Thursday 21 May 2009

من فضلك، لا تشعر هذا الشعور، الشعور فيه سُم قاتل


كتير من الأحيان ، لما تشوف فيلم مثلا، و حصل في الأحداث، إن حد تسبب فى أذى لحد تانى ، فتلاقى اللى وقع عليه الأذى ده بيقول بكل حُرقة: "أنا لا يمكن أسامحه أبدا"، و ممكن تلاقى حد يرد عليه يقول له:" ما يبقاش قلبك إسود، ده مهما كان (مش عارفة مين كده)"....، فتلاقى التانى يقوله بمرارة:" لا يمكن أبدا، أنا لا يمكن أسامحه مهما حصل و مهما اترجانى"
طيب السؤال اللى بيطرح نفسه هنا، هو لما أنا ما سامحش شخص معين لأى سبب كان،....هل أنا كده بأعاقبه ؟؟؟ أو بسبب له ألم؟؟؟


و اللا أنا فى الأساس بأؤذى نفسى بشعور يسبب لى أنا الضيق و الخنقة، و الشخص التانى مش هيتأذى بحاجة؟؟؟؟؟
طيب نشوف كده....لو كان الشخص ده مش حاسس إنه أذاك أصلا، و مش حاسس بيك أساسا، يبقى شعورك بالمرارة ديه، هيفرق معاه فى إيه؟؟؟



و لو كان الشخص ده أصلا إنسان سلوكياته سيئة و فيها العِبر، فمش هتفرق معاه إذا كنت انت هتسامحه و اللا لأ، و مش بعيد لو عرف انك مش مسامحه، هتلاقيه يقول بلا مبالاه: و إيه يعنى؟؟


و لو كان الشخص ده ندمان على اللى عمله ، و اعتذر، و حاسس بالذنب، و بالرغم من كده انت ماسمحتوش، فهو ببساطة، مسيييره هيزهق و هيحس إنه طالما اعتذر لك إنه خلاص عمل اللى عليه، و كون إنك قبلت ده أو ماقبلتوش فده مش هيخُصّه، و لو الشخص ده عرف إنك مش مسامحه، ممكن جدا تلاقيه يقول بزهق و ضيق: خلاص بقى هو حر، و أنا هاعمل له إيه يعنى؟؟ مش عايز يسامحنى........ بلاااااااااش


طيب يبقى مين اللى تعبان هنا؟؟؟ إنت و اللا التانى؟؟؟؟


مين اللى بيتعاقب و حاسس بالألم و المرارة؟؟؟ إنت و اللا التانى؟؟؟


إذا لم تسامح فانت بكده بتإذى نفسك ، و بتظن إن الآخر هو اللى تعبان، .... و فيه تشبيه متداول لعدم التسامح و هو : إن اللى مش بيسامح ده عامل زى اللى بيشرب السم و متوقع إن الشخص الآخر هو اللى هيموت بيه


و لكن الحقيقة إن السم ده هو اللى بيشربه و هو اللى بيعانى من أثره قبل أى حد، و لما ما تسامحش، فانت اللى هتكون تعبان قبل أى حد،....لأنك طول ما بتفكر فى اللى عمله فيك الآخر ، و الآخر ده ممكن يكون جدا و لا هوّ هنا، و لا حاسس بيك، فكإنك بالظبط، شايله فوق كتافك وماشى بيه و ظهرك محنى من كُتر الألم، أما هو...فراكب فوق و هوّ و لااااااااا على باله


طب و بعدين؟؟؟ هتفضل شايله لحد امتى؟؟؟


هيفضل ضهرك محنى لحد امتى؟؟؟؟؟هتفضل تشرب السم لحد امتى؟؟؟؟
انت اللى بإيدك انك ترمى الحمل الثقييييل ده من على اكتافك، و انت اللى بإيدك إنك ترمى السم قبل ما يدمرك، و قبل ما مرارة الإحساس بالرغبة فى الانتقام ما تحول الانسان اللى مفطور على الفطرة السليمه إلى وعاء ملىء بالسم و عايز الكل يشرب منه


طيب السؤال المنطقى هنا اللى ممكن يتسأل، طب يعنى أسامح و أنسى كل الحصل و اتعامل مع الشخص ده زى الأول و كأن شيئا لم يكن؟؟؟الإجابه هنا............لأ طبعا، سااااامح ، و مع ذلك.........ماتنسااااش

!!!!!!!!!!!!!!!!!!


إزاى بقى؟؟؟؟ مش كده أبقى ماسامحتش؟؟؟؟؟؟


لو فرضنا إنك حصل لك موقف مع واحد صاحبك زعّلك منه جداااا، و هو إنك قلت له على حاجة إنها سر خاص بك، و مش المفروض إنه يقوله لحد، و لكـــن


بسم الله ما شاء الله


بسم الله ماااااااا شاااااء الله

مافيش حد ماعرفش، هو قام بالواجب و نشر السر ده،... اللى مابقاش سر خلاص
هنا بقى...... صاحبك ده سواء اعتذر أو لأ، أكيد أنت هتتضايق منه فى الأول....طبيعى يعنى، بس بعد شويه هتسامحه خلاص، طيب.......لو سامحته و نسيت اللى عمله، و نسيت الدرس اللى انت اتعلمته ، فمن غير ما تشعر هتروح قايل له تاااااانى على سِرّك، و هتلاقيه تااااااانى ماحافظش على السر، و هترجع تااااااااانى تزعل منه، و ندخل بقى فى دايرة مفرغة كل شوية ،.......... إنما لما تسامحه و مع ذلك تفتكر الدرس اللى انت اتعلمته و هو أن صاحبك بالرغم من مزاياه إلا إن عنده العيب ده، فهتفتكر كويس قوىىىى إنك تتجنب إنك تقول له على أسرارك، علشان ماتزعلش منه تانى،.................. فمش هتبقى سامحته و بس، لأ كمان هتكون من الذكاء إنك تتعلم من أخطاءك و تتعامل مع الجانب الحسن من الناس و تتجنب عيوبهم اللى اتلدغت منها قبل كده، و كما قال الرسول صلى الله عليه و سلم فى الحديث الشريف:"لا يلدغ المؤمن من جُحر مرتين" صدق رسول الله صلى الله عليه و سلم
و طبّق الكلام ده على المعاملات عموما، لما تلاقى صفة ضايقتك فى شخص معين فصحيح إنك هتضايق منه فى الأول، بس بعد كده ،خلاص سامحه و إذا كنت مضطر إنك تتعامل معه ، فاتعلم من التجربة اللى حصلِت و افتكرها كويس علشان تعرف تتجنب عيوبه و تتعامل مع مميزاته


و إذا كان الشخص ده انتهى من حياتك و مش هتتعامل معاه من تانى علشان سافر مثلا، أو لأى سبب كان، فسامحه برضه و افتكر الدرس اللى اتعلمته، لأن أكيد فيه حاجة هتقدر تستخلصها و تتعلمها من التجربة دى، و لو لقيت نفسك مش قادر تعرف إنت اتعلّمت إيه؟؟؟ يبقى اعرف ان لسه فيه بقايا مشاعر عدم تسامح موجودة جواك، لأن لما مشاعرالضيق و المرارة بتكون موجودة، بتغطى على المنطق و تشوّش عليه، و علشان تقدر إنك تسامح فعلا، فأول خطوة....إنك تواجه الحقيقة، يعنى لو لسه مش مسامح ،واجِه نفسك بالحقيقة دى، و على فكرة ...ما فيش حاجة اسمها مسامح الشخص ده بس ساعات، أو مسامح نُص نُص....إنت يا إمّا مسامح ،يا إمّا مش مسامح، و معنى إنك سامحت هو انك لما تفتكر الشخص اللى كان مسبب لك ألم، تلاقى نفسك مش عايز تسبب له ألم، و مشاعرك تجاهه عادية بدون مرارة و ممكن كمان تدعى له بالهداية


و إذا كنت فعلا لسه ما سامحتش، اتخذ قرار واعى منك انك ترمى حمل الشخص ده من على كتفك ، انك تتوقف عن شرب السم اللى مش هيإذى حد غيرك..... وإذا الشخص ده أذاك، فسامحه و اتعلم الدرس اللى ربنا بعته ليك علشان تتحصن فى المستقبل و إذا كان لك حق شرعى فعلا مسلوب منك، فاسعى انك تسترده، و بما يرضى الله، وإذاسعيت بكل قوتك و مع ذلك ماقدرتش، فاعرف كويس إن حتى لو عدل البشر لم ينصفك، فعدل رب البشر قادر إنه ينصفك، واتخذ قرار إنك تسامح............... لأن كده أو كده الشعور بعدم التسامح مش هيأثر على الطرف التانى فى حاجة، و مش هيإذى حد غيرك

فاعمل لنفسك خدمة كبيرة ، و ارحم نفسك من السم اللى بتشربه، و اتحرر من الدوران فى فلك الشخص الآخر،....... و ممكن كمان تكتب له رسالة- الرسالة دى لنفسك مش علشان هو يقراها- و اكتب فيها
.


.


.


بالرغم مما تسببته لى من ألم،.... و بالرغم من كل شىء،...... فلقد قررت أن أسامحك، و ليست هذه بهدية منى إليك و لكنها هديتى إلى نفسى، لأننى أطمح فى الراحة و الطمأنينة النفسية ،و لأننى أطمع فى عفو الله، فقررت أن تسامحى هذا ما هو إلا ثمن بخس للحصول على ذلك، .........و أشكرك كثيرا لأنك علمتنى دروسا فى الحياه لم أكن لأتعلّمها بدونك ، شكرا لك لأنك علمتنى أننى أقوى و أسمى مما كنت أتصور ، شكرا لك لأنك علمتنى أننى قادر على أن أسامح و أعفو

و أدعو من الله أن يتقبل عفوى ،و يعفو عنى
الإمضاء

شخص شاكر لك الجميل



73 comments:

  1. بوست هايل فعلا،مفيش احلى من انك تنام بليل و مفيش فى قلبك ضغينه و لا شايل من حد،المسامحه مش معناها انك ضعيف،القوى هو اللى يسامح و يغفر لكن لا ينسى

    ReplyDelete
  2. السلام عليكم ورحمة الله وبركاته

    د نهي

    جميل جدا عرضك وتحليلك للموضوع

    فعلا فأنا متفق معك في جميع النقاط

    دمت موفقة اختاه

    خالص مودتي وصادق دعائي

    ReplyDelete
  3. ما شاء الله عليكي
    ربنا يحرسك ويتم عليكي نعمه ... انا قريت البوست ده كلمه كلمه وحرف حرف ... علشان بجد استفيد ... كلامك منطقي وعقلاني وكمان عاطفي ... يعني يقنع القلب والعقل ... انا بجد اقتنعت بيه ... اسلوبك كمان هايل وجميل ...

    ربنا يحميكي

    لا إله إلا الله محمد رسول الله

    ReplyDelete
  4. حلوة فكرة سامحه .. بس متنساش

    كلام مظبوط جداً
    جزاكِ الله خيراً

    ReplyDelete
  5. ممكن اسأل سؤال
    هو البوست ده ليه علاقة بحدث معين
    ؟!
    حضرتك فاهمة انا اقصد ايه طبعاً
    ؟!

    ReplyDelete
  6. بسنت صلاح الدين

    سعيدة بزيارتك و رأيك جدا

    و فعلا،رأيك سليم، التسامح قوة مش ضعف

    دمت دوما بكل خير، تحياتى ليكى

    ReplyDelete
  7. هذه حياتى

    و عليكم السلام و رحمة الله و بركاته
    أشكر حضرتك جدا على تشجيعك و على رأيك، و سعيدة بتفاعل حضرتك مع المدونة

    أتمنى لك كل التوفيق
    جزاك الله كل خير

    ReplyDelete
  8. mimi

    ربنا يكرمك و يبارك فيكى، ماتتخيليش كلامك ده أثّر فى قد إيه و رأيك ده حسسنى إن هدفى من البوست اتحقق، باشكرك جدا على احساسك الجميل و على تفاعلك

    ربنا يعزك و يكرمك دايما يا رب
    جزاك الله خيرا

    لا إله إلا الله، محمد رسول الله

    ReplyDelete
  9. د.ياسر عمر عبد الفتاح

    شكرا لك على رأيك اللى باعتز به و على تواصلك، و سعيدة إن البوست عجب حضرتك

    جزانا و إياكم الخير
    بالتوفيق لك دائما

    ReplyDelete
  10. بدراوى

    هو الحقيقة أنا مش متأكده حضرتك تقصد إيه بالضبط، لكن البوست ده ، ربنا أعاننى إنى أكتبه ، بسبب اقتراح من صديقة عزيزة لى -ربنا يجزيها كل خير- لما كنا بنتكلم مع بعض عن أهمية التسامح و أثره على الناس، فاقترحت على إنى أنزله بوست فى المدونة، و كان المفروض أنزله من حوالى 10 أيام و لكن انشغلت قليلا

    و هدف البوست واضح و هو التسامح و التعلم من تجارب الحياة

    أتمنى أكون أجبت عن سؤال حضرتك

    جزاك الله خيرا

    ReplyDelete
  11. This comment has been removed by the author.

    ReplyDelete
  12. انا اسف اصل انا افتكرت قصدك على حدث معين
    حصل الأيام اللى فاتت فى مصر
    انا اسف

    و كويس انى حضرتك وضحتى ان البوست هدفه ايه و سببه و انه كان المفروض ينزل من 10 تيام

    انا ممكن اشيل تعليقى خالص
    بسبب سوء الفهم
    ده

    و اقول تعليق تانى

    ReplyDelete
  13. بدراوى

    و الله اعتذار حضرتك ده، شجاعة أدبية كبيرة منك أحييك وأحترمك و أشكرك عليها

    دلوقتى اتأكدت من قصد حضرتك

    و مافيش داعى إن حضرتك تشيل التعليق لأن ممكن حد تانى يفتكر كده برضه، فأشكرك لأن كلامك لفت نظرى لحاجة ماكنتش واخدة بالى منها

    أتمنى لك كل التوفيق، سعيدة بتواصل حضرتك

    جزاك الله خيرا

    ReplyDelete
  14. اننا نسامح دي حاجة جميلة
    اننا ننسي دي حاجة صعبة جدا
    هو ممكن نسامح بس مننساش
    و لا لازم عشان نسامح ننسي كمان
    مش عارف
    انتي رايك ايه

    ReplyDelete
  15. كون الانسان بيقدر يسامح ويغفر
    اظن انها ميزة فيه
    وليس نقصا او تقليلا من قيمته

    انا اتكلمت عن نفس الموضوع بتاعك ده قبل كده
    http://1-aim.blogspot.com/2009/04/blog-post_07.html

    ممكن تشوفيه لو انتى حابة ده

    وجزاكم الله خيرا على البوست الجميل ده

    ReplyDelete
  16. هندسة وصفية

    هو فعلا اننا نسامح ، فده شعور نبيل زى ما حضرتك قلت

    و زى ما كنت باشرح فى البوست إنه مهم إن الواحد يتعلم من تجاربه و يفتكر الدرس اللى حصل له علشان ما يقعش فيه تانى

    فمننساش الدرس اللى اتعلمناه و لكن نتخلى عن مرارة عدم التسامح

    أشكر لحضرتك تفاعلك و أتمنى أكون أفدتك

    تحياتى لحضرتك
    جزاك الله خيرا

    ReplyDelete
  17. د/عرفة

    فعلا ، التسامح ميزة بالتأكيد نرجو من الله أن يعين الجميع عليها

    أنا شفت الموضوع اللى حضرتك تفضلت بكتابته ، و هو فعلا بوست جميل و به معانى رائعة، أحيى حضرتك عليه

    أشكرك على رأيك فى البوست و سعيدة بتفاعل حضرتك مع المدونة

    أتمنى لك كل التوفيق ، و جزاك الله خيرا

    ReplyDelete
  18. السلام عليكم ورحمه الله وبركاته
    فعلا بوست هايل جدا وعجبنى جدا تشبيهك لعدم المسامحه بانه حمل تقيل على الاكتاف الواحد ماشى بيه
    ولكن انتى قلتى برضوا حاجه ان رب العباد هو القادر على انصافنا
    فلو تعرضتى للظلم ووكلتى ربنا انه ياخدلك حقك سواء فى الدنيا او فى الاخره هل ده يتعارض مع مبدأ المسامحه الى انتى ذكرتيه
    وده مايمنعش برضوا ان الواحد استفاد من اخطاءة

    تحياتى لك

    ReplyDelete
  19. السلام عليكم
    الوضوع جميا دعوة للتسامح
    التسامح والحب كلها صفات جميلة جدا
    ولكن
    كما قلت لك يمكن اسامح انسان بعد فترة من الزمان مش موضوع قلب اسود لا علي ما النفس تصفي ما هو لازم النفس تصفي الاول عشان اسامح مش كده ولا ايه
    ده ميمنعش ان الموضوع جميل
    تحياتي

    ReplyDelete
  20. قلبى وفكرى معك
    تحياتى لنقلك لنا هذة الصورة
    سأصمت لأشكر بعلو صوت يدى أناملك

    تقبلى مرورى أيتها الفراشة
    :)
    ملكة بحجابى

    ReplyDelete
  21. "لا يجوز للمسلم ان يهجر اخه فوق ثلاث"
    او كما قال النبى
    فعلا اللى بيخاصم واحد بيضر نفسه اولا ولا يضر الاخر بقدر ما يضر نفسه
    احييكى على البوست
    جزاكم الله خيرا

    ReplyDelete
  22. اللهم بارك
    تدوينة ممتازة
    أنا كنت قرأت حكمة زمان بتقول:
    حينما تكره فأنت لا تؤذى إلا نفسك، فنصف الناس لا يعرفون أنك تكرههم، والنصف الآخر لا يكترثون لذلك

    ReplyDelete
  23. بوست تحفة يا دوك

    بجد
    كلام هايل وحقيقي
    وانابقول للناس
    ربنا ادانا نعمة هى التسامح
    نستخدمها وخلاص
    بمعنى اصح
    نفض لمضايقات الشخص اللى قدامك
    ومتشيلش فى قلبك
    الدنيا مش مستحملة

    وتسلم ايدكي ياد.نهى

    ReplyDelete
  24. كلامك كلة حقيقة جدا.. وانا مريت بالتجربة دى بعد عذاب سنين من احساس عدم المغفرة.. والسماح فعلا بيشيل هم كبير جداااا من على القلب.


    تحياتي لك على الموضوع الجميل دة

    ReplyDelete
  25. لا انا برضه مقصدش اننا نفتكر الدرس او ننساه
    انا اقصد اننا ننسي الي اتعمل فينا من شخص معين
    هو ده شرط اساسي عشان نسامح؟
    انا بجد بفكر في الموضوع ده و مش عارف

    ReplyDelete
  26. نهى طبعا انتى عارفة النهى يعنى ايه يعنى العقل
    وانتى بسم الله الرحمن الرحيم مخك تمام عقبال ما اشوف ولادى عندهم اتزان فى عقلهم كده زيك يارب وكلامهم درر
    شكرا بجد مفيش موضوع ليكى الا ويستحق منا كل تقدير دمتى اختى فى سعادة ورضا

    ReplyDelete
  27. على فكرة قد يظن البعض ان التسامح رفاهية قد لا نستطيع الحصول عليها
    ولكن التسامح بيخليك تبص لقدام وترمى الحمول من على كتافك زى ما قلتى
    ممكن يكون صاحب كان هو ليك الاهل اللى اخترتهم بنفسك لكن تثبت الايام غير كده
    هل معنى كده انك تبطل يكون ليك اصدقاء لا طبعا مينفعش
    لو حد قريبك عمل موقف مش تمام هتهجره لا برضه هتسامح بس تتعلم الدرس بجد كلامك صحيح وكتبتيه بشكل منطقى ومقنع ربنا يوفقك يارب

    ReplyDelete
  28. روح طفلة

    و عليكم السلام و رحمة الله و بركاته

    ربنا يكرمك على رأيك الجميل ده، أشكرك عليه

    و بالنسبة لسؤالك-و اسمحى لى أصيغه كما فهمت- إنه هل إنى آخذ حقى أو أطالب به يتعارض مع إنى أسامح؟؟

    خلينا نتفق الأول على تعريف التسامح اللى أقصده هنا، و هو -كما فى البوست- إن الأنسان مايكونش يحمل مشاعر ضغينة ضد الآخر و تكون مشاعره ناحيته عادية و يوصل كمان إنه يدعى له

    طيب بالنسبة بقى لأنى أسترد حقى ، هل أفرط فيه علشان أكون سامحت فعلا و اللا أطالب به؟؟

    نفترض مثلا قصة زى القصص اللى بنسمع عنها كل يوم فى الجرايد و المسلسلات، إن مثلا فيه ابن، بعد ما والده توفى و ساب له ميراث، جه العم و أخذ الميراث ده و مش عايز يعطي لابن أخيه حقه

    فاللى أقصده يحصل هنا هو إن الابن يطالب بحقه بما يرضى الله، و يأخذ بالأسباب كاملة علشان يسترد الحق ده، فإذا استرد حقه أو حتى ماقدرش يسترده، ففى الحالتين مهم جدا إنه يسامح و مايفضلش شايل مرارة عمه و اللى عمله فيه ، علشان ما يفضلش تعبان و شايله على كتفه

    و كده يبقى سعى لحقّه الشرعى و فى نفس الوقت هو بيسامح

    أما بقى لو تقصدى إن واحد يتنازل عن حقه، فده فى الحالة دى هيكون مش مفهوم التسامح، ده مفهوم العفو

    (العفو= تسامح + تنازل عن الحق)

    و مع ذلك مهم جداااااا إن الانسان يكون على درجة من الوعى و الحكمة علشان يقدر يفرق امتى لما يتنازل عن حقه هيكون ده عفو فعلا و امتى لما يتنازل عن حقه، فهيكون ده سلبية و خضوع و مساعدة للمفسد

    أتمنى أكون جاوبت على سؤالك، اللى حقيقى باشكرك عليه لأنك لفتى نظرى لنقطة مهمة

    جزاك الله خيرا، سعيدة بيكى و بوجودك

    يا رب دايما منورانى، تحياتى ليكى

    ReplyDelete
  29. ذكرى رحيل قلم

    و عليكم السلام و رحمة الله و بركاته

    أشكرك على رأيك فى الموضوع، ربنا يكرمك

    و موضوع القلب الأسود ده كنت قلته فى بداية البوست كمثال بس على الحوار اللى بيدور على طول هوّ هوّ فى الأفلام و المسلسلات
    :) :)

    إنما كلامك صحيح فعلا، الانسان بيحتاج لفترة على ما نفسيته تهدى و الفترة دى بتختلف حسب الموقف و حسب الشخص نفسه اللى عايز يسامح و حسب الشخص المطلوب مسامحته

    و كل ما تكون الفترة أقل كل ما الإنسان هيكون تعبه أقل

    أعاننا الله جميعا على التسامح

    جزاك الله خيرا ، ربنا يكرمك دايما و يكتب لك كل خير

    تحياتى ليكى

    ReplyDelete
  30. ملكة بحجابى

    شاعرتنا الجميلة

    بجد مش عارفة أقول إيه قصاد كلامك و تعبيراتك الرائعة -ما شاء الله عليكى- ربنا يكرمك دايما

    أشكرك جدا جدا على رأيك و كلامك الجميل ده

    و على فكرة أنا مش هتقبل مرورك ،..... أنا سعيدة جدا بمرورك

    :) :) :)

    جزاك الله خيرا، تمنياتى لك بكل التوفيق

    خالص تحياتى ليكى

    ReplyDelete
  31. مسدس صغير

    فعلا المشاعر السلبية زى الخصام و عدم التسامح بتإذى الانسان نفسه أولا قبل أى حد

    أشكر حضرتك على رأيك اللى بجد بيهمنى

    ربنا يعزك و يكرمك

    جزاك الله كل خير

    ReplyDelete
  32. مجرد مدونة

    حضرتك نورتنى فى أول زيارة لك للمدونة

    أشكرك على رأيك، ربنا يبارك فى حضرتك

    جميلة جدا جدا الحكمة اللى ذكرتها، عجبتنى قوى و أشكرك على إضافتها

    سعيدة بتشريف حضرتك و أتمنى دوام التواصل بإذن الله

    جزاك الله خيرا

    ReplyDelete
  33. Mo7ammed

    سعيدة برأيك جدا و الله ، ربنا يكرمك

    و فعلا معاك حق فى كلامك، استخدم نعمة التسامح و متشيلش فى قلبك،.... و فعلا الحياة أقصر و أصغر بكتييير من إننا نضيع وقت من عمرنا نكون شايلين فيه من حد

    الله يسلمك و يبارك فيك يا محمد

    جزاك الله خيرا ، منورنى

    ReplyDelete
  34. MaNoOoSh

    منورانى حقيقى فى أول زيارة ليكى للمدونة

    ربنا يشيل عنك الهم دايما و يكتب لك كل خير

    أشكرك جدا على رأيك اللى أسعدنى بجد و أتمنى دوام التواصل إن شاء الله

    جزاك الله خيرا

    ReplyDelete
  35. هندسة وصفية

    فهمت قصد حضرتك يا باشمهندس، و الإجابه إنه

    لا مش شرط إنك تنسى اللى اتعمل فيك، انت بتفتكر اللى حصل و مع ذلك و انت بتفتكر اللى حصل لازم و لابد تفتكر فى لحظتها الدرس اللى اتعلمته علشان ماتديش فرصة لمشاعر المرارة و عدم التسامح إنها تظهر على السطح تانى

    و لما تيجى تفكر فى موضوع التسامح كده، طب ما لو أنا نسيت اللى حصل يبقى بأسامح على إيه أساسا؟؟

    و التسامح الحقيقى بيبان لمّا بتفتكر الموقف اللى حصل و بتلاقى نفسك مسامح و مافيش مشاعر ضغينة من الشخص

    تعرف حضرتك، ..فيه موقف كده سؤالك فكرنى بيه و حبيت إنى أقوله إذا سمحت لى
    .....
    كان مرة فيه عالم أثرى اسمه أ/بسام الشماع
    و كان بيحكى عن إنه كان المرشد السياحى لممثلة إنجليزية شهيرة و هى (جوليا أورموند) و إنها سألته هل المصريين عندهم مشاعر ضغينة ضد الشعب الإنجليزى؟؟ فهو استغرب و أجابها بالنفى، فقالت إنها بتسأل علشان خاطر بريطانيا كانت محتلة مصر فترة طويلة ، فخافت ليكون المصريين لسه بيكرهوا الإنجليز
    !!!!!!

    الحقيقة أنا لما سمعت الموقف ده قعدت أفكر فيه كتير قوى، و اربطه بمفهوم التسامح ، إنه فعلا أحنا كلنا فاكرين كويس إن بريطانيا احتلت مصر فوق ال70 سنة و فاكرين كويس كل الانتهاكات اللى كانت بتحصل و لكن مع ذلك.... صعب جدااااااا إنك تلاقى حد لسه عنده مشاعر ضغينة ضد الإنجليز بسبب كده

    و فعلا مفهوم التسامح فيه المعنى ده ، إن الانسان فاكر و عارف اللى قدامه عمل فيه إيه و مع ذلك هو لا يحمل له مشاعر ضغينة

    أتمنى حقيقى إنى أكون أفدتك و لو بنسبة بسيطة و اتمنى أعرف رأيك فى الكلام ده

    سعيدة بتواصل حضرتك و إيجابيتك

    تحياتى لك، جزاك الله خيرا

    ReplyDelete
  36. مامة مازن

    يا أهلا يا أهلا بأطيب قلب، ربنا يكرمك و يبارك فيكى
    و يا رب أكون فعلا اسم على مسمى زى ما بتقولى ،و ربنا يجعلنى خير مما يظنون و يغفر لى ما لا يعلمون

    و إن شاء الله تشوفى أولادك أحسن منى و تشوفيهم فى أحسن حال و يكونوا صالحين مصلحين

    أشكرك بجد يا أختى مامة مازن على كلامك اللى ماتتصوريش أسعدنى قد إيه

    ربنا يعزك و يكرمك و يوفقك دايما

    جزاك الله خيرا

    ReplyDelete
  37. مامة مازن

    فعلا نسامح و نتعلم الدرس، ربنا يكرمك ،و أشكرك على إضافتك الجميلة و على دعائك الصادق

    ربنا يتقبل دعائك و لك مثله إن شاء الله

    جزاك الله خيرا

    ReplyDelete
  38. طرح الموضوع جميل
    رغم ان التسامح نفسه مش بسهولة كده
    فلا ننتظر من شخص مجروح ان يسامح
    وفيه حاجة احب اضيفها وهتكلم فيها عن نفسى
    ممكن ماسامحش الشخص اللى قدامى وفى نفس الوقت اسقطه من حساباتى ومايهمنيش مشاعره هو ايه لانى بكل بساطة مش مسمحاه قدام ربنا وربنا هو اللى هيقتص لى منه

    ReplyDelete
  39. الابنة العزيزة الدكتورة نهى
    واسمحى لى ان اقول الابنة واعتز بذلك
    التسامح ياابنتى باب من ابواب الجنة
    وجميل ان نختم يومنا ونحن نضع رؤسنا على المخدة ان نقول انى فى حل لكل من اذانى او تلفظ فى حقى
    وحل هنا بمعنى المسامحة
    وهذا والله يصفى القلب وينزع مابه من حقد او ضغينة
    وهذا هو قلب المؤمن ولنتعاهد جميعا ان نصفح الصفح الجميل وهو الصفح بدون عتاب اوتقليب قد يسبب تجديد المشكلة من جديد
    جعله الله فى ميزان حسناتك ودمتى بخير

    ReplyDelete
  40. معبر ودود25/5/09 7:37 am

    ماشاء الله بوست اكتر من رائع بس بصراحة انتي جيتي ع الجرح .. فياريت تقوليلي لو حد عمل حاجة جامدة أوييي ضايقتني وهو عارف كدة وفي نفس الوقت ماحاولش يعتذر بس زي ماتقولي كدة حاسس بعملته ودة بيبان في طريقة التعامل المفروض الواحد يتعامل ازاي معاه ؟؟؟ عادي جدا كأن شيئا لم يكن ؟؟ ولو تجنبت التعامل معاه أو بمعني تاني التعامل علي مستوي صباح الخير صباح النور يبقي كدة صح ولا غلط؟؟؟ ولا كدة دليل علي عدم التسامح؟؟
    جزاكي الله خيرا

    ReplyDelete
  41. قربنا
    بس انتب وسعتي المفهوم
    احنا عموما و الحمد لله عندنا وعي يخلينا نفرق بين الحكومات و الاشخاص
    يعني مثلا مفيش مصري بيكره اي امريكي لمجرد انه امريكي
    بس بنكره حكومتهم اكيد
    كمان اغلبيتنا نعاصرش الاحتلال البريطاني لكن مثلا الفرق اننا عاصرنا الاحتلال الصهيوني سواء لينا او للفلسطينيين او البنان و سوريا
    و يمكن ده سبب ان كلنا اول مبنسمع ان حد يهودي حتي مش شرط صهيوني بنكرهه
    علي المستوي الشخصي و بعد تفكير صعب اننا ننسي الاساءة
    و ده مش ضد التسامح اطلاقا
    بالعكس احنا مش لازم ننسي عشان نبقي اقوي

    ReplyDelete
  42. ليس لكل الناس القدره غلى التسامح
    وايضا
    ليس كل الناس تستحق ان نسامحها
    والمهم هو حسن اختيار الاشخاص

    ReplyDelete
  43. الحمدلله رب العالميـن
    عندي قدرة رهيبـــة على التسامح
    والتصالح مع النفس
    والله نعمة من ربنا عليا
    بشكرك يا دكتورة : )

    ReplyDelete
  44. السلام عليكم و رحمة الله و بركاته

    د. نهى
    داحنا زمايل اهو
    والله شئ كويس
    :)

    باشكرك جدا على زيارتك
    و يارب مش تكون الاخيرة

    موضوعك عن التسامح رائع جدا
    و باتفق معاكى فيه


    للاسف الناس مش بتسامح لأنها فاكرة انها لو سامحت يبئا كدا هى اتنازلت عن حقها
    و خلاص كدا ربنا هيسامح الشخص اللى غلط فى حقه
    وهو كدا طلع من المولد بلا حمص

    فهو بيفضل يهرى فى نفسه
    و فاكر ان كل ما الحقد جواه يكبر
    كل ما ربنا ينتقم من الشخص اللى ظلمه أكتر

    و دا غلط و أكبر غلط

    ربنا من رحمته بينا قالنا سامحوا
    عشان مفيش حاجة تعكر صفو فطرتكم و نفسيتكم
    و تعيشوا اناس اسوياء

    و اللى ظلموا .. انا الحكم العدل
    فآخد لكم حقكم منه
    فى الوقت المناسب

    و حقكم مارحش و لا حاجة



    لكن للاسف الناس مش عارفة دا





    تحياتى ليكى يا جميلة

    ReplyDelete
  45. البوست جميل جدا
    و فعلا قريته فى وقته
    كان فى واحد مكنتش ناوى ابدا اسامحه
    بس خلاص مسامح

    ReplyDelete
  46. ايه يادكتورة نهى

    مش ناوية تنزلى بوست جديد ولا ايه بس

    طب حتى شجعينى

    ^_^

    ReplyDelete
  47. موناليزا

    أشكرك على رأيك يا موناليزا :)

    و التسامح و مدى سهولته بتختلف من واحد للتانى، و بالنسبة للشخص المجروح، فكما كنت باوضح فى البوست إن لو ماسمحش فهو اللى بيتعب، النقطة دى مهمة جدا جدا جدا جداااااا يا موناليزا، يعنى و هو فعلا مجروح و خصوصا لو الجرح لسه جديد، فأكيد و طبيعى هياخد فترة فى الأول هيكون فيها تعبان ، لكن بعد كده لازم يقف على رجليه و أول حاجة هيخدم و يساعد بيها نفسه إنه يسامح ، فالتسامح ده مش جِميل هو بيقدمه لغيره، لأ..ده هدية بيعطيها لنفسه

    و بالنسبة للنقطة اللى ذكرتيها، و هى
    "ممكن ماسامحش الشخص اللى قدامى وفى نفس الوقت اسقطه من حساباتى ومايهمنيش مشاعره هو ايه لانى بكل بساطة مش مسمحاه قدام ربنا وربنا هو اللى هيقتص لى منه"

    فالنقطة دى كنت اتكلمت عنها لما أجبت على (روح طفلة) فهاكتبها هنا تانى، بدل ما تدورى عليها
    :) :)

    و أقصد بها إن مش معنى التسامح إن الإنسان يفرط فى حقه
    ـــــــــ
    خلينا نتفق الأول على تعريف التسامح اللى أقصده هنا، و هو -كما فى البوست- إن الأنسان مايكونش يحمل مشاعر ضغينة ضد الآخر و تكون مشاعره ناحيته عادية وممكن يوصل كمان إنه يدعى له

    طيب بالنسبة بقى لأنى أسترد حقى ، هل أفرط فيه علشان أكون سامحت فعلا و اللا أطالب به؟؟

    نفترض مثلا قصة زى القصص اللى بنسمع عنها كل يوم فى الجرايد و المسلسلات، إن مثلا فيه ابن، بعد ما والده توفى و ساب له ميراث، جه العم و أخذ الميراث ده و مش عايز يعطي لابن أخيه حقه

    فاللى أقصده يحصل هنا هو إن الابن يطالب بحقه بما يرضى الله، و يأخذ بالأسباب كاملة علشان يسترد الحق ده، فإذا استرد حقه أو حتى ماقدرش يسترده، ففى الحالتين مهم جدا إنه يسامح و مايفضلش شايل مرارة عمه و اللى عمله فيه ، علشان ما يفضلش تعبان و شايله على كتفه

    و كده يبقى سعى لحقّه الشرعى و فى نفس الوقت هو بيسامح

    أما بقى لو تقصدى إن واحد يتنازل عن حقه، فده فى الحالة دى هيكون مش مفهوم التسامح، ده مفهوم العفو

    (العفو= تسامح + تنازل عن الحق)

    و مع ذلك مهم جداااااا إن الانسان يكون على درجة من الوعى و الحكمة علشان يقدر يفرق امتى لما يتنازل عن حقه هيكون ده عفو فعلا و امتى لما يتنازل عن حقه، فهيكون ده سلبية و خضوع و مساعدة للمفسد
    ـــــــــــــ

    ده كان الكلام اللى كنت ذكرته فى تعليق قبل كده، و بعدين طالما احنا عندنا ثقة و الحمد لله فى عدل ربنا و انه هيقتص للمظلوم ، يبقى خلاص، مافيش داعى إن الإنسان يشيل فى نفسه و يشيل حمل عدم التسامح، و زى ما الناس الكبار بيقولو
    "ارمى تكالك على الله"

    و زى ما أنت قلتى ،اسقطى الشخص من حساباتك و ثقى إن ربنا سبحانه و تعالى بيجازى المخطىء و هو يمهل و لا يهمل، و فى نفس الوقت..........سامحى

    سعيدة جدا بتفاعلك، ودايما يا رب نتواصل

    ربنا يعزك و يكرمك، جزاك الله خيرا

    ReplyDelete
  48. psudo-analytical30/5/09 3:09 am

    begad el tasamoh ne3ma we fadel bass mesh kol el nass betkedar 3lyeh we fee hagat mehetaga wakt bas el hamd llah en elwahed beyfawt llnas men mabdaa en el nass aked be tfawtly galataty
    zay ma entey hatfawteylly eny bakteb francoarab 3lashan de 3altet el computer mosh galtety salam ya frashaaaaaaaa

    ReplyDelete
  49. أم مالك

    حضرتك منورانى فى أول زيارة
    و كون إن حضرتك تقولى لى الابنة فدى حاجة أعتز بها جدا جدا و تسعدنى جدا ، ربنا يكرمك حضرتك

    كلام حضرتك رائع ، و ندعو الله أن يعيننا و يعين الجميع على التسامح

    جزاك الله خيرا، و أتشرف بدوام التواصل مع حضرتك بإذن الله

    ReplyDelete
  50. معبر ودود

    سعيدة جدا إن البوست عجبك و أشكرك على رأيك و كلامك الجميل

    و بالنسبة لسؤالك، هو فيه نقطتين
    أولا: التسامح كإحساس ،هل انت لما بتفكرى فى الشخص ده بتحسى إن نفسك تنتقمى منه؟؟أو بتحسى مرارة كل ما تفتكرى الشخص؟؟

    لو لأ، يبقى بإذن الله تكونى سامحتى

    ثانيا: التسامح كسلوك، فهنا بقى ، لو الشخص ده إنسان كويس جدا و لكن فيه عيوب معينة و لكنها عيوب مش جوهرية بالنسبة لك، فتعاملى عادى و فقط تجنبى العيوب دى، علشان ميحصلش بسببها ضيق تانى، زى المثال اللى كنت ذكرته فى البوست

    أما بقى لو العيوب دى جوهرية جدا ، فلابد الانسان يحاذر فى التعامل
    و سيدنا عمر بن الخطاب كان له مقولة وهى" لست بالخِبّ و لكن الخب لا يخدعنى" و معناها إنه بيقول أنا مش خبيث و لئيم و لكن الخبيث و اللئيم ما يقدرش يخدعنى

    و برضه حديث الرسول صلى الله عليه و سلم" المؤمن كيّس فطن" صدق رسول الله صلى الله عليه و سلم

    و الحقيقة إن الناس فى رأيى بيكونو عاملين زى الطرق، فيه طريق كل ما تدخلى فيه تكتشفى روعته أكتر، و فيه طريق تانى بيكون كويس لغاية ما توصلى للمنتصف و بعدين تلاقى الطريق بالتدريج عمّال بيضلّم و يزداد سوءا ،و فى طريق يستحسن إنك متعديش من جنبه أصلا

    فلمّا تلاقى شخص من نوعيه أول طريق، فدول الناس اللى يتحافظ عليهم فعلا، و لو شخص من نوعية تانى طريق ، يبقى اتعاملى لحدود و متتعمقيش أكثر من اللازم، أما بقى لو من نوعية تالت طريق ، يبقى تجنبى التعامل من أصله، و لو لازم و لابد التعامل يبقى على قد صباح الخير صباح النور زى ما قلتى

    أتمنى أكون أفدتك

    بجد منورانى يا صديقتى، ربنا يخليكى

    جزاك الله خيرا

    ReplyDelete
  51. هندسة وصفية

    أشكرك على تفاعلك
    و حقيقى التجارب اللى بتحصل للإنسان لازم يفتكرها و يتعلم منها علشان يكون أقوى

    جزاك الله خيرا

    ReplyDelete
  52. أعقل مجنونة

    منورانى فى أول زيارة لك للمدونة، اسمك جميل قوى على فكرة
    أشكرك على رأيك ، و أتمنى دوام التواصل بإذن الله

    تحياتى

    ReplyDelete
  53. Ramy Wasel

    سعيدة بزيارة حضرتك الأولى للمدونة و أتمنى دوام التواصل بإذن الله

    و هو فعلا مش كل الناس بتقدر تسامح، معاك حق فى النقطة دى، و مع ذلك ، الفكرة اللى حضرتك ذكرتها و هى" إن ليس كل الناس تستحق أن نسامحها" فهى هل التسامح ده هدية انا بأقدمها لهم، فيه منهم ناس يستحقوها و ناس لأ؟؟ و اللا التسامح ده فى الأول و فى الآخر بيأثر على الشخص نفسه؟؟

    تعمّق حضرتك فى الفكرة دى كده، و شوف....، و زى ما كنت باشرح فى البوست إن ممكن التانى ده الموضوع مايكونش فارق معاه خااااالص ، فيبقى مين اللى تعبان هنا؟؟؟

    فالسؤال هنا فى رأيى ، هل أنا أستحق أن أهدى لنفسى نعمة التسامح أم لا؟؟

    و إذا حضرتك تقصد هنا إن مش كل الناس تستحق أن الواحد يتنازل عن حقه من أجلهم فدى نقطة مختلفة تماااااما ،كنت قلتها فى تعليق قبل كده، فهذكرها هنا لحضرتك

    ـــــــــ
    خلينا نتفق الأول على تعريف التسامح اللى أقصده هنا، و هو -كما فى البوست- إن الأنسان مايكونش يحمل مشاعر ضغينة ضد الآخر و تكون مشاعره ناحيته عادية وممكن يوصل كمان إنه يدعى له

    طيب بالنسبة بقى لأنى أسترد حقى ، هل أفرط فيه علشان أكون سامحت فعلا و اللا أطالب به؟؟

    نفترض مثلا قصة زى القصص اللى بنسمع عنها كل يوم فى الجرايد و المسلسلات، إن مثلا فيه ابن، بعد ما والده توفى و ساب له ميراث، جه العم و أخذ الميراث ده و مش عايز يعطي لابن أخيه حقه

    فاللى أقصده يحصل هنا هو إن الابن يطالب بحقه بما يرضى الله، و يأخذ بالأسباب كاملة علشان يسترد الحق ده، فإذا استرد حقه أو حتى ماقدرش يسترده، ففى الحالتين مهم جدا إنه يسامح و مايفضلش شايل مرارة عمه و اللى عمله فيه ، علشان ما يفضلش تعبان و شايله على كتفه

    و كده يبقى سعى لحقّه الشرعى و فى نفس الوقت هو بيسامح

    أما بقى لو تقصدى إن واحد يتنازل عن حقه، فده فى الحالة دى هيكون مش مفهوم التسامح، ده مفهوم العفو

    (العفو= تسامح + تنازل عن الحق)

    و مع ذلك مهم جداااااا إن الانسان يكون على درجة من الوعى و الحكمة علشان يقدر يفرق امتى لما يتنازل عن حقه هيكون ده عفو فعلا و امتى لما يتنازل عن حقه، فهيكون ده سلبية و خضوع و مساعدة للمفسد
    ـــــــــــــ
    أتمنى أكون أفدت حضرتك

    سعيدة بتواصل حضرتك جدا، و أشكرك على تفاعلك

    جزاك الله خيرا

    ReplyDelete
  54. زقطوطة

    منورااااانى يا زقطوطة بعد غياب
    :) :)
    و ما شاء الله، ربنا يجعلك دائما من المتسامحين و المتصالحين مع أنفسهم و يديم عليكى نعمته

    أسعدتينى بتعليقك و تواجدك الجميل ، ربنا يكرمك
    يا أجمل زقطوطة ،و يارب تكونى دائما مزقططة
    :)
    جزاك الله خيرا

    ReplyDelete
  55. Soul.oOo.Whisper

    و عليكم السلام و رحمة الله و بركاته

    أسعدتينى جدا بزيارتك الأول للمدونة

    و زمايل مهنة طبعا:) ، ده أنا اكتشفت التدوين ملياااان صيادلة ما شاء الله، ربنا يزيد و يبارك، ده أنا باشك إن شوية شوية هيبقى فيه لجنة الصيادلة البلوجرية فى النقابة
    :) :)

    و مدونتك و كلامك ماشاء الله جميل و يستحق المتابعة،و على فكرة اسمك جميييل جدا و معناه حلو قوى، و لفت نظرى فعلا

    أشكرك جدا على رأيك فى الموضوع و على تشجيعك

    و كلامك ممتاز و فى محله تماما و أتفق معاكى جداااا فى الكلام ده

    أتمنى دوام التواصل بإذن الله

    جزاك الله خيرا،و أتمنى لك التوفيق

    ReplyDelete
  56. د.بسيونى

    أهلا و سهلا بحضرتك فى أول زيارة للمدونة

    أشكر حضرتك جدا جدا على رأيك و كلام حضرتك

    انطباعك أسعدنى جدا و حسسنى إن هدفى من البوس اتحقق و الحمد لله

    ربنا ينعم علينا دايما بنعمة التسامح

    أشكرك و أتمنى دوام التواصل بإذن الله

    جزاك الله خيرا

    ReplyDelete
  57. Mo7ammed

    أشكرك و الله على اهتمامك و متابعتك

    و جارى التجهيز للبوست الجديد إن شاء الله
    :)
    دعواتك

    ربنا يوفقك دايما، جزاك الله خيرا

    ReplyDelete
  58. Psudo-analytical

    :) :) :)

    على فكرة أنا كنت هارد عليكى بفرانكوأراب برده، و بعدين قلت بلاااااش، الطيب أحسن
    :) :)

    مبسوطة و الله إنك نورتينى يا صديقتى، و مبسوطة برأيك، و فعلا التسامح ده نعمة، ربنا ينعم علينا كلنا بيها
    ـــــــ
    تصدقى إنك ساعة ما قلتى
    bas el hamd llah en elwahed beyfawt llnas men mabdaa en el nass aked be tfawtly galataty

    ساعتها وقفت القراءة و قلت أييييوة بتلمحى علشان أمشّى موضوع الفرانكوأراب ده، و بعدين اتفاجئت بكتابتك

    zay ma entey hatfawteylly eny bakteb francoarab

    :) :) :) ، و الله ضحكتينى من قلبى
    :) :)

    عالعموم، خلااااص هافوّتها المرررة دى، بس اعملى حسابك المرة الجاية لا يمكن تفوت أبداااا

    :) :) :)

    أشكرك يا صديقتى على تشجيعك و مشاركتك

    Allah ysallemek ya presenttttttttt
    :) :)

    ReplyDelete
  59. اول زيارة قادم من مطار الفيس بوك لاحلى مطار
    فعلا الكلمة ممكن تغير مسار
    لك احتراماتى

    ReplyDelete
  60. الله عليكي بجد

    بوست أكتر من راااائع

    محتاجينا فعلا لانه حقيقي جدا ساعات الانسان هو ال بيتعب نفسه بنفسه

    لما بيفضل مش عاوز يسامح ويمكن يكون حتي مش مسامح نفسه

    ف الوقت ال بيبقي فيه الطرف التاني ولاهو هنا عايش الحياة

    وبلوبيف بلوبيف هههههههه قلبت لمباوي ^^

    جزاك الله خيرر بجد

    تسلم ايدي ع المبدعة كالعادة

    دمتي بألف خيررر

    ReplyDelete
  61. فراشتي الجميلة ...

    وحشتينا ... يلا بقي بوست جديد ...

    تحياتي

    ReplyDelete
  62. علي فكرة أنا نسيت أقوللك ... المبدأ ده لو حد طبقه هيبقي سعيد جداااااا

    أنا بحاول أطبقه .. وجربت بالفعل والله كأني باتعالج بالأدوية ...

    بجد تأثير فراشة جبااااار

    شكرا ليكي

    ReplyDelete
  63. محمد هاشم

    يا أهلا و سهلا بجيراننا الطيبين، شعب السودان الأصيل

    حضرتك شرفتنى فى أول زيارة للمدونة، و أشكر حضرتك جدا على كلماتك الرائعة، و أهلا و سهلا بحضرتك فى مطارنا المتواضع

    تحياتى و احتراماتى لحضرتك، و أتمنى دوام التواصل إن شاء الله

    جزاك الله خيرا

    ReplyDelete
  64. قلب أرهقته الأحلام

    غادة، :) :) نورتى المدونة يا جميلة

    ربنا يكرمك، أشكرك حبيبتى على كلامك الجميل ده

    و فعلا معاكى حق فى كلامك، و عجبنى قوى إنك قولتى
    -ويمكن يكون حتي مش مسامح نفسه-
    لأن فعلا، ناس كتيير مش بتقدر تسامح غيرها لأنها أصلا مش مسامحة نفسها

    شكرا ليكى، و جزانا و إياكم يا جميلة
    :) :)
    ربنا يبارك فيكى، و أتمنى أن تذكرينى من صالح دعائك

    جزاك الله خيرا

    ReplyDelete
  65. mimi

    ميمى حبيبتى :) شكرا ليكى و الله على اهتمامك و تشجيعك الجميل

    البوست الجديد لسسسسه نازل طازة، و بنار الفرن
    :) :)

    يا رب يعجبك

    ReplyDelete
  66. mimi

    بجد ما تتصوريش كلامك ده بيسعدنى و يشجعنى قد إيه ، لما أعرف إن الكلام اللى فى المدونة، ربنا جعله سبب فى إنه - و لو بنسبة بسيطة- يعمل تأثير إيجابى

    و سعيدة جدا جدا بيكى ، ربنا يوفقك دايما يا رب

    جزاك الله خيرا يا أحلى ميمى، و أتمنى ان تتذكينى فى صالح دعائك

    ReplyDelete
  67. السلام عليكم ورحمة الله وبركاته
    من فتره كبيره أوييييييييييي مادخلتش وبحد كنت حاسه إني مفتقده حاجه
    وبجد وحشني جدااااااااااااا كلام حضرتك الأكثر من الراااااااااااااائع دكتوره نهى
    والبوست ده بجد جميل جداااااااااااا ومهم أويييييييييي إننا نقراه كويس ونفهم كل كلمه فيه
    ولو تسمحيلي أقول رأيي

    احساس صعب جدا تحمله


    وما اصعبها من حياة عندما يخون ويغدر بك أقرب الناس إاليك . قد يكون أخ .. صديق.. حبيب..او من الأهل

    هي حقا تكون صدمة كبيرة بعد ان تكون وهبته كل تقتك وحياتك و كنت دائما في جانبه في اصعب اللحظات

    مؤلمة جدا تلك الاحاسيس حتى الموت عندما يكون الطعن في الظهر مؤلمة حتى القسوة عندما


    يخونك أقرب الناس وعندما تجد اسرارك التي قد امنتها عندة قد انتشرت بين الاخرين



    منذ ان ولدنا ونحن نسمع بصداقة والحب والاحترام ويا لها من كلمات

    ساحرة تدهش سامعيها لكن




    ومع كل الاسف كلة حلم صعب المنال وما تلبث الا ونحن نصحو على طعنات غدر


    حقيرة او كذبة تذهب مع ادراج الرياح

    ولكن 00000000000000
    زي ما حضرتك قولتي
    أنا لما هشرب السم مين إللي هيموت؟؟؟؟؟؟؟؟؟؟؟
    ده الأساس

    فحدوث إساءه أو أذيه متكرره ولاسيما من أشخاص لهم مكانة خاصّة عندنا، تسبّب لنا جروح داخليّة عميقة إذا لم نعرف أن نتعامل معها بطريقة صحيحة وتركناها في الداخل. فهذه الجروح ستولِّد لدينا مشاعر مرارة، التي تؤدّي إلى نتائج صعبة وخطيرة، وقد تقود إلى تدمير حياة الإنسان تماماً.

    بس في حاجه مهمه أوي لو أنا سامحت الشخص ده على إللي عمله

    هو هيقدر يسامح نفسه؟؟؟؟؟؟؟؟؟؟؟
    هيقدر يمنع ضميره من جوه إنه يلومه؟؟؟؟؟؟؟؟؟؟؟
    وتأنيب النفس للنفس أشد مراره من تأنيب الغير

    وبجد آسفه جدااااااااااا على الإطاله وإن كنت خرجت عن إطار البوست

    إلى لقاء قريب بإذن الله

    ReplyDelete
  68. فينك يادكتور وحشانا جدا

    يارب ترجعى تكتبى تانى عن قريب

    ReplyDelete
  69. يا جماعه أي حد يعرف أخبار دكتوره نهى يقولنا
    أنا والله بجد وحشاني جداااااااااااا وقلقانه عليها
    ياريت حد يطمنا

    ReplyDelete
  70. Eman Ayman
    ==========
    و عليكم السلام و رحمة الله و بركاته

    وحشتينى جدا جدا جدا يا إيمان، يارب تكونى بكل خير و تكونى اتوفقت فى الامتحانات

    أشكرك على رأيك الجميل

    و تعقيبك بجد أكتر من راااائع، ربنا يبارك فيكى

    و ما تتأسفيش خااااالص ، كلامك كله فى المضمون، و لو عايزة برة المضمون كمان..البيت بيتك، قولى براحتك
    :) :)
    حقيقى فرحت جدا جدا بتعليقك، و يارب دايما منورانى

    ReplyDelete
  71. Mo7ammed
    ========

    ربنا يكرمك، شكرا لسؤالك، و بإذن الله راجعة قريب

    لا تنسانى من صالح دعائك

    جزاك الله خيرا

    ReplyDelete
  72. Eman Ayman
    ==========
    أشكرك يا حبيبتى على سؤالك، ربنا يكرمك

    أنا كنت منقطعة بقالى فترة كبيرة، و يعز على قلقك قوى، بس بجد كان غصب عنى جدااا، و يا دوب بدأت أرجع تانى

    إنت بجد اللى وحشانى جدا جدا جدا و بإذن الله نرجع نتواصل مرة أخرى

    أشكرك حقيقى على سؤالك و اهتمامك
    جزاك الله كل خير

    ReplyDelete