا أهلا بحضرتك ، جزاك الله كل خير على رأيك و تواجدك

    و كلام حضرتك سليم ، ربنا يوفقنا جميعا لنكون مجتمع إيجابى بنّاء إن شاء الله

    "ربي يلهمك دوما
    ..البصيرة ويزيدك نور على نور"

    الله ، ..بجد دعاء جميل جدا جدا
    آمييين يارب العالمين ، و لك مثله بإذن الله

    حقيقى سعيدة بتعليق حضرتك و بتشجيعك

    جزاك الله خيرا

    ReplyDelete
  17. MOHAMMED ELBANNA
    ================

    الله يسلم حضرتك

    حقيقى أشكر حضرتك على رأيك، ربنا يكرمك

    وفقك الله لكل خير

    جزاك الله خيرا

    ReplyDelete
  18. مسدس صغير
    ========

    أهلا بحضرتك

    "اللهم احسن ظنى بك واحسن ظن الناس بى واجعلنى خيرا مما يظنون"

    آميين يا رب العالمين

    أشكرك على رأيك ، ربنا يعزك و يكرمك

    و فعلا كلامك فى محله ، فكل فضيلة بتكون فى الوسط بين رذيلتين ، ربنا يعيننا و يوفقنا جميعا لكى نتحلى بالفضائل إن شاء الله

    حقيقى شاكرة لمرورك و تعليقك

    جزاك الله خيرا

    ReplyDelete
  19. شكراً يا دكتورة على المقال القيم ده
    بجد شكراً
    عارفة انا تقييم الأخرين ليا اهم من تقييمى لنفسى
    يمكن عشان بقيم نفسى وحش
    بس بجد تقييم الناس بيدينى عمل فظيع فى الحياة
    و شكراً تانى ليكى

    ReplyDelete
  20. السلام عليكم
    ازيك يا نونو حمد لله ع السلامة

    كل سنة وانت طيبة
    جميل موضوعك ويا رب الكل يستفيد
    عام سعيد عليكي وعي اسرتك
    ان شاء الله
    دمتي

    ReplyDelete
  21. جميل أوى يادكتور الموضوع
    مش هقدر اديله حقه فى التعليق
    بس أنا أخر 3مواضيع عندى بشرح فيهم نفس النقطة بالظبط وكأنه توارد أفكار
    ربنا يكرمك دايما
    وحمدا لله على سلامة حضرتك

    ReplyDelete
  22. السلام عليكم

    موضوع رائع يا د نهي يغفر الغياب الطويييل

    واني لأعتقد ان غياب تقدير الذات لهي بلية عامة بيننا هذه الأيام وأتمني لو تبدأ بالإختفاء

    دمتي بالف خير

    ReplyDelete
  23. د/ نهى

    بجد ما شاء الله كل مواضيعك ذات قيمة كبيرة جداااااا
    و بجد صعب ان حد يديلها قيمتها

    بالتوفيق يا دكتورة و دايما للامام

    ReplyDelete
  24. بدراوى
    ======

    العفو، ربنا يكرمك ، أنا اللى أشكر حضرتك على رأيك و تعليقك

    هو فعلا زى ما حضرتك ذكرت إن تقييم الآخريين مهم ، و بيشجع جدا و يعطى أمل و دفعة قوية للأمام ، فهو دوره مكمّل لدور التقييم الإيجابى للذات

    أشكرك على رأيك بجد ، ربنا يبارك فى حضرتك

    جزاك الله خيرا

    ReplyDelete
  25. ذكرى رحيل قلم
    =============

    و عليكم السلام و رحمة الله و بركاته

    الحمد لله :) ، الله يسلمك ، و اتمنى إنك تكونى بكل خير

    جزاك الله خيرا على اهتمامك ، ربنا يبارك فيكى

    و انت طيبة و بكل خير يا رب

    اشكرك على رأيك ، و اتمنى فعلا إن الكل يستفيد بإذن الله

    منورانى حقيقى

    جزاك الله كل خير

    ReplyDelete
  26. mohamed ghalia
    ==============

    أهلا و سهلا بحضرتك ،أشكرك على رأيك

    " أنا أخر 3مواضيع عندى بشرح فيهم نفس النقطة بالظبط وكأنه توارد أفكار
    ربنا يكرمك دايما"

    سبحان الله ، الفترة اللى فاتت أنا كنت متوقفة عن الكتابة و عن متابعة المدونات كذلك عشان كده ماكنتش أعرف ، بس أنا واثقة إن أكيد حضرتك أبدعت فيهم كعادتك

    نفعك الله و نفع بك

    الله يسلم حضرتك

    جزاك الله خيرا

    ReplyDelete
  27. تايه فى وسط البلد
    ================

    و عليكم السلام و رحمة الله و بركاته

    "موضوع رائع يا د نهي يغفر الغياب الطويييل"

    الحمد لله ، أشكر حضرتك لرأيك حقيقى ، و معذرة على الغياب الطويل اللى لم يكن فى حسبانى

    و فعلا كلام حضرتك سليم ، ربنا يوفق أمتنا لكل خير إن شاء الله

    جزاك الله خيرا

    ReplyDelete
  28. dodoo
    =====

    أهلا بيكى

    ربنا يكرمك ، سعيدة إن الموضوع عجبك

    أشكرك بجد على تعليقك اللى حقيقى شجعنى ، ربنا يكرمك و يبارك فيكى

    وفقك الله للخير دائما و لما يحب و يرضى

    جزاك الله خيرا

    ReplyDelete
  29. السلام عليكم

    ازيك يا حبيبتى

    الف حمد الله على سلامتك

    اجمل حاجه ان كل انسان يبقى

    عارف مميزاته ايه وعيوبه ايه

    ويركز على ايجابياته

    موضوع جميل جدا بس طوووووووويل اوى يا نهى

    ربنا يسعدك يارب

    ReplyDelete
  30. حمدالله على السلامة يا قمرة

    موضوع مميز جدا كصاحبته

    تقبلي مروري

    ReplyDelete
  31. ليس فقيرا من يحب
    ==============

    و عليكم السلام و رحمة الله و بركاته

    الحمد لله ، ربنا يكرمك يا رانيا ، إزيك انت يا جميلة؟ يا رب تكونى بكل خير

    الله يسلمك

    "اجمل حاجة ان انسان يبقى عارف
    مميزاته ايه و عيوبه ايه
    و يركز على ايجابياته"

    انت جبتى الخلاصة فعلا

    "موضوع جميل جدا بس طوووووووويل اوى يا نهى "

    :) :) :)
    يمكن علشان احاول اعوض الغياب الطوووووويل برضه
    :) :)

    بس بجد هى الكحاية ماكنتش مقصودة و لكن المعنى له اكثر من جانب و ماكنش هينفع اشيل منه أى جانب
    و حاولت فعلا اختصر فيه و لكنى و جدت إن أى اختصار هيؤدى لبتر المعنى، لذلك عرضته كما هو على امل تحقيق الاستفادة إن شاء الله

    سعيدة برأيك و بتواجدك الجميل، شكرا لدعائك و لك مثله إن شاء الله

    جزاك الله كل خير

    ReplyDelete
  32. بنت مصر
    =======

    الله يسلمك يا جميلة ، انت اللى نورت المدونة

    شكرا لتعليقك و لرأيك الرقيق ، ربنا يكرمك و يبارك فيكى

    جزاك الله خيرا

    ReplyDelete
  33. موضوع جيد للغاية

    ReplyDelete
  34. Sharm
    =====

    أهلا بحضرتك فى أول زيارة للمدونة
    أشكرك لرأيك و تعليقك

    جزاك الله خيرا

    ReplyDelete
  35. السلام عليكم
    انا كنت قريت معظم الموضوع وقت كتابته

    ولكن وقتها كنت مشغول بالامتحانات وكده فمعرفتش اعلق


    طبعا موضوع رائع كالعادة

    فقط اريد قول شىء بسيط وهو انه الفرق بين الثقة بالنفس والغرور شعرة

    ReplyDelete
  36. دكتورة نهى
    بنتى الغالية
    ليكى وحشة كبيرة يانهى
    والله كنتى فى بالى قريب
    الف سلامة عليكى يانهى ربنا يبعد عنك كل سوء ياحبيبتى
    وياريت لاتحرمينى من دعواتك يانهى
    قلت ارحب بيكى وساذهب لقراءة البوست
    تحياتى

    ReplyDelete
  37. د.عرفة
    ======

    أهلا و سهلا بحضرتك يا دكتور فى أى وقت ، و بإذن الله تكون نتيجة الإمتحانات كل خير

    و هو فعلا ما بين الثقة بالنفس و الغرور شعرة ، و مع ذلك ، فهذا فى حالة ما يكون الثقة بالنفس منبعها النفس و العُجب بالنفس فحينها ممكن تتحول بسهولة إلى غرور و العياذ بالله
    أما إذا كان مصدر الثقة بالنفس للإنسان هو الثقة بالله و الثقة فى أن الله سيوفقه و يسدد خطاه طالما فعل كل ما بوسعه، و أن كونه فعل ما بوسعه كان بسبب كرم من الله، فيفكر أن الوسيلة كانت رزق من الله ، و الثقة فى النتيجة تنبع من الثقة فى الله ، فحينها هتكون الثقة بالنفس بعييييدة كل البعد عن الغرور
    إن شاء الله

    اشكر حضرتك لرأيك و تعليقك
    وفقك الله لكل خير

    جزاك الله خيرا

    ReplyDelete
  38. أم مالك
    ======
    أهلا أهلا بحضرتك

    حضرتك بجد غالية عندنا كلنا ، و افتقدت حضرتك جدا
    الفترة اللى فاتت، و أتمنى تكونى بخير حال إن شاء الله

    "والله كنتى فى بالى قريب"

    شىء يفرحنى ، و سبحان الله ، القلوب عند بعضها :) ، أنا كمان كنت بافكر فى حضرتك و بادعى لحضرتك
    ربنا يتقبل إن شاء الله

    الله يسلم حضرتك ، جزاك الله كل خير

    بجد حضرتك أسعدتينى جدا جدا بسؤالك

    أتمنى أن تذكرينى من صالح دعائك إن شاء الله

    جزاك الله كل خير

    ReplyDelete