![](https://blogger.googleusercontent.com/img/b/R29vZ2xl/AVvXsEiU2-a6lfBH3CAqB2dimf0lcDR6c0piLV7FJO1lHBXwaDhpm6Czk0BHq_r8bL_9b5Q5AdadbFeiYdYFri1ghdGPIqr2Wzdgs9WBwG1imFLNR7JaPjaJ8qlMNf6D7RjNZWXLEyBcPqVGF7Q/s320/image006.gif)
!!!!!!!!!!!!!!!!
فقد قال الله تعالى فى كتابه الكريم " و لقدْ مَكّناكُم فِى الأَرضٍ و جَعَلنا لَكُم فِيهَا مَعايِشَ قَلِيلاً ما تَشْكُرُون* و لَقَد خَلقْنَاكُم ثُم صَوّرنَاكُم ثُم قُلنا لِلمَلائكَةِ اسجُدوا لأدَمَ فَسَجَدوا إلا إبليسَ لم يكُن مِنَ السَاجِدين" صدق الله العظيم (سورة الأعراف- آية 10، 11)
شوف تكريم ربنا سبحانه و تعالى لك ، و شوف قوله تعالى ( قليلا ما تشكرون)، فاستشعر عظمة هذا التكريم و كن أنت من الشاكرين ، وكن فى حالة امتنان لنعم الله عليك، و استشعر مسؤليتك تجاه النعم دى و تجاه دورك فى الحياة كإنسان ، وعندها هتشعر بسعادة و راحة نفسية و هتقدر تفيد من حولك و تنجز وتشعر بسعادة الإنجاز، مهما كان الأنجاز ده صغير فى مظهره، طالما إنه شىء حلال
و يوجد الموقف المعروف فى مجال التنمية البشرية عن عاملىّ بناء مشتركين فى بناء نفس المبنى ، و عندما تم توجيه سؤال لأحد العاملين عن طبيعة عمله ، فأجاب بممل إنه لا يفعل شىء سوى وضع و ترتيب بعض الطوب و الأعمدة . و عندما تم توجيه نفس السؤال للعامل آخر، كانت الإجابة مختلفة تماما ، لإنه أجاب باعتزاز وفرحة بإنه بيقوم ببناء صرح عملاق ....... هل لاحظت الفرق؟ كلاهما كان بيعمل نفس العمل و لكن رؤية كل واحد منهما لما يفعله و تقديره لهذا العمل مختلفة ، ليه؟؟؟ لإن الرؤية دى نابعة من تقدير كل واحد لقيمة نفسه ، و بالتالى قيمة اللى نَفسُه دى بتعمله.
وعندما سُإلت سيدة ألمانية عن وظيفتها ، فأجابت بأنها مدرسة رياض أطفال ، و لكن الطريقة السعيدة و الفخورة اللى أجابت بها جعلت السائل يسألها " إنت بتحبى شغلك قوى كده؟" ، فأجابت بكل اعتزاز : " طبعا، أنا بابنى ألمانيا المستقبل" ،
يااااااه ، انظر لرؤيتها لنفسها إنها إنسانة مؤثرة وإن لها بصمتها و أهميتها فى المجتمع ، جعلها تنظر لعمق ما تفعله ، و تقدّر ده بشدة و تدرك إن مستقبل بلدها بيعتمد عليها و على معاملتها لهؤلاء الأطفال. لك إنك تتخيل الفرق بين مدرّسة بتقدر قيمة نفسها و بتنظر لما تفعله على إنها بتبنى مستقبل بلادها ، و أخرى لا تقدر قيمة نفسها و صورتها عن نفسها سلبية و سيئة فبتنظر لعملها على إنها مجرد بتروح المدرسة تدى كام حصة و خلاص،.... و ابدأ بقى تصور و تخيل الصورتين فى كل المهن و كل الفئات، و شوف الفرق
تفتكر مين اللى هينجح أكثر ، مين اللى هيكون أسعد ؟ مين اللى هيؤثر بشكل إيجابى فى من حوله أكثر؟؟؟
أكيد انت عرفت الإجابة، أكيد الشخص اللى مقدر نفسه تقدير إيجابى سليم ، ...و علشان كده هتجد إن تقدير الذات الصحى الإيجابى بعييييييد كل البعد عن فكرة الأنانية و التمحور حول الذات ، ده العكس هو الصحيح ؛ فكل من يقدّر نفسه ، سيقدّر ما يفعله و يرى عمق تأثيره ، و سيجتهد للنجاح ولإفادة الآخرين ، و هيتقن فى عمله لأن عمله الجيد هيكون انعكاس لذاته الجيدة.
و سبحان الله ، من المنظور الإيمانى هنجد إن الإسلام حث على إن كل حاجة نعملها ناخد فيها نية كبيرة لله –سبحانه و تعالى – ، و على قدر كبر النية و على قدر التفكير فى معانى أعمق و تأثير أوسع لما تفعله، كلما كبر ثوابك بسبب كبر نيتك،... و من منظور التنمية البشرية ، هنجد تأثير ده ، إن كلما كان تفكيرك فى معانى أكبر و أعمق لما تفعله ، كلما زاد تقديرك لنفسك و ثقتك فى نفسك و زاد إتقانك لعملك و إفادتك لمن حولك و زاد إنجازك فى الحياة، و الإنجاز ده يعتبر من أكبر القوى المحفزة ، و من أقوى الحاجات اللى بتقضى على الإحباط ، و من أكثر المشاعر التى تبعث على السعادة و الرضا و الثقة بالنفس.
و إذا كان سبق لك محاولات غير ناجحة أو سبق لك أن فعلت أشياء تتضايق أو تخجل منها ، فأنت قادر إنك تغير ده حالا و تقرر من الآن فصاعدا إنك ستتخلى عن أنانية التفكير السىء فى الذات، و هتشجع نفسك ، فممكن الإنسان يتضايق عندما لا يجد تشجيعا من الآخرين و لكن لازم ياخد باله علشان لا يكون هو نفسه واحد من الآخرين دول اللى مش بيشجعوه ،.. و مهما حصل تقدر تقرر إنك تقدر قيمة نفسك و قيمة ما تفعله ، يعنى أى حاجة سيئة هتكون عملتها ،مش هتكون أكثر من ديناميت (ألفريد نوبل)
!!!!!!!!!!!!!!!!
فالعالم الشهير (ألفريد نوبل) مخترع الديناميت ، فى الأصل فكّر فى اختراع الديناميت لتسهيل حفر المناجم ، و لكن اللى لم يكن فى حسبانه إن الديناميت هيستخدم كسلاح فى الحروب و هيستخدم لقتل الآلاف من الناس.
تصور كده فكرة إن واحد ينظر لنفسه كل يوم و يتخيل إنه سبب فى مرض و تشريد و قتل الآلاف من الرجال و النساء والأطفال،.... لدرجة إن إحدى الصحف الفرنسية لقبته بـ ( تاجر الموت) و بأنه ( الشخص الذى أصبح ثريا عن طريق إيجاد أسرع الطرق لقتل الآخرين) ،............ و مع إن استخدام اختراعه استخداما خاطئا ، لم يكن خطؤه هو أو ذنبه هو ، و لكنه شعر بالندم و الضيق الشديد لذلك . كان من الممكن جدا إنه يفكر فى نفسه على إنه إنسان سىء و عالِم مدمر أدى إلى دمار العالم بدلا من إفادته ، و كان ممكن جدا يستسلم للفكرة دى و يدخل فى دوامة الإحباط و هدم و تدمير الذات بالمزيد و المزيد من الأفكار السلبية، لكن هو لم يفعل ذلك ، و لإنه مقدر نفسه صح و عنده صورة إيجابية عن ذاته ، رفض و تمرد على فكرة إن دى تكون آخر حاجة يسيبها للبشرية ، و لا يمكن إن اسمه يقترن بالخراب و الدمار، و علشان كده ، لم يستسلم و قرر يعمل عمل مفيد و سخر ثروته الكبيرة لعمل جائزة (نوبل)؛ ليتم منحها للذين أثروا فى حياة البشر بشكل إيجابى و لتشجيع العلماء من جميع أنحاء العالم على نفع البشرية.
و من خلال تقديره الإيجابى لذاته استطاع إنه يعبّر عن معدنه و جوهره الحقيقى كعالِم يريد الخير و النفع و ليس الدمار و القتل.
و بالنسبة لك ، أيا كانت الأشياء الغير الناجحة أو الغير جيدة التى بدرت منك فى الماضى تجاه نفسك أو تجاه أى أحد – بقصد منك أو بدون قصد- فمش هتكون سببت دمار و أذى قد اللى سببه الديناميت، و من رحمة ربنا سبحانه و تعالى إن أبواب مغفرته و رحمته للناس مفتوحة دائما ، قال تعالى " قُل يَا عِبَادِى الذينَ أسْرَفُوا على أنفُسِهِم لا تقنَطُوا مِن رَحْمَةِ الله إنّ اللهَ يغفِرُ الذّنُوبَ جَمِيعًا إنّهُ هُوُ الغَفُورُ الرحِيم" صدق الله العظيم (سورة الزمر- آية 53)
و اقتران الياء بلفظة عبادى ، يدل على تشريف و تكريم عظيم لك، فتذكر أنك عبدا لله ، و ده فى حد ذاته أكبر قيمة و تشريف ممكن تناله ، فلابد أن تستمد من ذلك قيمتك وأن تقدر ذاتك بشكل إيجابى و تكون فى حالة امتنان و شكر ، فأنت خليفة الله فى الأرض و ربنا سبحانه و تعالى نفخ فيك من روحه ، كما قال تعالى " فَإذا سَوّيتُه و نَفَختُ فيهِ مِن روحِى فَقَعُوا له سَاجِدِين" صدق الله العظيم (سورة ص- آية 72)
و عندما ترى نفسك بأنك قيّم ، فلابد أنك ستفعل ما يعبر عن قيمتك ، و عندها تجتهد و تسعى لإفادة الغير و للنجاح بشكل أكبر و بسعادة أكثر، فمن الآن فصاعدا ،تذكر أنه من الأنانية أن تقلل من قيمة نفسك ، فقدّر نفسك جيدا و فكر فى معانى أكبر لكل ما تفعله ، و اتقن فيه و اجعله خير انعكاس لتقديرك الإيجابى لذاتك
و كما صنع (ألفريد نوبل) جوائز( نوبل) و أفاد الغير ، فافعل انت أيضا ما تعبر به عن تقديرك لنفسك و ما تفيد به غيرك، و اصنع ( نوبل ) الخاصة بك
==================================
معذرة لطول فترة الغياب الماضية و التى افتقدتكم جميعا فيها ، جزاكم الله خيرا على السؤال و الاهتمام ،
بارك الله فيكم جميعا و وفقنا لما يحب و يرضى
السلام عليكم
ReplyDeleteحمداً لله على سلامتك ولعودتك الطيبة
موضوع موفق ومن الممكن أن يستغل
الفرد أقصى تاقاته لتحقيق كل ما يصبو إليه
جزاك الله خيراً
خالص تقديرى
ازيك فراشة اخبارك اية
ReplyDeleteتغيبى وترجعى بااحلى المواضيع
بجد بوست اكثر من رائع
تسلمى علية
مش تغيبى علينا تانى كتير
ربنا يوفقك ويكرمك
مع خالص تحياتى
السلام عليكم ورحمه الله وبركاته
ReplyDeleteحمدالله على سلامتك يا دكتوره نهى والف سلامه عليكى
وبجد موضوعك حلو جدااااااا
وحقيقى كان بقالى فتره بفكر فى الموضوع ده ان الواحد لازم يقدر نفسه ويحبها بجد علشان يقدر يعيش فى الدنيا دى وان ده مش معناه ابدا الانانيه
فربنا يكرمك ويعزك انتى بجد لميتى الموضوع بشكل رائع جدا
وجميل جدا اخيارك لعنوانين مواضيعك
ربنا يوفقك دايما ويباركلك فى وقتك
شوف تكريم ربنا سبحانه و تعالى لك ، و شوف قوله تعالى ( قليلا ما تشكرون)، فاستشعر عظمة هذا التكريم و كن أنت من الشاكرين ، وكن فى حالة امتنان لنعم الله عليك، و استشعر مسؤليتك تجاه النعم دى و تجاه دورك فى الحياة كإنسان ، وعندها هتشعر بسعادة و راحة نفسية و هتقدر تفيد من حولك و تنجز وتشعر بسعادة الإنجاز، مهما كان
ReplyDeleteالأنجاز ده صغير فى مظهره، طالما إنه شىء حلال
البوست كله ماشاء الله حلو جدااا جزاك الله خيراا د:نهى وفكرة ربط تقدير الذات بشكر الله عجبتنى جدااا
تسلم أيد حضرتك.
ياااه يا نهى
ReplyDeleteكنتِ فييين !
بجد افتقدنا وجودك ومقالاتك المميزة جدا
ماتغيبيش علينا كتير كده تانى:)
السلام عليكم يا نهى
ReplyDeleteوعوده حميده مفيده ومتفاءله الصراحه
ربنا يكرمك الحقيقه انا بكتسب معنويات قويه جدا بقرايه كلماتك فعلا احيان كتيره بنكون مش مقدرين نفسنا ونعايب على الاخرين تجاهلهم لاعمالنا
اصنع نوبل لنفسك ما اجمل التعبير دا
والنيه الكبيره لاخذ الاجر من الله سبحانه وتعالى
ربنا يوفقنا جميعا لهدف رضاه اول
ودمتى بكل الخيرا
عودة مؤثرة كما عهدتك دوما يا نهى .........موضوع جميل ورائع.. فعلا الإيجابية أمر بناء لشخصية إسلامية معتدلةوالسلبية آفة المجتمعات آجمع ...ربي يلهمك دوما
ReplyDelete..البصيرة ويزيدك نور على نور
د/نهى
ReplyDeleteمتميزه كعادتك
حمداً لله على سلامتك
تقبلي مروري
محمد البنا
طريق النجاح
اللهم احسن ظنى بك واحسن ظن الناس بى واجعلنى خيرا مما يظنون
ReplyDeleteاحييكى على البوست الهادف والمثمر
فعلا التقليل الدائم فى الذات ينافى الطبيعى وكذلك الكلام دائما عن الذات ينافى التواضع
عمرو جويلى
ReplyDelete==========
و عليكم السلام و رحمة الله و بركاته
الله يسلم حضرتك ، جزاك الله خيرا
أشكر حضرتك على رأيك ، و كلام حضرتك سليم و فى محله
أشكر لحضرتك تعليقك و مرورك الكريم
جزاك الله خيرا
Tamer Nabil
ReplyDelete===========
الحمد لله ، ربنا يكرم حضرتك ، و أتمنى تكون بأفضل حال إن شاء الله
أشكر حضرتك على رأيك فى البوست، ربنا يكرمك
و بإذن الله ربنا يعيننى و ألا أغيب كذلك عن التدوين
وفقك الله للخير دائما
جزاك الله خيرا
روح طفلة
ReplyDelete========
و عليكم السلام ورحمة الله و بركاته
الله يسلمك يا دعاء :) ، ربنا يكرمك ، و اشكرك على سؤالك علىّ و اهتمامك
سعيدة بجد إن الموضوع عجبك
"وحقيقى كان بقالى فتره بفكر فى الموضوع ده ان الواحد لازم يقدر نفسه ويحبها بجد علشان يقدر يعيش فى الدنيا دى وان ده مش معناه ابدا الانانيه "
فعلا كلامك سليم و طالما باعتدال و بدون افراط أو تفريط
ربنا يكرمنا و يعزنا جميعا بإذن الله :) ، و بجد سعدت جدا بملاحظاتك على الموضوع و اللى حقيقى باستفيد منها
، وأتمنى إن كل المواضيع تنال إعجابك بإذن الله
أشكرك على دعائك الجميل - اللى جاى فى الصميم- :) ، و ربنا يوفقك و يكرمك يا رب
جزاك الله كل خير
عفوا أنا أميرة
ReplyDelete=============
أهلا و سهلا بالأميرة سلمى
:)
أشكرك على رأيك فى البوست ، ربنا يكرمك
و سعيدة بجد برأيك و بتعليقك اللى استفدت منه
الله يسلمك يا سلمى
ربنا يكرمك و يوفقك لكل خير بإذن الله
جزاك الله خيرا
موناليزا
ReplyDelete========
"ياااه يا نهى
كنتِ فييين"
:)
أهلا بيكى ، معلش شوية تعب كده بيزيدوا على كل فترة فبعدت عن التدوين الفترة اللى فاتت
أشكرك ، ربنا يكرمك و انت كمان بجد وحشتينى
إن شاء الله ربنا يعيننى إنى ماغيبش كده :) ، أشكرك على شعورك الجميل
ربنا يعزك و يوفقك لكل خير
جزاك الله خيرا
بسنت
ReplyDelete====
و عليكم السلام و رحمة الله و بركاته
ربنا يكرمك ، حقيقى أشكرك على رأيك
وبجد اكثر شىء بيسعدنى لما باعرف إن قارىء البوست تأثر به بشكل إيجابى
ربنا يوفقك لكل خير بإذن الله، أشكر لك مرورك الجميل
لكِ خالص تحياتى
جزاك الله خيرا
كلمات من نور
ReplyDelete============
أهلا أهلا بحضرتك ، جزاك الله كل خير على رأيك و تواجدك
و كلام حضرتك سليم ، ربنا يوفقنا جميعا لنكون مجتمع إيجابى بنّاء إن شاء الله
"ربي يلهمك دوما
..البصيرة ويزيدك نور على نور"
الله ، ..بجد دعاء جميل جدا جدا
آمييين يارب العالمين ، و لك مثله بإذن الله
حقيقى سعيدة بتعليق حضرتك و بتشجيعك
جزاك الله خيرا
MOHAMMED ELBANNA
ReplyDelete================
الله يسلم حضرتك
حقيقى أشكر حضرتك على رأيك، ربنا يكرمك
وفقك الله لكل خير
جزاك الله خيرا
مسدس صغير
ReplyDelete========
أهلا بحضرتك
"اللهم احسن ظنى بك واحسن ظن الناس بى واجعلنى خيرا مما يظنون"
آميين يا رب العالمين
أشكرك على رأيك ، ربنا يعزك و يكرمك
و فعلا كلامك فى محله ، فكل فضيلة بتكون فى الوسط بين رذيلتين ، ربنا يعيننا و يوفقنا جميعا لكى نتحلى بالفضائل إن شاء الله
حقيقى شاكرة لمرورك و تعليقك
جزاك الله خيرا
شكراً يا دكتورة على المقال القيم ده
ReplyDeleteبجد شكراً
عارفة انا تقييم الأخرين ليا اهم من تقييمى لنفسى
يمكن عشان بقيم نفسى وحش
بس بجد تقييم الناس بيدينى عمل فظيع فى الحياة
و شكراً تانى ليكى
قصدى امل
ReplyDelete*
السلام عليكم
ReplyDeleteازيك يا نونو حمد لله ع السلامة
كل سنة وانت طيبة
جميل موضوعك ويا رب الكل يستفيد
عام سعيد عليكي وعي اسرتك
ان شاء الله
دمتي
جميل أوى يادكتور الموضوع
ReplyDeleteمش هقدر اديله حقه فى التعليق
بس أنا أخر 3مواضيع عندى بشرح فيهم نفس النقطة بالظبط وكأنه توارد أفكار
ربنا يكرمك دايما
وحمدا لله على سلامة حضرتك
السلام عليكم
ReplyDeleteموضوع رائع يا د نهي يغفر الغياب الطويييل
واني لأعتقد ان غياب تقدير الذات لهي بلية عامة بيننا هذه الأيام وأتمني لو تبدأ بالإختفاء
دمتي بالف خير
د/ نهى
ReplyDeleteبجد ما شاء الله كل مواضيعك ذات قيمة كبيرة جداااااا
و بجد صعب ان حد يديلها قيمتها
بالتوفيق يا دكتورة و دايما للامام
بدراوى
ReplyDelete======
العفو، ربنا يكرمك ، أنا اللى أشكر حضرتك على رأيك و تعليقك
هو فعلا زى ما حضرتك ذكرت إن تقييم الآخريين مهم ، و بيشجع جدا و يعطى أمل و دفعة قوية للأمام ، فهو دوره مكمّل لدور التقييم الإيجابى للذات
أشكرك على رأيك بجد ، ربنا يبارك فى حضرتك
جزاك الله خيرا
ذكرى رحيل قلم
ReplyDelete=============
و عليكم السلام و رحمة الله و بركاته
الحمد لله :) ، الله يسلمك ، و اتمنى إنك تكونى بكل خير
جزاك الله خيرا على اهتمامك ، ربنا يبارك فيكى
و انت طيبة و بكل خير يا رب
اشكرك على رأيك ، و اتمنى فعلا إن الكل يستفيد بإذن الله
منورانى حقيقى
جزاك الله كل خير
mohamed ghalia
ReplyDelete==============
أهلا و سهلا بحضرتك ،أشكرك على رأيك
" أنا أخر 3مواضيع عندى بشرح فيهم نفس النقطة بالظبط وكأنه توارد أفكار
ربنا يكرمك دايما"
سبحان الله ، الفترة اللى فاتت أنا كنت متوقفة عن الكتابة و عن متابعة المدونات كذلك عشان كده ماكنتش أعرف ، بس أنا واثقة إن أكيد حضرتك أبدعت فيهم كعادتك
نفعك الله و نفع بك
الله يسلم حضرتك
جزاك الله خيرا
تايه فى وسط البلد
ReplyDelete================
و عليكم السلام و رحمة الله و بركاته
"موضوع رائع يا د نهي يغفر الغياب الطويييل"
الحمد لله ، أشكر حضرتك لرأيك حقيقى ، و معذرة على الغياب الطويل اللى لم يكن فى حسبانى
و فعلا كلام حضرتك سليم ، ربنا يوفق أمتنا لكل خير إن شاء الله
جزاك الله خيرا
dodoo
ReplyDelete=====
أهلا بيكى
ربنا يكرمك ، سعيدة إن الموضوع عجبك
أشكرك بجد على تعليقك اللى حقيقى شجعنى ، ربنا يكرمك و يبارك فيكى
وفقك الله للخير دائما و لما يحب و يرضى
جزاك الله خيرا
السلام عليكم
ReplyDeleteازيك يا حبيبتى
الف حمد الله على سلامتك
اجمل حاجه ان كل انسان يبقى
عارف مميزاته ايه وعيوبه ايه
ويركز على ايجابياته
موضوع جميل جدا بس طوووووووويل اوى يا نهى
ربنا يسعدك يارب
حمدالله على السلامة يا قمرة
ReplyDeleteموضوع مميز جدا كصاحبته
تقبلي مروري
ليس فقيرا من يحب
ReplyDelete==============
و عليكم السلام و رحمة الله و بركاته
الحمد لله ، ربنا يكرمك يا رانيا ، إزيك انت يا جميلة؟ يا رب تكونى بكل خير
الله يسلمك
"اجمل حاجة ان انسان يبقى عارف
مميزاته ايه و عيوبه ايه
و يركز على ايجابياته"
انت جبتى الخلاصة فعلا
"موضوع جميل جدا بس طوووووووويل اوى يا نهى "
:) :) :)
يمكن علشان احاول اعوض الغياب الطوووووويل برضه
:) :)
بس بجد هى الكحاية ماكنتش مقصودة و لكن المعنى له اكثر من جانب و ماكنش هينفع اشيل منه أى جانب
و حاولت فعلا اختصر فيه و لكنى و جدت إن أى اختصار هيؤدى لبتر المعنى، لذلك عرضته كما هو على امل تحقيق الاستفادة إن شاء الله
سعيدة برأيك و بتواجدك الجميل، شكرا لدعائك و لك مثله إن شاء الله
جزاك الله كل خير
بنت مصر
ReplyDelete=======
الله يسلمك يا جميلة ، انت اللى نورت المدونة
شكرا لتعليقك و لرأيك الرقيق ، ربنا يكرمك و يبارك فيكى
جزاك الله خيرا
موضوع جيد للغاية
ReplyDeleteSharm
ReplyDelete=====
أهلا بحضرتك فى أول زيارة للمدونة
أشكرك لرأيك و تعليقك
جزاك الله خيرا
السلام عليكم
ReplyDeleteانا كنت قريت معظم الموضوع وقت كتابته
ولكن وقتها كنت مشغول بالامتحانات وكده فمعرفتش اعلق
طبعا موضوع رائع كالعادة
فقط اريد قول شىء بسيط وهو انه الفرق بين الثقة بالنفس والغرور شعرة
دكتورة نهى
ReplyDeleteبنتى الغالية
ليكى وحشة كبيرة يانهى
والله كنتى فى بالى قريب
الف سلامة عليكى يانهى ربنا يبعد عنك كل سوء ياحبيبتى
وياريت لاتحرمينى من دعواتك يانهى
قلت ارحب بيكى وساذهب لقراءة البوست
تحياتى
د.عرفة
ReplyDelete======
أهلا و سهلا بحضرتك يا دكتور فى أى وقت ، و بإذن الله تكون نتيجة الإمتحانات كل خير
و هو فعلا ما بين الثقة بالنفس و الغرور شعرة ، و مع ذلك ، فهذا فى حالة ما يكون الثقة بالنفس منبعها النفس و العُجب بالنفس فحينها ممكن تتحول بسهولة إلى غرور و العياذ بالله
أما إذا كان مصدر الثقة بالنفس للإنسان هو الثقة بالله و الثقة فى أن الله سيوفقه و يسدد خطاه طالما فعل كل ما بوسعه، و أن كونه فعل ما بوسعه كان بسبب كرم من الله، فيفكر أن الوسيلة كانت رزق من الله ، و الثقة فى النتيجة تنبع من الثقة فى الله ، فحينها هتكون الثقة بالنفس بعييييدة كل البعد عن الغرور
إن شاء الله
اشكر حضرتك لرأيك و تعليقك
وفقك الله لكل خير
جزاك الله خيرا
أم مالك
ReplyDelete======
أهلا أهلا بحضرتك
حضرتك بجد غالية عندنا كلنا ، و افتقدت حضرتك جدا
الفترة اللى فاتت، و أتمنى تكونى بخير حال إن شاء الله
"والله كنتى فى بالى قريب"
شىء يفرحنى ، و سبحان الله ، القلوب عند بعضها :) ، أنا كمان كنت بافكر فى حضرتك و بادعى لحضرتك
ربنا يتقبل إن شاء الله
الله يسلم حضرتك ، جزاك الله كل خير
بجد حضرتك أسعدتينى جدا جدا بسؤالك
أتمنى أن تذكرينى من صالح دعائك إن شاء الله
جزاك الله كل خير