تأثير الفراشة

تحيا إرادة الشعب، تحيا مصــر

2011-02-14T06:36:00.000-08:00

لم أكن أتخيل أثناء كتابتى للتدوينة السابقة أنه سيمر قرابة العام قبل أن أخط تدوينة جديدة فى المدونة -لأسباب شديدة لم تكن متوقعة و ليس سبيل ذكرها الآن-، و لو أكن أحلم أن التدوينة الجديدة ستكون فى مثل هذه اللحظات التاريخية التى نعيشها الآن

قبل أى شىء ألف مبروك لمصر ، ألف مبروك للمصريين، ألف مبروك على الحرية و على الإيجابية و على اليقظة بعد أعوام طويلة من الصبر الشديد

كنت أبتعد دائما فى المدونة عن الحديث عن الحياة السياسية ، و ذلك للحفاظ على خصوصية المدونة ، و لكن ما حدث فى الأيام السابقة و ما زال يحدث ،هو أكبر من أى حدث سياسى ، هو إرادة شعب ،شعب تألم ،فصبر ،فأصبح يحلم ، فطالب بحلمه و صدّقه حتى عندما كذبه الكثيرون و سخروا من حلمه بل و أتهموه تارة بالجنون و تارة بالعمالة و تارة بأنه داعيا للفتنة، و لكنه استعان بالله و علم أن الله ينصر الحق (و ما ضاع حق وراءه مطالب)، و سعى فى طريقه إلى أن انتصرت إرادة الشعب و فاجأ الشعب نفسه قبل أن يفاجىء العالم، و اكتشف المصريون أنفسهم من جديد و كأننا نرى أنفسنا للمرة الأولى

و سبحان الله كنت أتأمل مؤخرا فى فكرة أن الكل يقول " الناس بقت وحشة قوى" ، لأننى سمعت هذه الجملة كثيييييرا جدا و كان الشخص الذى يقول هذه الجملة يشرح كيف يحاول هو أن يتعامل بالخير و لكن الناس لا تساعده ، أو شخصا آخر يخطىء و يبرر الخطأ بأنه عايز يعمل الصح و لكن على حد قوله "الصح ما بينفعش فى الزمن ده " !!!! ، فأتساءل بداخلى : طالما كل هؤلاء يريدون الخير و كل واحد بيشتكى من الآخرين، طب هم فين الآخرين دول؟؟؟؟؟؟

كان كل واحد حاسس إن هو لوحده بس و الدنيا حوله أصبحت غابة متوحشة ، كان لما واحد منهم يعمل شيئا طيبا يقول له من حوله " إنت اللى زيك انقرض" !!!؟؟؟ ، كانت حقيقى ثقافة مدمرة لأى شعب أن يتحول 85 مليون مصرى من شعب واحد و قوة موحدة ، إلى 85 مليون جزيرة منعزلة تحاول إتقاء شر الجزر الأخرى و تحاول أن تنطوى على نفسها علشان تعيش، و كما يقولون: "أهى عيشة و السلام

!!!!!

و لكن الحمد لله وجد المصريون أنفسهم وقاموا بمفاجأة أنفسهم عندما خرج كل منهم يتمنى أن يجد آخرين معه و تساورهه الشكوك بأنه ربما سيخرج و لن يجد أحدا ، فيعود إلى منزله يجر أذيال الخيبة و اليأس، و لكن المفاجأة أنه وجهدهم بالفعل ، وجد نفسه معهم بقلب واحد، بصوت واحد، بحلم واحد ، و أحيانا كثيرة بعقل واحد أيضا

لو أردت التحدث عن الدروس التنموية التى عايشناها جميعا خلال الثورة ، و التى نتأملها إلى الآن ، فستجد أنها لا تعد و لا تحصى ، هى تنمية بشرية فى أزهى حالاتها، و يعلم الله أننى لا أقول ذلك من باب تأييدى التام و الكامل للثورة منذ أن علمت بنية حدوثها ، و لكن حتى من وجهة نظر علمية بحته ، فستجد فيها ، الحلم ، الصبر ، الإصرار برغم كل الضغوط ، التعاون ، السلام و قوته ، الإيجابية ، المشاركة (بأى مجهود حتى لو كان صغيرا أو فرديا لأن الجميع أصبح يعلم أنه لولا الفرد ما ستتكون الجماعة ، و لو كان كل شخص قد قام باستصغار مساهمته لما ساهم الملايين )،حتى فكرة (تأثير الفراشة) ، و التى قمت بتسمية المدونة على اسمها -بأن فعل صغير يؤدى إلى تغير كبير -تجلى بشدة ، فسبب دعوة شباب على شبكة التواصل الاجتماعى (فيس بوك) - و الذى سخر منهم الكثيرون و أهملهم- قامت ثورة شعبية غيرت وجه مصر و الأمة العربية و لا أبالغ حينما أقول أنها غيرت و ستغير وجه العالم أجمع ،و للأفضل بإذن الله

و بعد هذه الملحمة الإنسانية العظيمة -سواءا كنت متفقا معها أو مختلفا- فلا يصح الآن أن نقول أن الأحلام مستحيلة ، و لا يصح أن نكون سلبيين بعد الآن ، و لا يصح إلا أن نتكاتف معا و نتقبل اختلافاتنا و نتوحد بالرغم منها ، و لقد شهد لنا العالم حينما قيل: "إن المصريون قد علمونا أن هويتنا تكمن فى أن نتعرف على بعضنا من خلال ما يجمعنا و ليس ما يفرقنا". فمن الآن حافظ على هذه الوحدة و قم بإثرائها ، احلم ، اسعى ، اجتهد ، تفاءل - فلم يكن أشد المتفائلين ليتوقع حدوث ذلك لا من المتخصصين فى الساياسة و لا من غير المتخصصين- ، فالله -سبحانه و تعالى - كرمه أوسع من كل التخيلات ، و تعلم و اعمل ، فقد حان وقت بناء بلادنا من جديد .

مصر البلد العريق منذ قديم الزمان تتنفس الآن روحا شابة و يتطلع أبناؤها لأحلام لا تعرف الحدود ، الآن شعب مصر

قد كسر المستحيل و يعلم جيدا إنه إذا أراد، فعل -بإذن الله و توفيقه-، لا يوجد لدينا وقت للتلاوم و لا للشماته و لا للفرقة، فنحن نسعى لاستثمار و توجيه تلك الروح الرائعة و الطاقة المذهلة السامية الموجدوه الآن بداخل كل مصرى ، التى جعلت العالم يقف و يتعجب ، بل و منهم من يتمنى أن يكون مصريا أو أن يستطيع أن يربى أبناءه ليصبحوا مثل المصريين ، و نحن لا نقول ذلك من باب التفاخر -ما عاذ الله- و لكن من باب التحفيز و من باب الرغبة فى الحفاظ على مواصلنا إليه و السعى إلى البناء بعده دون الالتفات لصغائر الأمور.

الآن ذاق المصريين فى 18 يوما معنى أن يكون لدينا هدف و نحققه ، و حان الوقت لكى نضع أهدافا أخرى و نحققها أيضا بإذن الله.

و أخيرا و ليس آخرا ، شكر و تقدير كبيرين إلى شعب تونس العظيم الذى ألهمنا و أعطانا الأمل بأن ما نحلم به من الممكن أن يتحقق ، و شكر و تقدير و عرفان لكل الشهداء الذين استشهدوا فى مصر و تونس سعيا منهم وراء الحرية و وراء مستقبل أفضل لهم و لشعوبهم ، رحمهم الله رحمة واسعة و ألهم ذويهم الصبر و السلوان، و حان دورنا الآن لنكمل ما بدؤوه و نعمّر بلادنا التى ضحوا بحياتهم من أجلها و أجلنا

تحميض لا مفرّ منه

2010-02-20T23:12:00.000-08:00

"أشوف الأول إنى نجحت و ساعتها أصدق إنى أقدر أنجح"

تفتكر إن الأسلوب الأفضل فعلا إن الإنسان يسعى و يعمل و هو غير مصدق أو غيرمتوقع إنه هينجح ، و بدون صورة واضحة فى ذهنه عن هذا النجاح، أم المفروض إن الإنسان يتوقع النجاح أولا و يتصوره جيدا حتى توجد أمامه صورة واضحة يسعى لها بخطة واضحة و فعل مستمر ، حتى يتمكن من تحقيق هذا النجاح ، أو الهدف المنشود؟؟؟

الحقيقة إن الاختيار الثانى هو الأصح ، وهو اختيار أن تفكر فى تحقيق أهدافك بطريقة "سأرى عندما أؤمن"

و ليس العكس
إزى ده؟؟
لأن الإنسان إذا لم يؤمن بنجاحه أو لم تكن لديه صورة واضحة لنجاحه ده ، و مش متصور أو مش مصدق إنه ممكن ينجح فعلا ، فعند مواجهته لمعوقات و تحديات الحياة ، هيكون أسرع فى الاستسلام و اليأس، لأنه سيكون متوقع الأسوأ ، و غالبا ما سيتوقعه سيحدث له فعلا، لأن ما يتوقعه الإنسان بقوة يحدث له فعلا، و كمان لأن عقله سيبحث له عن الأسوأ، اما على النقيض ، فعندما يكون عندك يقين بإنك هتنجح يعنى هتنجح بإذن الله ، و متصور ده فى عقلك و متخيله بالتفصيل وبإستمرار و بيقين شديد ( و حط تحت يقين شديد دى مليووون خط) فسيسهل عليك معرفة ما ينبغى عمله لتحقيق هذا الهدف

و حتى إذا حدث فى لحظة أنك كنت متضايق أو محبط ، فسوف تكون على يقين بداخلك بإن دى مجرد مرحلة مؤقته فى طريقك لتحقيق هدفك ، لأنك متأكد و عندك صورة واضحة أنك ستصل إلى هدفك فى النهاية بإذن الله

و الحقيقة الموضوع ده باشبهه بصورة الكاميرا الفوتوغرافية ،إزااى؟؟؟؟؟

فلابد لك أن تجهز الصورة التى تريد إلتقاطها أولا، ثم تلتقطها بالفعل بواسطة الكاميرا، .. مع ذلك فهذا وحده لا يكفى حتى تظهر الصورة مطبوعة ، لابد من بعض الوقت الذى ستعمل فيه بحرص و اجتهاد حتى يتم تحميض الصورة بشكل سليم، لكى تظهر على أرض الواقع
و كون إن الصورة أول ما قمت بالتقاطها ، لم تظهر على ارض الواقع ، فده مش معناه أبدا إنها مش هتتحقق ، هى فقط بحاجة لبعض الوقت و الجهد المنظم الملتزم

كذلك الصورة الذهنية ، لازم أن يكون عندك صورة واضحة فى عقلك لما تريد تحقيقه ، حتى تتمكن من تحقيقه فعلا، و الصورة لوحدها برضه مش كفاية ، الصورة محتاجة وقت مع تخطيط و عمل ملتزم حتى تتحقق على أرض الواقع

و الصورة الذهنية بتكون أفضل و أكثر مرونة من صورة الكاميرا، ليه؟؟

لأن صورة الكاميرا إذا أخفق أو أخطأ الشخص فى تحميضها و أتلف الفيلم ، فإن الصورة تذهب و لا تعود مرة أخرى ، أما الصورة الذهنية ، فمكانها فى عقلك أنت و أنت قادرا على صنعها و تصورها ، فحتى إذا حدث إخفاق فى عملية تنفيذها على أرض

الواقع ( تحميضها) ، فبإمكانك دائما إن تعدّل فى تنفيذك و تغير فيه و تستكمل ما بدأت لكى تحقق الصورة التى فى عقلك و (تحمضها) على أرض الواقع

و لذلك ، فعندما يؤمن الإنسان بنفسه و بإن الله لن يضيع أجره ، و يضع لنفسه صورة ذهنية إيجابية و يجتهد ليحققها ، فستكون مسألة وقت حتى يتم تفعيل هذه الصورة

فالذى يقول "سأؤمن عندما أرى النتيجة أولا" ، هو بالضبط كمن يقول أنه سيرفض أن يصور بالكاميرا ، لأنه سيصدق أن الكاميرا قادرة على التصوير عندما تظهر الصورة على ارض الواقع أولا

!!!!!!!!!!!!!!!!!!!!!!!!

فالنتيجة إن اللى بيفكر بالطريقة دى هيفضل منتظر الصورة دى كثييييير قوى ، و فى الآخر يتشاءم و يحبط و يقول مفيش فايدة
!!!!!!!!!!!

و موضوع الصورة الذهنية ده بيسير فى الاتجاهين !!!!! يعنى إيه؟؟؟؟

يعنى إن الصورة دى هتتحقق فعلا سواءا كانت صورة جيدة أو سيئة ، لذلك يوجد المقولة الشهيرة

( احترس مما تفكر فيه و تتمناه لأنه من الممكن أن يتحقق)

و احنا عندنا معنى مهم جداااااا ، بأن ربنا سبحانه و تعالى بيكون عند ظن عباده به ، ففى الحديث القدسى ، قال رسول الله صلى الله عليه و سلم فى ما بلغ عن رب العزة

"أنا عند ظن عبدى بى ، فليظن عبدى بى ما يشاء"
فربنا سبحانه و تعالى بيوعد عباده إنه كما يظنون به ، كما سيحدث لهم

علشان كده بيكون خسارة جداااااااااااااااا ، لما واحد يتوقع الأسوأ و يضع فى ذهنه صورة سيئة ، و يبرر ده بإنه يقول "بس أصل أنا عارف نفسى مش هنجح و مش معقول أحقق الهدف ده" ، و لمّا فعلا الموضوع لا ينجح ، فيقول بلهجة المنتصر و الأكثر دراية بالأمور : " شفت؟ مش قلت لك مش هينفع و مش هانجح، أنا باقول لك أنا عارف نفسى كويس"

و لكن الحقيقة إنه فعلا نجح ، نجح فى إنه ينفذ بالضبط ما رسمه و تصوره فى عقله ، و عقله نفذ له ما تصوره ، فعندما تصوّر و تيقن أنه لن يصل لهدفه و كان بيسعى و هو عنده القناعة دى ، فكان طبيعى جدااااااا إنه فعلا لا يصل لهدفه ، و عقله نفذ له ما أراد ، و الصورة اللى فى ذهنه هى التى تم تنفيذها فعلا (تحميضها) فى واقعه

فالفارق الآخر و المهم جدا بين صورة الكاميرا و الصورة الذهنية ، إن صورة الكاميرا تحميضها بيكون اختيارى ، ممكن تحمضها أو لأ ، أما الصورة الذهنية ، فتأكد إن تحميضها و حدوثها على أرض الواقع هو أمر لا مفر منه ، و هيحدث حتما ، لأن الانسان طالما عايش فهو بينفذ ما يأمره به عقله ، و من نعمة ربنا –سبحانه و تعالى – على الإنسان إنه هو نفسه يستطيع إنه يصدر الأوامر لعقله بما يريد من عقله أن يأمره به فيما بعد ، أو بمعنى آخر ، إنك كما ستأمر عقلك و تضع فيه الصورة التى تتصورها و تفكر فيها باستمرار ، كما سيسعى عقلك وراء هذه الصورة ليساعدك على تنفيذها

و من يخاف من أن يتصور ما يريده أو أن يضع لنفسه حلم ، بسبب إنه (مش عايز يتوقع حاجة كويسة علشان لو لم تحدث فلا يصاب بالإحباط) ، فده فى حد ذاته هو أكبررر إحباااااط ، إحباط إن الإنسان يمنع نفسه حتى من مجرد تصور إنه سيصل إلى ما يريده ، فإذا الانسان توقع القليل و حصل على القليل ده – و أحيانا كثير بيكون أقل من هذا القليل- فسوف يصل لحالة استسلام للأمر الواقع و ستضعف همته للسعى فى المستقبل، و يصاب بالإحباط فعلا ، و الكارثة الأكبر ، إنه بدل ما يتعلم من اللى حصل ده ، بيقول (طب كويس بقى إنى لم أتوقع شىء كبير ، علشان مايجليش إحباط)

!!!!!!!!!!!!!!!!!!!!!!

ده على أساس إن اللى هو فيه دلوقتى ده مش إحباط مثلا

أما على الجانب الآخر ، فإذا كان لدى الانسان صورة و هدف بما يريده و سعى و اجتهد و حدث إنه فى مرحله من المراحل لم يحدث نفس قدر النجاح اللى كان متوقعه ، فكون أن لديه صورة ذهنية قوية بأنه سينجح حتما ، فده هيعطيه الدفعة القوية إنه يحاول مرة أخرى و أخرى بدون يأس أو كلل ، لإنه عنده صورة لنفسه بإنه هيصل بإذن الله ، هى فقط مسألة وقت و جهد منظم

و حتى عندما نسمع أحيانا لأحد الناجحين و هو بيقول (أنا اتفاجئت بالنجاح و لم أكن متوقع ده على الإطلاق)، فيظن البعض إنه لا علاقة بين توقع النجاح و بين حدوثه ، و لكن ده ظن خاطىء
طب أمال إيه اللى بيقوله ده ؟؟؟ و جه إزاى؟؟؟؟؟

اللى بيقوله ده ببساطة بيكون له ثلاثة أسباب ،ممكن يكون أى سبب منها أو كذا سبب مجتمعين مع بعض :

السبب الأول إن الشخص بيكون عنده أمل بحدوث النجاح و بيسعى له بقوة ، و لكن صدمة تحقق هذا الأمل على أرض الواقع لها عامل مفاجأة و فرحة أخرى ، تماما كمن يجتهد فى المذاكرة و يتمنى أن يكون الأول و يرسم فى عقله هذه الصورة و يعمل على تحقيقها باجتهاد شديد ، و مع ذلك فكلللللل ده لن يمنع فرحته الشديدة و مفاجأته عندما يصبح الأول فعلا

و السبب الثانى إنه ممكن فعلا يكون فى مرحلة من مراحل حياته لم يكن متوقعا لهذا النجاح على الإطلاق، و لكنه كان فى الماضى متوقع شىء معين ، و عندما تحقق و نجح فيه ، فتوقع شىء آخر أعلى منه ، و مع الوقت و مع تكرار التوقعات الإيجابية و مع نجاح و راء نجاح بدأ توقعه يزداد تدريجيا إلى أن وصل لهذا المستوى، و لكنه فى بداية الطريق لم يكن عنده هذا المستوى من التوقع

و السبب الثالث – و المهم جدا- إن ربنا سبحانه و تعالى من أسمائه الحسنى الكريم و الجواد ، فمن يجتهد و يعمل و هو عنده هدف و رؤية واضحة ، و هو يحسن الظن بالله ، فممكن جدا تجد إن ربنا كرمه بأكثر مما تصور ، و فتح له أبواب عديدة

و يوجد العديييييد من الناجحين اللى كانت لديهم صورة ذهنية واضحة و إيجابية لما يريدون فى الحياة ، و يعملون بجدية و التزام ليحققوا هذه الصورة

على سبيل المثال (بيل جيتس) مؤسس شركة (مايكروسوفت) و الذى ظل أغنى رجل فى العالم لسنوات عديدة ، (بيل جيتس) عندما سُؤل السؤال التقليدى ( هل أنت كنت بتحلم باللى وصلت له دلوقتى؟) ، فهو استغرب السؤال و أجاب بتلقائية

"باحلم باللى وصلت له دلوقتى !!!؟؟ ده أنا كنت بامشى جوة حلمى"

ياااه ، إجابة قوية جدا ، مش كده ؟ ، يعنى مش بس كان راسم صورة لحلمه فى ذهنه ، ،دى كانت صورة مرسومة و محفورة بداخله بالتفصيل لدرجة إنه كان عايشها و بيدخل و يمشى بداخلها فى عقله من كتر وضوحها، و على قدر وضوح الصورة ، على قدر ما استطاع إنه يحققها على أرض الواقع

ويوجد موقف ذكره (زيج زيجلار) مدرب التنمية البشرية أنه عندما تم افتتاح

حديقة (والت ديزنى ) الشهيرة فى فلوريدا ، كان ذلك بعد وفاة (والت ديزنى) نفسه ، فأحد الصحفيين كان بيعلق لــ (روى ديزنى) أخو (والت ديزنى) و بيقول له: "خسارة إن (والت) رحل عن عالمنا و مش موجود معانا علشان يشوف الحديقة" ، فرد

عليه (روى) و قال له

"ده هو أول واحد شافها"

فعلا (والت) كان أوووول واحد شافها فى عقله هو و لذلك مع التخطيط و العمل الملتزم أصبحت حقيقة يراها الآخرون، و استمرت حتى بعد وفاته

و من تاريخنا ، يوجد القصة الشهير لأربعة أولاد يجلسون حول الكعبة و كل واحد منهم بيقول هو نفسه يكون إيه لما يكبر، فأحدهم قال إنه يطمح بأن يحكم العراق، و الثانى قال أنه يطمح بأن يحكم العرب ، و الثالث يطمح بأن يحكم الدنيا ، و الرابع قال أنه يتمنى أن يؤخذ عنه العلم و يصير من العلماء، و بعد زمن من هذه المحادثة كان لكل واحد فيهم ما تصور لنفسه ، فالأول كان (مصعب بن الزبير) و حكم العراق فعلا، والثانى كان (عبد الله بن الزبير) و فعلا حكم العرب ، و الثالث كان (عبد الملك بن مروان) و فعلا أصبح خليفة للمسلمين ، و الرابع كان (عروة بن الزبير) و بالفعل أصبح من أعظم علماء المسلمين

و كلللل الأمثلة دى و غيرها ، أكبر بكثييييير من أن تكون مجرد مصادفة ، إنما كانت صورة مرسومة فى العقل و هدف محدد يتبعه تخطيط و يصاحبه عمل و اجتهاد ، و كل ده مع يقين شديد بالله –سبحانه و تعالى- بإنه لن يضيع أجر من أحسن عملا
و لذلك فسترى نتيجة عملك ، عندما تؤمن أولا بأنك تستطيع و تقدر

فانتبه لما تزرعه فى عقلك ، لأنك حتما ستحصده فى واقعك

فأحسن الظن بالله ، و أيا كان هدفك أو ما تريد أن تفعله ، فضع صورة فى ذهنك واضحة له ،و اضبط بوصلة عقلك فى اتجاه هذه الصورة ، و كلما كانت الصورة أكثر وضوحا كلما ساعدك ذلك على تحقيقها و ساعدك على معرفة ما ينبغى عمله للوصول إليها ، واكتب هذه الصورة، فــ ( كتابة الهدف تمثل 50% من تحقيقه) ، و بكتابتك له

بتثبت إنك بتؤمن به حقا و بتؤمن بحدوثه ، و حينها أبشر، لأنك حتما ...سترى عندما تؤمن ...، خاصة عندما تتبع ذلك بالتخطيط الجيد و السعى و الجهد المستمر المنظم ، و الأخذ بالأسباب كاملة ، و كن على يقين بأن الله –سبحانه و تعالى – سيحقق لك ظنك و يكرمك أيضا، و ما تتصوره فى عقلك ستجده حتما فى واقعك ، فتنفيذ هذه الصور سيكون بمثابة تحميض....تحميض لا مفرّ منه

وَهْم الفصل الخامس

2010-01-28T00:26:00.000-08:00

تفتكر الظروف هى اللى بتصنع الإنسان ؟ أو الإنسان باستطاعته أن يصبح ما يريد مهما كانت الظروف؟

صحيح طبعا و لا ننكر إن الظروف لها تأثير ، لكن ..مين اللى بيحدد نوع التأثير ده؟؟؟

الحقيقة إن علماء التنمية البشرية قالوا كلمتهم فى الموضوع ده، و هى إن

(الظروف لا تغير الإنسان و لكن تظهر ما بداخله)

!!!!!!!!!!!!!

معناه إيه الكلام ده؟؟؟

عارف مثلا لما إنسان يتعرض لموقف صعب فى حياته ، فيجد ناس وقفت بجانبه و ناس ثانية تخلت عنه و ناس ثالثة أصبحت بتإذيه، ساعتها بيقول الكلمة بشكل تلقائى و هى

(الظروف بينت لى الناس على حقيقتهم)

الجملة دى بليغة جدا بالرغم من بساطتها الظاهرية، لإن فعلا الظروف بتوضح معادن الناس و حقائقهم، أهو نفس الوضع ينطبق على كل إنسان بينه و بين نفسه فى ظروف حياته ، إنه هو كماااااااان

(الظروف هتبين له نفسه على حقيقتها)

يعنى مثلا ممكن تلاقى قدامك نماذج لثلاثة أشخاص ، و الثلاثة ظروفهم متشابهه جدا، سواءا كانت فقر أو ظروف اجتماعية صعبة ، أو ..أو ، و مع ذلك تلاقى واحد سرق و نهب و أذى من حوله، و التانى استسلم للوضع و فضل محلك سر و كل ما حد يطلب منه إنه يشغّل تفكيره شوية و يلاقى لنفسه مخرج من الوضع اللى هو فيه ، يقوم يشغّل تفكيره فعلا، و يلاقى لنفسه مخرج فعلا....بس مخرج يطلعه بره النجاح!!! و يؤدى به إنه يتوقف عن التعب و السعى، و عقله بيكون غاية فى الإبداع و هو بيدوّر على الأعذار المختلفة لنفسه علشان يلوم الظروف بدل ما يتحمل مسؤلية حياته . أما الثالث ، فده بيتعب جدا و بيسعى بكل جهده و كل شوية يصطدم بمعوقات فى طريقه ، لكنه بيكمل سعيه و يحاول بأكثر من طريقة علشان يحقق هدفه و يحسّن من وضعه، و فى نفس الوقت بيتقرب أكثر لربنا -سبحانه و تعالى- و يسأله إنه يعينه و يتولى أمره ، لأن عنده ثقة كبيرة فى الله إنه هيوفقه و مش هيضيعه أبدااا ، طالما هو اجتهد و أخذ بالأسباب كاااااملة ، و بالطرق الحلال

يعنى الثلاثة تعرضوا لنفس الظروف و لكن رد فعل كل واحد فيهم اختلف، و رد فعل كل واحد فيهم بيعبر عن شخصيته و أفكاره و معدنه الحقيقى

النموذجين اللى فى البداية، النموذج الأول- للإنسان اللى تسبب فى الأذى لنفسه و لمن حوله- ، و النموذج الثانى -للإنسان اللى استسلم لوضعه و قال خلااااص مفيش فايدة-، الاثنين دول مبدعين جداااااا، أيوة بجد مبدعين ، دى مش غلطة مطبعية و لا سخرية ، هم فعلا مبدعون لأنهم بيبدعوا فى إيجاد الأعذار لأنفسهم علشان يعملوا اللى هم عايزينه سواءا كان أذى للناس، أو استسلام للأمر الواقع

فطريقة الإبداع فى إيجاد الأعذار دى ، ممكن تشبهها بطريقة تفكير شخص ما ، ذهبت أنت إليه و طلبت منه إنه يساعدك فى الشغل مثلا، فلو مش عايز يساعدك أو مكسّل ، فهيبدع فى إيجاد الأعذار بالأحوال المناخية، فلو كنتم فى فصل الشتاء هيقول لك: "إيه ده بس؟ ده احنا فى الشتاء دلوقتى و الدنيا ساقعة و مطرة، و أنا مقدرش اشتغل فى الجو ده"

و لما تروح له فى الربيع ، فهيقول لك: " بقى فيه حد يشتغل فى الربيع و يسيب جمال الطبيعة و الزهور!!!! ، و بعدين ده ساعات بيبقى فيه رياح و الجو بيبقى كله تراب كده ، و مش مناسب للشغل خالص بصراحة"

و لو رحت له فى الصيف هيقول لك: "مش هينفع ، ده الدنيا حر و الشمس حامية و كده ، لأ لأ مش هينفع خاااالص"

و لما تروح له فى الخريف ، هيقول لك: "و بعدين بقىىىى؟؟؟ الجو بتاع ورق الشجر اللى بيقع ده بيضايقنى قوى و بيتعب لى نفسيتى ، و أنا بصراحة ما استحملش الجو ده إطلاقا ، و مش جو مناسب للشغل خالص بصراحة ، أنا مش عارف إنت بتفكر إزاى، إنت مش حاسس بالدنيا فيها إيه؟؟"

على قدر السخرية اللى فى المثال ده ، إلا إنه بيوضح جدااا العملية الذهنية للشخص اللى بيفكر بطريقة الإبداع فى إيجاد الأعذار، فى حين إنه ممكن يوجه إبداعه فى إنه يلاقى لنفسه حل بدل ما يلاقى لنفسه عذر، لأن اللى بيفكر بطريقة الإبداع فى إيجاد الأعذار ، هيفضل قاعد مستنى ظروف تفصيل زى ما هو عايزها، فيبقى كإنه منتظر فصل خامس وهمى من فصول السنة، فغالبا هيفضل منتظر كثييييييير ، لأن لو فضل بنفس طريقة تفكيره، فمهما اتغيرت الظروف من حوله ، هيفضل بررررضه يبدع فى إيجاد الأعذار لنفسه

أما اللى بيفكر بطريقة الإبداع فى إيجاد الحلول فهيفكر فى اتجاهين،

الإتجاه الأول ، إن فى أى ظرف يتعرض له هيجد ميزة يقدر يستخدمها لصالحه

الإتجاه الثانى، هو إنه يجد وسيلة علشان صعوبات الظرف ده لا تمنعه من تحقيق هدفه

و يوجد مثال بسيط و طريف عن شخص استخدم الطريقتين معا، شاهدت مرة إحدى البرامج الأجنبية عن الأفراح اللى حدث فيها أحداث غير تقليدية، و عرض فى إحدى حلقاته فرح تم إقامته فى حديقة مفتوحة و بالنهار - زى العديد من الأفراح الأمريكية- و كان الجو جميل جدا و صحو ، و كان فى ولاية أمريكية معروف عنها إنها ولاية مشمسة و ناااادرا ما تمطر، و لكن...على غير المتوقع و فى أثناء الفرح ، هبت رياح قوية جدااا قلبت الترابيزات على الناس و وقّعت الأعمدة ، و مش بس كده، ده بعد وقت قليل جدا بدأت تمطر ثلوج!!!!!!، و طبعا أطباق الأكل وقعت على هدوم المعازيم و فستان العروسة اتبهدل ، و الوضع كله أصبح فى منتهى الفوضى، و العروسة بدأت فى البكاء و أصدقاء العريس سخروا منه و قالوا له إنه مشؤوم و حظه سىء، و إن الزيجة دى باين عليها فاشلة من البداية، و ده طبعا غير ردود فعل المعازيم

تخيل احساس و رد فعل العريس و العروسة فى موقف زى ده هيكون عامل إزاااى؟؟؟

و لكن..العريس فكر إنه، إما هيستسلم للظروف و للشعور بالتعاسة يوم زفافه، أو إنه يستخدم الظروف لمصلحته، و يجد وسيلة لإتمام زفافه بفرحة و سرور، و ده اللى عمله فعلا ،........... فأدرك ميزة إن يكون فرحه وسط الثلوج، و بما إن هدوم المعازيم كده كده متبهدله، فتعاون مع أصدقائه و قاموا بتجهيز مساحة وسط الثلوج، و عملوا سباق تزحلق و انزلاق على الثلوج اللى فى الأرض، ..و شوية و انضم لهم المعازيم ، و بدؤا كل المعازيم و العريس و العروسة يعملوا كور ثلجية و يحدفوا بعض بيها ،و يجروا ،و يلعبوا ،و يقعوا على الأرض، و يضحكوا ،و يحدفوا بعض بالأكل اللى وقع ،و يستمتعوا بوقتهم كإنهم فى رحلة، و تغير الحال تماماااا و أصبح الفرح كإنه مدينة ملاهى

فطريقة التفكير وجّهت العريس إنه يتأقلم مع الظروف و يستخدمها لمصلحته، فهو بكده عمل زى المثل الرااااائع اللى بيقول

(لا تلعن الطقس و لكن ارتدى الزى المناسب)

وبالنسبة لتطبيق ده على مستوى مواقف أوسع و أشمل ، فلما تبقى طريقة تفكيرك فى اتجاه أن تستخدم ظروفك لصالحك، فيبقى كده زى طريقة تفكير الإمام ابن تيمية - رحمه الله- لما كان بيقول

" ماذا يفعل بى أعدائى؟ فقتلى شهادة ، و سجنى خلوة، و نفيى سياحة"

يعنى لسان حاله بيقول إن أى ظرف هتضعونى فيه ، هاستخدمه لمصلحتى، لو قتلتونى، يبقى هاموت شهيد، و لو سجنتونى ، أهى خلوة مع الله -عز وجل- و فرصة للعبادة و التأمل ، و لو قمتم بنفيى و أخرجتمونى برة البلد ، أهى ترفيه و سياحة لى

يعنى مهما يفعلوا معه، برررررضه هيستخدم الظروف لصالحه

فكّر كده بنفس الطريقة دى على ظروفك و شوف إحساسك و رد فعلك هيختلف قد إيه

طيب و طريقة الاتجاه الثانى، إن الإنسان لا يجعل الظروف تمنعه من تحقيق هدفه؟، و يجتهد لإيجاد وسيلة لتحقيق ما يريد، شوف هنا طريقة التفكير المبدع لإيجاد الحلول، ففى موقف حقيقى حصل لطالب علم عايز يروح يتعلم من عالِم معين، لكن العالِم ده موجود فى بلد بعيدة، فقرر الطالب إن حاجز المسافة مش هيمنعه، و أخذ المسافة سيرا على الأقدام من أسبانيا للعراق، و بعد ما أخيرا وصل للبلد اللى فيها العالِم اتصدم...اتصدم بإيه؟؟؟

بإن العالِم مسجون فى بيته و غير مسموح له إنه يعلم الناس

!!!!!!!!!!!!!!!!

فطبعا كان صدمة لطالب العلم بعد ما سافر المسافة دى كلها، و لو توقف فى سعيه هنا و قال إنه سعى و اجتهد و سافر و لكنه صدم بالواقع، فغالبا لم يكن ليلومه أحد، و كانوا هيقولوا إنه عمل اللى عليه و زيادة

و لكن هو لإن بداخله رغبة حقيقية و عايز بجد يوصل لهدفه مهما كانت الظروف، ففكر بطريقة الإبداع فى إيجاد الحلول

و توصل فعلا لحل مبدع، و هو ...إنه يمر على بيت العالِم كل يوم و لو لدقائق معدودة و هو متنكر فى هيئة شحات!!!!، فيتنكر فى هذه الهيئة و يعدى جنب بيت العالم كل يوم و هو ينادى كما ينادى المتسولون، فيدخِلُه العالِم إلى بيته لمدة دقائق معدودة يستثمرها الطالب ليعرف منه و لو القليل من العلم

كلللل ده علشان يوصل لهدفه مهما كانت الظروف، و فعلا تعلم هذا الطالب ، و كان تلميذا نجيبا، و هذا الطالب هو (بقى بن مخلد الأندلسى) و العالِم هو الإمام الجليل أحمد بن حنبل

و الأمثلة دى على سبيل المثال فقط ، لا الحصر، و قصص الناجحين مليييييئة بمواقف من هذه النوعية ، و من أكثر الحاجات اللى تساعدك - بإذن الله -على أن توجّه طريقة تفكيرك فى ظروفك بشكل يساعدك على النجاح، هى قراءة قصص حياة الناجحين ، و كيف كانت ظروفهم غاية فى الصعوبة و مع ذلك نجحوا و تفوقوا و حققوا أهدافهم

و كما ذكرت فى مقالة سابقة لى، إن ربنا -سبحانه و تعالى- قال فى سورة البقرة

"لا يُكلّف الله نَفسًا إلا وُسْعَها لَها مَا كَسَبت و عَلَيْها ما اكتَسَبَت"

صدق الله العظيم

يعنى ربنا -سبحانه و تعالى - مش هيكلفك غير بما تقدر عليه، فطالما إن ربنا وضع فى طريقك ظروف معينة، فتأكد إنك بطريقة أو بأخرى تقدر تستخدم الظروف دى لصالحك أو تتغلب عليها وبالطرق الحلال، فحتى لو الظروف اللى حواليك ممكن تكون مش بإيدك، لكن رد فعلك أنت تجاه الظروف دى ، فى إيدك و هتتحاسب على رد فعلك ده ، و لك ما لك ، و عليك ما عليك

فاستعن بالله و خذ بالأسباب كاملة و لا تبدع فى إيجاد الأعذار ، و ابدع فى توظيف الظروف لصالحك و فى إيجاد الحلول التى تساعدك فى تحقيق أهدافك ، و لا تضيع حياتك فى انتظار وَهْم...وَهْم الفصل الخامس

=======================

التحديث

http://advsarab.blogspot.com/2010/02/blog-post.html

اصنع ( نوبل ) الخاصة بك

2010-01-14T15:42:00.000-08:00

" هل انت مقدر نفسك؟"

من ضمن الحاجات المهمة للإنسان ، إنه يشعر بإنه متقدر من الآخرين ، و لكن السؤال الأهم، و قبل ما تكون بتسعى للتقدير من الغير، هو: هل أنت بتقدر نفسك بشكل إيجابى سليم؟؟؟؟

شكل إيجابى سليم إزاى يعنى؟؟؟؟

يعنى مثلا، تكون مش بتقلل من نفسك كل شوية ، و مش بتقول على نفسك صفات سيئة ، و إنك تكون بتقدّر قيمة نفسك و بتشعر إنك بتعمل حاجة مفيدة، مهما كانت الحاجة المفيدة دى صغيرة فى شكلها، و لكنك بيكون عندك ثقة إن لها أثر و عمق فى حياة الآخرين، حتى و لو كان الأثر ده ، مجرد رسم ابتسامة على وجوه الغير. و إن تكون معظم الأعمال اللى بتقوم بها بتاخد فيها نية كبيرة لربنا سبحانه و تعالى، فبتكون طامحا فى الثواب الكبير اللى على قدر نيتك الكبيرة،و لأنك بتعمل كل ده فالنتيجة إنك فى خلال يومك بتكون فى حالة من الإمتنان و الرضا، و بالتالى، بيكون عندك إحساس بالسعادة والثقة بالنفس

أتمنى بجد إنك تكون بتفكر بالطريقة دى، و تكون بتقدّر نفسك بشكل إيجابى ،..مع ذلك ، فأظن إن كثير من الناس مش بيفكروا كده، ده ممكن يكونوا بيفكروا بطريقة عكس كده تماما

طيب إزاى نفكر بالطريقة الإيجابية اللى ذكرناها؟؟؟؟؟؟

أول حاجة لازم تدركها جيدا ، إن الشخص اللى بيفكر فى نفسه بشكل إيجابى صحى و سليم، هو فى حقيقة الامر إنسان نافع للغير ، و لكن على الجانب الآخر ، الشخص اللى بيقلل من نفسه بشكل كبير، فده بيمارس نوع من أنواع الأنانية

!!!!!!!!!!!!!!!!

نعم.....الأنانية، إزاااى؟؟؟؟؟

ممكن حد يفتكر إن الإنسان لما يبحث عن إيجابياته و يقدّر نفسه ، فده نوع من أنواع الغرور أو التفكير فى النفس الزائد عن اللزوم أو التمركز حول الذات و الأنانية، و علشان كده ،و علشان يثبت لنفسه إنه إنسان معتدل و مش أنانى و لا حاجة ، فبيعدد سلبياته بشكل متكرر و يركز عليها و يضيف عليها كمان ، و مش بعيد يبدأ يقولها للناس، فى حين إن الحقيقة اللى هو مش مدركها إنه هو كده مش معتدل و لا حاجة، ده بالطريقة دى، بيبقى هو اللى متمركز حول ذاته و بيمارس نوع من أنواع الأنانية

فالشخص المغرور متمركز حول ذاته بإنه بيفكر فى نفسه كثير و بيزود من الأنا بتاعته زيادة عن اللزوم، أما بالنسبة للشخص اللى بيقلل من قيمته باستمرار، فهو برضه متمركز حول ذاته ، و بررررضه بيفكر فى نفسه كثير ، و لكنه بيقلل منها زيادة عن اللزوم

ممكن تكون أول مرة تنظر لها بالنظرة دى، إن كلا الشخصين بيتمركزوا حول نفسهم بشكل مبالغ فيه، و لكن واحد بالزيادة قوى ، و التانى بالناقص قوى.

و يمكن كثير من الناس بتتجه للتركيز على سلبياتها ، ظنا منهم إن دى حاجة كويسة وصفة جميلة، و إنهم كده فى الأمان و بعيدين كل البعد عن الأنانية و عن التمركز حول الذات، و كمان لإن المجتمع و المفاهيم الموجودة بتساعد على حاجة زى كده، فالنتيجة إنهم بيتجهوا للسلوك ده أكثر، ظنا منهم إنهم كده تمام و فى السليم

!!!!!!!!!!!!!!!!!!

و لكن العكس هو الصحيح، و لما الإنسان يقلل من قيمته باستمرار، فده هيكون تأثيره سلبى جدا على ثقته بنفسه، فتقدر توصف وضع الشخص ده ببساطة

(إنه قلل ثقته بنفسه من كُتر ما فكر فى نفسه)

و النتيجة الطبيعية لكده إنه هيشعر بالضيق و الإحباط

طب وليه ده كله؟؟ انت قادر-بعون الله- على إنك تقدّر نفسك بشكل إيجابى و تستمتع بحياتك بما يرضى الله و بما ينفعك و ينفع غيرك، ....و مع ذلك ممكن حد يكون بيسأل نفسه ( طيب هو هيقدر نفسه ليه ؟ و على إيه؟ ) ، و الإجابة ببساطة......إن يكفى إن ربنا -سبحانه وتعالى- اختارك و اصطفاك أنت لتكون أسمى و أكثر الكائنات تعقيدا و أكثرهم رُقيّا، ربنا -سبحانه و تعالى- اختارك أنت لتكون بشرا، ....أحيانا بنشوف الكائنات الأخرى ، زى نملة أو ذبابة أو أى كائن آخر ، سواءا على الطبيعة أو فى برامج التليفزيون، و بنتعجب من شكله و من طريقة حياته و من عاداته الغذائية، و بننسى إن كان ممكن جدااااااا أى حد من الناس اللى بيتفرجوا دول يكون هو نفسه الكائن الآخر ده ، و ساعتها كان باقى البشر هينظروا لحياته بتعجب، أو يستخدموا حياته لتصوير برنامج تليفزيونى، أو يعملوا عليه تجارب، أو يخترعوا حاجة لقتله و التخلص منه أو أو أو، و لكن بدلا من ذلك كله ، اختارك الله -سبحانه و تعالى- و فضّلك و كرمك بألا تكون أحدا من هذه الكائنات، و بإن تكون المكلّف بخلافة الله فى الأرض، ...أكيد ده له دلالة كبيرة على قيمتك فى الحياة

و لذلك، فتقديرك لنفسك الصحى السليم، هو فى حقيقته هيكون مش نابع من كبر الأنا و من التكبر و العياذ بالله، و لكن هيكون نابع من تقديرك لتكريم ربنا -سبحانه و تعالى- لك ، و شكرك على نِعَمُه عليك التى لا تعد و لا تحصى ، و حينها هتستمد طاقة تقديرك لنفسك من امتنانك لهذا التكريم و من شكرك على هذه النِعَم، و من عدم إنكارك لكل ذلك ، فلا يجوز أبدا أبدا و لا يصح إن الإنسان يقلل من قيمة هذه النعم و هو متصور إنه بالشكل ده يبقى إنسان كويس و متواضع

!!!!!!!!!!!!!!!!

فقد قال الله تعالى فى كتابه الكريم " و لقدْ مَكّناكُم فِى الأَرضٍ و جَعَلنا لَكُم فِيهَا مَعايِشَ قَلِيلاً ما تَشْكُرُون* و لَقَد خَلقْنَاكُم ثُم صَوّرنَاكُم ثُم قُلنا لِلمَلائكَةِ اسجُدوا لأدَمَ فَسَجَدوا إلا إبليسَ لم يكُن مِنَ السَاجِدين" صدق الله العظيم (سورة الأعراف- آية 10، 11)

شوف تكريم ربنا سبحانه و تعالى لك ، و شوف قوله تعالى ( قليلا ما تشكرون)، فاستشعر عظمة هذا التكريم و كن أنت من الشاكرين ، وكن فى حالة امتنان لنعم الله عليك، و استشعر مسؤليتك تجاه النعم دى و تجاه دورك فى الحياة كإنسان ، وعندها هتشعر بسعادة و راحة نفسية و هتقدر تفيد من حولك و تنجز وتشعر بسعادة الإنجاز، مهما كان الأنجاز ده صغير فى مظهره، طالما إنه شىء حلال

و يوجد الموقف المعروف فى مجال التنمية البشرية عن عاملىّ بناء مشتركين فى بناء نفس المبنى ، و عندما تم توجيه سؤال لأحد العاملين عن طبيعة عمله ، فأجاب بممل إنه لا يفعل شىء سوى وضع و ترتيب بعض الطوب و الأعمدة . و عندما تم توجيه نفس السؤال للعامل آخر، كانت الإجابة مختلفة تماما ، لإنه أجاب باعتزاز وفرحة بإنه بيقوم ببناء صرح عملاق ....... هل لاحظت الفرق؟ كلاهما كان بيعمل نفس العمل و لكن رؤية كل واحد منهما لما يفعله و تقديره لهذا العمل مختلفة ، ليه؟؟؟ لإن الرؤية دى نابعة من تقدير كل واحد لقيمة نفسه ، و بالتالى قيمة اللى نَفسُه دى بتعمله.

وعندما سُإلت سيدة ألمانية عن وظيفتها ، فأجابت بأنها مدرسة رياض أطفال ، و لكن الطريقة السعيدة و الفخورة اللى أجابت بها جعلت السائل يسألها " إنت بتحبى شغلك قوى كده؟" ، فأجابت بكل اعتزاز : " طبعا، أنا بابنى ألمانيا المستقبل" ،

يااااااه ، انظر لرؤيتها لنفسها إنها إنسانة مؤثرة وإن لها بصمتها و أهميتها فى المجتمع ، جعلها تنظر لعمق ما تفعله ، و تقدّر ده بشدة و تدرك إن مستقبل بلدها بيعتمد عليها و على معاملتها لهؤلاء الأطفال. لك إنك تتخيل الفرق بين مدرّسة بتقدر قيمة نفسها و بتنظر لما تفعله على إنها بتبنى مستقبل بلادها ، و أخرى لا تقدر قيمة نفسها و صورتها عن نفسها سلبية و سيئة فبتنظر لعملها على إنها مجرد بتروح المدرسة تدى كام حصة و خلاص،.... و ابدأ بقى تصور و تخيل الصورتين فى كل المهن و كل الفئات، و شوف الفرق

تفتكر مين اللى هينجح أكثر ، مين اللى هيكون أسعد ؟ مين اللى هيؤثر بشكل إيجابى فى من حوله أكثر؟؟؟

أكيد انت عرفت الإجابة، أكيد الشخص اللى مقدر نفسه تقدير إيجابى سليم ، ...و علشان كده هتجد إن تقدير الذات الصحى الإيجابى بعييييييد كل البعد عن فكرة الأنانية و التمحور حول الذات ، ده العكس هو الصحيح ؛ فكل من يقدّر نفسه ، سيقدّر ما يفعله و يرى عمق تأثيره ، و سيجتهد للنجاح ولإفادة الآخرين ، و هيتقن فى عمله لأن عمله الجيد هيكون انعكاس لذاته الجيدة.

و سبحان الله ، من المنظور الإيمانى هنجد إن الإسلام حث على إن كل حاجة نعملها ناخد فيها نية كبيرة لله –سبحانه و تعالى – ، و على قدر كبر النية و على قدر التفكير فى معانى أعمق و تأثير أوسع لما تفعله، كلما كبر ثوابك بسبب كبر نيتك،... و من منظور التنمية البشرية ، هنجد تأثير ده ، إن كلما كان تفكيرك فى معانى أكبر و أعمق لما تفعله ، كلما زاد تقديرك لنفسك و ثقتك فى نفسك و زاد إتقانك لعملك و إفادتك لمن حولك و زاد إنجازك فى الحياة، و الإنجاز ده يعتبر من أكبر القوى المحفزة ، و من أقوى الحاجات اللى بتقضى على الإحباط ، و من أكثر المشاعر التى تبعث على السعادة و الرضا و الثقة بالنفس.

و إذا كان سبق لك محاولات غير ناجحة أو سبق لك أن فعلت أشياء تتضايق أو تخجل منها ، فأنت قادر إنك تغير ده حالا و تقرر من الآن فصاعدا إنك ستتخلى عن أنانية التفكير السىء فى الذات، و هتشجع نفسك ، فممكن الإنسان يتضايق عندما لا يجد تشجيعا من الآخرين و لكن لازم ياخد باله علشان لا يكون هو نفسه واحد من الآخرين دول اللى مش بيشجعوه ،.. و مهما حصل تقدر تقرر إنك تقدر قيمة نفسك و قيمة ما تفعله ، يعنى أى حاجة سيئة هتكون عملتها ،مش هتكون أكثر من ديناميت (ألفريد نوبل)

!!!!!!!!!!!!!!!!

فالعالم الشهير (ألفريد نوبل) مخترع الديناميت ، فى الأصل فكّر فى اختراع الديناميت لتسهيل حفر المناجم ، و لكن اللى لم يكن فى حسبانه إن الديناميت هيستخدم كسلاح فى الحروب و هيستخدم لقتل الآلاف من الناس.

تصور كده فكرة إن واحد ينظر لنفسه كل يوم و يتخيل إنه سبب فى مرض و تشريد و قتل الآلاف من الرجال و النساء والأطفال،.... لدرجة إن إحدى الصحف الفرنسية لقبته بـ ( تاجر الموت) و بأنه ( الشخص الذى أصبح ثريا عن طريق إيجاد أسرع الطرق لقتل الآخرين) ،............ و مع إن استخدام اختراعه استخداما خاطئا ، لم يكن خطؤه هو أو ذنبه هو ، و لكنه شعر بالندم و الضيق الشديد لذلك . كان من الممكن جدا إنه يفكر فى نفسه على إنه إنسان سىء و عالِم مدمر أدى إلى دمار العالم بدلا من إفادته ، و كان ممكن جدا يستسلم للفكرة دى و يدخل فى دوامة الإحباط و هدم و تدمير الذات بالمزيد و المزيد من الأفكار السلبية، لكن هو لم يفعل ذلك ، و لإنه مقدر نفسه صح و عنده صورة إيجابية عن ذاته ، رفض و تمرد على فكرة إن دى تكون آخر حاجة يسيبها للبشرية ، و لا يمكن إن اسمه يقترن بالخراب و الدمار، و علشان كده ، لم يستسلم و قرر يعمل عمل مفيد و سخر ثروته الكبيرة لعمل جائزة (نوبل)؛ ليتم منحها للذين أثروا فى حياة البشر بشكل إيجابى و لتشجيع العلماء من جميع أنحاء العالم على نفع البشرية.

و من خلال تقديره الإيجابى لذاته استطاع إنه يعبّر عن معدنه و جوهره الحقيقى كعالِم يريد الخير و النفع و ليس الدمار و القتل.

و بالنسبة لك ، أيا كانت الأشياء الغير الناجحة أو الغير جيدة التى بدرت منك فى الماضى تجاه نفسك أو تجاه أى أحد – بقصد منك أو بدون قصد- فمش هتكون سببت دمار و أذى قد اللى سببه الديناميت، و من رحمة ربنا سبحانه و تعالى إن أبواب مغفرته و رحمته للناس مفتوحة دائما ، قال تعالى " قُل يَا عِبَادِى الذينَ أسْرَفُوا على أنفُسِهِم لا تقنَطُوا مِن رَحْمَةِ الله إنّ اللهَ يغفِرُ الذّنُوبَ جَمِيعًا إنّهُ هُوُ الغَفُورُ الرحِيم" صدق الله العظيم (سورة الزمر- آية 53)

و اقتران الياء بلفظة عبادى ، يدل على تشريف و تكريم عظيم لك، فتذكر أنك عبدا لله ، و ده فى حد ذاته أكبر قيمة و تشريف ممكن تناله ، فلابد أن تستمد من ذلك قيمتك وأن تقدر ذاتك بشكل إيجابى و تكون فى حالة امتنان و شكر ، فأنت خليفة الله فى الأرض و ربنا سبحانه و تعالى نفخ فيك من روحه ، كما قال تعالى " فَإذا سَوّيتُه و نَفَختُ فيهِ مِن روحِى فَقَعُوا له سَاجِدِين" صدق الله العظيم (سورة ص- آية 72)

و عندما ترى نفسك بأنك قيّم ، فلابد أنك ستفعل ما يعبر عن قيمتك ، و عندها تجتهد و تسعى لإفادة الغير و للنجاح بشكل أكبر و بسعادة أكثر، فمن الآن فصاعدا ،تذكر أنه من الأنانية أن تقلل من قيمة نفسك ، فقدّر نفسك جيدا و فكر فى معانى أكبر لكل ما تفعله ، و اتقن فيه و اجعله خير انعكاس لتقديرك الإيجابى لذاتك

و كما صنع (ألفريد نوبل) جوائز( نوبل) و أفاد الغير ، فافعل انت أيضا ما تعبر به عن تقديرك لنفسك و ما تفيد به غيرك، و اصنع ( نوبل ) الخاصة بك

==================================

معذرة لطول فترة الغياب الماضية و التى افتقدتكم جميعا فيها ، جزاكم الله خيرا على السؤال و الاهتمام ،

بارك الله فيكم جميعا و وفقنا لما يحب و يرضى

اجتهد بأسلوب النظرية النسبية

2009-11-05T22:32:00.000-08:00

"عندك كام سنة؟"

، سؤال بيتسأل كل يوم من شخص للتانى ، ممكن علشان يتعرف عليه أكتر أو يمكن علشان يقيّم مستوى تفكيره أو إنجازه فى الحياه أو حتى علشان يقيّم صحته، إنما لما الانسان يقعد كده يفكر مع نفسه " هو أنا بقى عندى كام سنه؟" يا ترى بيقيّم إيه ؟ شكله، صحته، مستواه الاجتماعى أوالمادى أو العلمى ، إنجازاته فى الحياة ، أو أو ، طب و بعد ما بيقيم ، ياترى بيزعل و اللا بيفرح ؟ ، و لما بتفكر فى سنك بتحس إنك لسه سنك أقل من إنك تعمل حاجة مفيدة و فيها إنجاز ، و اللا بتزعل على الوقت اللى ضاع و كان ممكن يتعمل فيه حاجات كتير و ماعملتهاش

طب أسألك ،هو أنهى سن بالضبط اللى بتقيّم على أساسه ؟؟؟
يعنى إيه السؤال ده؟؟؟

!!!!!
المفروض إنه السن من تاريخ الميلاد، ده العادى يعنى

!!!!!

أيوه أكيد ده سن مهم و بيحدد أشياء كثيرة ، فمثلا مش هاطلب من طفل عنده سبع سنوات إنه يعمل عمليه جراحية معقدة لمريض على وشك الوفاة ، و لو إنها حصلت فعلا فى الهند و العملية دى نجحت، وعمليات غيرها كتير، و الطفل ده بقى بيعالج القرية بأكملها بأفضل الطرق الطبية اللى اتعلمها من خبرته – أيييييييوة خبرته- و مذاكرته للكتب و المراجع الطبية وعُرض عليه منحة لدراسة الطب فى الولايات المتحدة ،

إنما هنا بنسأل عن ما وراء السن اللى فى شهادة الميلاد ؟؟ عن تقييمك و احساسك بالسن ده بعد ما بتتذكره ، بتقيم نفسك على أساس إيه؟ هل على أساس رقم شهادة الميلاد فقط ؟؟ و اللا بتقّيم سنك بالنسبة لــــ، عمرك الحيوى – اللى له علاقة بكفاءة وظائف الجسم و الصحة عموما - ، و اللا عمرك العقلى – اللى له علاقة بنضج تفكيرك و اهتماماتك و مدى اطلاعك ، و اللا عمرك الإجتماعى – اللى له علاقة بذكاءك فى التعامل مع الناس فى شتى المواقف و فهم أنماط الناس و خبراتك الحياتية ، و اللا عمرك كقدر إنجازك فى الحياه؟؟
ده الواحد طلع عنده كذا عُمر ، مش كده؟
و على فكرة مش شرط إطلاااااقا إن أى عُمر من الأعمار دى يساوى سنك الحقيقى ، ده ممكن جدااااا كل حاجة من دول تطلع برقم مختلف تماااااااما عن سنك ، يعنى موضوع العمر ده بيختلف من واحد للتانى حسب الجوانب اللى ذكرناها ، و اللى مهم إنك تفكر فيها كلها ، مش فى جانب واحد فقط ،....... فعُمرك و حياتك أعمق بكتير من مجرد فكرة إنت عاصرت الأرض لما دارت حوالين الشمس كام مرة،.......يعنى كوكب عطارد –مثلا - السنة فيه بقيمة ثمانية و ثمانين يوم أرضى، يعنى إذا كان عندك عشرين سنة ، فبحسابات عطارد يبقى عندك ثلاثة و ثمانين سنة!!!!!! ، و لو بحسابات كوكب زحل اللى السنة عليه بقيمة تسعة و عشرين سنة أرضية و نصف ، يبقى كده عمرك لسه يادوب كام شهر!!!!!!، يعنى لما تفكر فيها من الناحية الزمنية كأرقام و حسابات ، هتجد إن المسألة كلها نسبية تماما ، مش بس بالنسبة للكواكب و لكن فى حياتك كمان، إزاااى؟؟

لما اتكلم أينشتاين عن النسبية قال إن "كل ما الجسم تكون حركته أسرع ، كلما يتباطأ الزمن بالنسبه له" ، و بدون الدخول فى تفاصيل النظرية ولكن يقصد بتشبيه بسيط ، إن لو أخين توأم ، واحد فيهم فضل على سطح الأرض – بسرعة الأرض الطبيعية- ، و التانى طلع فى صاروخ فضائى بيطير بسرعة عالية جدا جدا ، فبعد ستين سنة كده ، هيكون الأخ اللى فضل على الأرض عجّز و كبر، إنما الأخ اللى طار بسرعة عاليه جدا جدا لسة شباب
!!!!!!!!!!
ليه؟؟
لأن لسرعته العالية ، الزمن عدّى بالنسبة له ببطأ شديد فلم يكبر كثيرا فى السن، و الكلام ده علمى و حقيقى فعلا و تم إثباته من وقت أينشتاين، إنما المهم هنا ،إننا ممكن نستفيد من الكلام ده و نطبقه على عُمرنا و حياتنا إزااااى؟؟

أكيد، أكيد ،أكيد يعنى ما أقصدش إن كل واحد يجيب صاروخ فضائى و يركبه و يطلع الفضاء علشان الوقت عليه يمر ببطء، و لما يرجع يغيظ أصحابه علشان كلهم بقوا عواجيز و هو لسه شباب!!!!! ،...................إنما اللى باتكلم عليه هنا جملة أينشتاين " كل ما الجسم تكون حركته أسرع ، كلما يتباطأ الزمن بالنسبه له" ، ولكننى هنا نظرت لها بمنظور مختلف ، منظور سرعة الاجتهاد و السعى فى الحياة، إنه كلما سعيت أكثر و أجتهدت أكثر و كنت جادا فى سعيك و نظمت أنشطتك ، فستنجز فى وقت أقل ( لأنك أحسنت استخدام الوقت)، و بمرور الأيام، يبقى هتنجز أيضا فى عُمر أقل ، و كإن –مجازا يعنى – سرعة الزمن تباطأت بالنسبة للسرعة العالية لحركة إجتهادك ، و نقدر نقول إنك كده، بتجتهد بأسلوب النظرية النسبية

و أمثلة الناس اللى طبقت الكلام ده كتير، فمثلا حد زى (هايزنبرج) صاحب نظرية ميكانيكا الكم ، حصل على الدكتوراه و هو فى سن الثانية و العشرين و حصل على جائزة نوبل و هو عنده واحد و ثلاثين سنة !!!!!!!!!!!، أكيد إجتهاده كان كبير، و كمان حبه لعمله كان كبير علشان كده أنجز فى سنّه ما ينجزه الآخرون فى سن أكبر منه بكثير ، و الأمثلة عدييييدة جدا ، زى العالم الأندلسى ( ابن جُلجُل) و اللى أثرى علمَى الطب و النبات إثراءا عظيما ، عاش –فقط- لمدة اثنين و ثلاثين سنة ، و (مارى كورى) حصلت على جائزة نوبل الأولى و هى عندها ستة و ثلاثين سنة ، و الثانية و هى عندها أربعة و أربعين سنة ، و غيرهم و غيرهم الكثير

فلا تستهين بعمرك أبدا و لا يكون ذلك سببا لكى لا تثق فى نفسك، فمهما كان عمرك، تقدر بحسن اجتهادك و تنمية مواهبك ، و قبل كل ذلك بتوفيق من الله – سبحانه و تعالى – أن يبارك الله لك فى الوقت و تحسن استغلال عمرك فى جوانب حياتك المختلفة،

و إذا كنت من اللى بيفكروا إن الوقت عدّى خلاص و حاجات كتير كان ممكن تعملها و معملهتاش، فأقول لك ببساطة شديدة ، إنه طالما انت لسه عايش –أكيد عايش طالما بتقرأ هذه السطور- يبقى لا داعى لأن تقتل عزيمتك و جسدك مازال حيا، و اجتهد بطريقة النظرية النسبية ،وعوّض ما فاتك ، فكما يقولون "لا يوجد ما يسمى بمتأخر زيادة عن اللزوم"
"It is never too late"
و من المقولات الرائعة فى التنمية البشرية " غدا هو أول يوم فى حياتك القادمة"، فمهما مرّ من الوقت ، فتذكر إن دائما أمامك وقت آخر، فما لا يُدرك كله .. لا يُترك كله،

فإنسان مثل (العز بن عبد السلام) بدأ – و لاحظ كلمة بدأ- يتفرغ للعلم الشرعى و هو عنده واحد و خمسين سنة ، و النتيجة إنه أصبح سلطان العلماء.....، و فى زمننا المعاصر (هارلند ساندرز) مؤسس و صاحب خلطة دجاج كنتاكى الشهيرة ، بدأ مشروعه و هو عنده خمسة و ستين سنة، و عاش لحد ماشاف مشروعه و حلمه بيكبر أمامه ، لغاية ما مات وهو عنده تسعين سنة، يعنى إذا افترضنا – مجرد فرض- إنه ما كنش بدأ مشروعه و قال كلام من نوعية " خلاص أنا راحت عليّه" أو "أهيه عيشة و السلام "، أواتنهد كده و قال: " إييييييه.. يللا بقى حسن الختام"، كان زمانه فضل قاعد منتظر الختام ده خمسة و عشرين سنة !!!!!!!!!، و لكن بدلا من ذلك قضى الفترة دى فى السعى الإيجابى لهدفه و استمتع بسعيه كمان ، و عالِم الإقتصاد (ويليام فيكرى) اللى فضل مكمّل فى عمله و أبحاثه بالرغم من كونه فوق الثمانين، و لحق إنه يحقق حلم نوبل و هو عنده اثنين و ثمانين سنة ، و عرف بخبر فوزه بالجائزة قبل ثلاثة أيام فقط من وفاته....، يعنى حرفيا اجتهد حتى آخر عمره و استمتع بثمرة إنجازه

و الشىء المشترك بين كلللل من ذكرتهم فى البوست إنهم قرروا يستمتعوا بحياتهم و ينجزوا فيها، بإن يفعلوا ما يحبونه و يسعون فيه باجتهاد و تواضع و إخلاص ، و بصرف النظر عن عدد دورات الأرض حول الشمس و المكتوب رقمها فى شهادة الميلاد

فكن مثل هؤلاء ، و اعلم إن الموت يقين ،و إلى أن تصل لهذا اليقين ، فمهما كان عمرك ، أنت مازلت حيا ، فاستمتع بهذه الحياة التى منحها الله لك ، و اجتهد فيها....... بما يُرضى الله ،..... و بما يُرضيك يوم أن تلقاه
----------------------------------------------

ممكن يكون أحد أسباب اللى أدت لاختيارى لكتابة هذا الموضوع فى هذا التوقيت، هو اقتراب يوم ميلادى ( ال9 من نوفمبر) بإذن الله ، فأسألكم الدعاء بأن يمن الله علىّ و إياكم بالبركة فى العمر و حسن الخاتمة إن شاء الله

جزاكم الله خيرا

برد النجاح

2009-10-05T03:39:00.000-07:00

"الموضوع ده جربته قبل كده و حاولت فيه و مانفعش"

عمرك قلت الجملة دى قبل كده أو فكرت فيها؟، يعنى كان قدامك هدف معين و سعيت فعلا علشانه و اجتهدت و لكن النتيجة كانت غير مشجعه بالمرة و الموضوع مانفعش إطلاقا ؟

طيب إيه تصرفك ساعتها؟ ما هو يا إما هتزعل و تتضايق و هتسيب الموضوع خالص و تنسى الهدف ده ، يا إما هتزعل و تتضايق برضه –فى الأول شوية - و بعدين تكمل سعى لهدفك و تتعلم من التجربة اللى حصلت لك علشان تفيدك و انت بتكمل مشوارك

طيب فكر فى الاحتمال الأول كده ، لو هتوقف سعيك بسبب تجربة أو عقبة ضايقتك ، طيب لما توقف سعيك هل ضيقك ده هيقل ؟ هل التجربة كده اتمسحت من تفكيرك؟ بالعكس ده انت كده بتقوّى الضيق اللى جواك ده أكثر، ليه؟؟ لأن العقل البشرى بيبنى على آخر تجربة له ، فكل ما هتفكر فى الهدف اللى كنت بتسعى له، هتفتكر على طووووووول آخر محاولة لك و هتفضل راسخة فى ذهنك و هتتحول من مجرد محاولة غير ناجحة إلى ذكرى خالدة تضايقك كل شوية لما تفتكرها،...... ده لو كنت هتنسى أصلا.

أما الاحتمال التانى إنك هتتضايق شوية من اللى حصل ، و لكن هتعتبر إن اللى حصل انتهى و خلص خلاص ، فهتتعلم من التجربة و تكمل سعيك و تكمل طريقك ، ساعتها العقبة اللى حصلت دى هتبقى مجرد أزمة و عدّت وخلاص ، زى اللى ماشى فى الشارع و فجأة اتكعبل و وقع على الأرض و حصله جرح أو خدش أو أيا كان ، فهيعمل إيه؟ هيرتاح شوية و بعدين يقوم و ينفض هدومه و يمشى و يكمل طريقه ، لكن مش هيفضل قاعد جنب المكان اللى وقع فيه و يفكر فى المشوار اللى كان رايح له، و يزعل إنه ماوصلش المكان اللى كان عايز يروحه ،و كل ما حد يعدى جنبه فى الشارع و يقوله" مالك قاعد كده ليه محلك سر و مش بتقوم؟" ، فيقول لهم " أصل أنا اتكعبلت الأسبوع اللى فات"
!!!!!!!!!!!!!!!!!!!!!!!

ده بالضبط يبقى عمل زى السيدة الانجليزية اللى فضلت طريحة الفراش لفترة طويلة بسبب دور برد (مش انفلوانزا خنازير و لا طيور) ، دى حادثة حقيقة حصلت فعلا إن السيدة دى و هى عندها 34 سنة أصيبت بدور برد ، و لما جالها الطبيب قال لها ترتاح و تفضل فى السرير لغاية لما يبقى يكشف عليها تانى ، و بعد كام يوم هى اتحسنت خلاص و خّفت من البرد ، بس ماقامتش من السرير ، ليييه؟ لأنها مستنية الدكتور لما يجيى تانى ، لكن اللى حصل إن الدكتور نسى يجيلها ، و هى اتحججت بكده فى البداية و فضلت فى السرير ، لغاية لما مرّ يوم ورا التانى و هى مستسلمة تمااااااما للمرض - اللى جه و خلاص انتهى و هى خفت منه -، و اليوم و التانى، بقوا سنة و التانية ،لغاية لما بقوا أربعين سنة ، أييييييييوة أربعين سنة طريحة الفراش بسبب دور برد،
!!!!!!!!!!!!!!

لغاية لما طبيب جالها و هى فى الخامسة و السبعين و لقى إن وزنها بقى كبير للدرجة إن إذا هى حتى عايزة تقوم من السرير ، فمش هتقدر، يعنى هى سلّمت نفسها لفكرة المرض –الوهمى اللى خلص خلاص- لغاية لما الفكرة كمان استلمتها

و لكن برضه فيه أمل ، لأن بعد الفترة دى كلها ، ساعدها الطبيب ده لحد ما قدرت تمشى تانى و تستمتع بما تبقى لها من العمر، و اللى كان – بالمناسبة – ثلاث سنوات كاملة

أهى العقبة اللى بتواجه أى انسان فى طريقه، عاملة زى دور البرد ده ، هيتعب منه شوية و هيتضايق شوية ، بس مسييييره هيخف، المهم بقى بعد ما يخف ، إما هيعمل زى السيدة الإنجليزية دى و يعيش على انقاض العقبة اللى انتهت ، يا إما هيقوم من العقبة دى و يكمّل حياته ، و كل مرة يقع ، يقف بعدها تانى على رجليه

و فيه أمثلة كتيرة جدا لناس وقفت على رجليها بعد ما وقعت، و على سبيل المثال لا الحصر ، رجل يابانى اسمه (سويتشيرو)، الراجل ده كان بيشتغل ليل مع نهار علشان يطور مفهوم حلقة الصمام اللى بتستخدم للسيارات و كان بيسعى إنه يبيع إنتاجه لشركة (تويوتا)، و بعد ما اشتغل على التصميم ده ليل و نهار و رهن مجوهرات زوجته ، أخيرا قدر يعمل حلقات الصمام دى و قدمها لـ (تويوتا ) ،

و لكـــن

......................
الشركة رفضتها و قالت إنها لا تتوافق مع مقاييسها

فرجع (سويتشيرو) يدرس تانى لمدة سنتين ، بعد سنتين من التعب ، أخيرا وافقت شركة (تويوتا) على انها تشترى منه منتجه لحلقة الصمام ، فكان لازم إنه يبنى معمل علشان يصنع فيه منتجاته ، فطلب من الحكومة امداده بالأسمنت اللازم لبناء المعمل،

و لكــن

......................
رفضت الحكومة اليابانية، لييه؟ لأنها كانت بتستعد للحرب ( اللى هى الحرب العالمية الثانية )

كان إيه رد فعله؟؟ حاول هو و زملائه يخترعوا طريقة لانتاج الأسمنت ، و فعلا نجحوا فى كده ، و أخييييييييييييييرا بنوا المعمل

و لكــن

......................

نزلت فووق المعمل قنبلة أمريكية هدمت أجزاؤه الرئيسية.

لكن هو لم يتوقف، و كمّل و رمم المعمل ، و أصبح المعمل جاهز للعمل

و لكــن

......................
نزلت فوووق نفس المعمل قنبلة أمريكية تاااانى، و برضه هدمت أجزاؤه الرئيسة .

بيتهيأ لى إنك انت نفسك تعبت له ، مش كده؟

و هو أكيد برضه تعب، بس المهم هو عمل إيه ؟؟؟ برررضه كمّل طريقه ، و رمم المعمل مرة أخرى ، و أصبح المعمل جاهز للعمل

و لكــن

......................
لا ..لأ.. مش زى كل مرة تنزل عليه قنبلة أمريكية تهدم أجزاؤه الرئيسية و الكلام ده

خااااااااااااااالص

، المرة دى بقى كان زلزال و هدم المعمل كله و دمره تدمير كاااااامل .

إيه رأيك؟؟؟
تفتكر هو لم يتضايق؟ لأ أكيد طبعا مرّ بلحظات من التعب و الضيق، تفتكر ماحدش سخر منه ؟، ماحدش قال عليه إنه نحس مثلا؟

كتييييييييييييييييييييييييييييييييييير ،

ولكن لو كان هيلتفت لسخرية الناس ماكنش هيشتغل ، و لو توقف بعد كل عقبة ، كان هيفضل طول عمره يسأل نفسه إنه يا ترى إذا كان كمّل طريقه كان هيوصل لحد فين ؟؟ ،و فضل (سويتشيرو) مكمّل سعيه و واجه معوقات عديدة وبذل محاولات كثيرة ،و يقع و يقوم ، و يقع و يقوم لغاية ما أصبحت شركته من كبار شركات السيارات فى العالم، و هى شركة .....هونـــــدا

فتأكد إنه كلما تعمل و تحسن العمل ، فأكيد أكيد ، ربنا –سبحانه و تعالى – مش هيضيع أجرك،
و كما قال الله – تعالى - فى القرآن الكريم
"إِنَّا لا نُضِيعُ أَجْرَ مَنْ أَحْسَنَ عَمَلاً" صدق الله العظيم
(سورة الكهف)

فإذا واجهتك أى عقبة ، توقف قليلا و التقط انفاسك علشان تقيّم طريقك و تتعلم من العقبات دى، و افتكر دائما إن ( من سار على الدرب وصل ) مهما كان الدرب ده طويل ، و زى ما أى إنسان معرّض إنه يجيله أدوار عديدة من البرد على مسار حياته و بيخفّ منها، فكمان أى طريق نجاح بيكون معرض إن تحصل له عقبات عديدة ، و برضه بيخف منها ، فمن الآن اعتبر أى عقبة تواجه نجاحك ما هى إلا مجرد دور برد

برد النجاح...............

===========================================

نشرت هذه المقالة فى مجلة ميكانو الالكترونية ، عدد شهر سبتمبر 2009

أيام سعيدة و عادة جديدة

2009-09-21T21:43:00.000-07:00

السلام عليكم و رحمة الله و بركاته

كل عام و أنتم بكل خير و إلى الله أقرب

تقبل الله منا و منكم رمضان بإذن الله

و فى خاطرة سريعة كده بهذه المناسبة، أحب أذكر إن

علماء التنمية البشرية أكدوا على إن الانسان ليكتسب عادة جديدة ،فلا بد له أن يمارسها لمدة واحد و عشرين يوما متصلين ، و لو عايز يأكّد على العادة دى قوى، يبقى يزوّد أسبوع كمان، يعنى إجمالا يوصلو ثمانية و عشرون يوما متصلين

و دلوقتى بعد ما انتهى رمضان وكان تسعة و عشرين يوما يحاول الإنسان فيهم أن يكون أفضل ، و اكتسب العديد من العادات المفيدة ، سواءا العادات دى كانت قراءة قرءان أو حفظ للسان أو أو

فمن السهل بإذن الله الحفاظ على العادات دى بعد انتهاء رمضان إذا عزم الانسان على ذلك

فانظر لرمضان أنه كان فترة من التدريب الربانى لتكون أفضل بعده، فقم بإدخال و لو عادة واحدة جديدة و مفيدة فى حياتك تعلمتها و تعودت عليها فى رمضان السابق

و أذكر نفسى و إياكم بالآية الكريمة

{ يَا أَيُّهَا الَّذِينَ آمَنُواْ كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ }

[ البقرة : 183 ].

فالهدف من رمضان أن نتقى الله بعده ، أفضل مما كنا قبله

و من أسهل التعريفات للتقوى هى أن (يجدك الله حيث أمرك و لا يجدك حيث نهاك) ، فنسأل الله أن يوفقنا لذلك جميعا بإذن الله

و كل عام و أنتم بخير و بتقوى

رمضان كريم

2009-08-19T00:54:00.000-07:00

كل عام و أنتم بخير بمناسبة الشهر الكريم

أسأل الله ان يعيننا جميعا على ذكره و شكره و حسن عبادته ، و يتقبل منا و منكم بإذن الله

الكثير يعلم أن عظمة شهر رمضان ، لأنه الشهر الذى نزل فيه القرآن ، و علشان كده فى ثلاثة مواقف سريعة أحب أشاركك بها ، و الثلاثة مواقف حصلوا فعلا

الموقف الأول: كان لرجل مسافر فى الطائرة ، فأخرج المصحف من حقيبته و أخذ يقرأ فيه ، و بقدر الله ، كان بجواره رجلا أجنبيا مسلما ، فتهلل الأجنبى حينما رأى الرجل يقرأ القرءان و طلب منه أن يقترب منه و هو يقرأ ،و أن يرفع صوته قليلا، و عندما انتهى الرجل من القراءة، شكره الأجنبى بحرارة و فى عينيه نظرة غبطة للرجل ، لأنه عربى و يستطيع أن يقرأ و يفهم و يتلو القرءان

الموقف الثانى : كان لسيدة مجرية اسلمت ، و تحدثت منذ عدة سنوات فى برنامج كلام من القلب لـ د.عمرو خالد ، و قالت أنها لم تكن تفهم العربية ، و لم يكن هناك ترجمة لمعانى القرءان الكريم باللغة المجرية، فلكى تستطيع فهم معانى القرءان، كانت تأتى بترجمة معانى القرءان باللغة الانجليزية ، ثم تأخذ كلمة كلمة و تترجمها من قاموس انجليزى \مجرى ، فكانت تقرأ الصفحة الواحدة فى نصف ساعة على الأقل

الموقف الثالث : كان لفتاة تجلس فى الحرم المدنى بين صلاة المغرب و العشاء ، و كانت - مثل كل من فى المسجد فى هذا التوقيت - تقرأ القرآن ، إلى أن لاحظت سيدة بجوارها لا تقرأ القرآن ، فظنت أنها لا تستطيع القيام لجلب مصحف، فعرضت عليها الفتاة أن تأتى لها بمصحف حتى تقرأ فيه، فنظرت إليها السيدة و على شفتيها ابتسامة تجمع ما بين المرارة و الحرج و قالت لها : " أصل أنا يا بنتى مش باعرف اقرأ"

أعتقد إن الثلاث مواقف مش محتاجين تعقيب ، غير إننا فى نعمة كبيرة جدا إن ربنا سبحانه و تعالى اصطفانا إننا نكون مسلمين و أننا نتكلم و نفهم لغة القرآن الكريم و أننا قادرون على قراءته

فاللهم أعنا على قراءته و تدبره و فهمه و العمل به ، و نسأل الله أن يجعل خلقنا القرءان و أن يرزقنا الإخلاص

كل عام و أنتم بخير ، و فترة توقف فى شهر رمضان و العودة بعدها بإذن الله

جزاكم الله خيرا
أسألكم الدعــــــــــــــاء

خلاصة عقول

2009-08-08T21:14:00.000-07:00

مش من السهل أن تتفق مع كل اللى يقوله شخص ما بنسبة مائة بالمائة ، و لكن من السهل جدا أن تتفق مع جزء من كلام شخص ما ،و لو حتى بنسبة واحد بالمائة من كلامه ، و كثير من الناجحين فى مجالات عديدة ، بيكون صدر منهم مقولة ما ، ممكن المقولة دى تكون حكمة و ممكن تكون مجرد وجهة نظر ، احتمال تتفق معاها أو لأ ، و لكن الأكيد إن العديد من الأقوال دى بيمثل ...خلاصة عقول ، و الخلاصة دى جديرة إننا نفكر فيها و نشوفها بعين التأمل
.
.
الخطوة الأولى التى لا يمكن الاستغناء عنها لكى تحقق ما تريده فى الحياه هى: أن تقرر ماذا تريد

بن ستين

الذى يعطل الكثير من الناس عن تحقيق أهدافهم ، هو ببساطة ، عدم الاستعداد لدفع ثمن هذه الأهداف ، عدم الاستعداد لبذل الجهد الشديد، عدم الاستعداد للتضحية براحتهم

أوريسون سويت ماردن

عقولنا قادرة على أن تشكل كيفية أمور حياتنا ، لأننا نتصرف وفقا لتوقعاتنا

فيديريكو فيللينى

من الصعب جدا أن تفكر بطريقة نبيلة ، عندما يكون كل ما تفكر فيه هو لقمة العيش

جان جاك روسو

أى شىء يستطيع العقل أن يستوعبه و يصدقه ، فسوف يكون قادرا على تنفيذه

نابوليون هيل

كلما أزداد عمق شعورك بفكرة ما أو هدف تريده، كلما ازداد ترسيخ هذه الفكرة فى عقلك الباطن ، و أصبحت المؤشر الذى يوجه مسارك إلى تحقيقها

إيرل نايتنجال

بعض الناس يموتون فى الخامسة و العشرين من العمر ، و لا يدفنون إلا عند الخامسة و السبعين

بنجامين فرانكلين

أعظم مجد فى الحياة ، لا يكمن فى عدم الوقوع، و لكن فى النهوض بعد كل مرة تقع فيها

نيلسون مانديللا

لكى يتغير شخص ما ، فمن الضرورى أن يتغير إدراكه لنفسه أولا

إبراهام ماسلو

لا يوجد نجاح دائم بدون إلتزام

أنتونى روبنز

الفائزون فى الحياة، هم الذين يفكرون باستمرار بطريقة: " أنا أستطيع، أنا سأفعل، أنا أكون" ، أما الفاشلون على الصعيد الآخر فيقومون بتركيز أفكارهم على ما لا يستطيعون فعله

دنيس وايتلى

حدود قدراتنا و مدى نجاحنا ، يكون مبنيا على ما نتوقعه من أنفسنا. فما يفكر فيه العقل، ينفذه الجسد

دنيس وايتلى

أعظم مخاوفنا ليست فى خوفنا من ألا نكون مؤهَّلين. أعظم مخاوفنا هو أن تكون قوتنا لا محدودة، إنه الضوء الذى يخيفنا و ليس الظلام. نحن نسأل انفسنا : " من أنا لأكون عبقريا أو رائعا أو موهوبا أو مدهشا ؟" ، و لكن السؤال الحقيقى هو: من أنت لتكون غير ذلك؟ ، أنت عبد الله ، فاستصغارك لنفسك لا ينفع العالم بشىء، و لا يوجد ما هو ملهم فى أن تكون ضئيلا حتى لا يشعر من حولك بضئالتهم

نيلسون مانديللا

مدى علوّ إنجازاتك يكون متساويا مع مدى عمق إيمانك

ويليام ف. سكولافينو

تأمل ، عش بنقاء ، كن هادئا ، اتقن عملك، و كن كالقمر و اسطع من وراء الغيوم

بوذا

لابد ان تتعلم من أخطاء الآخرين ، لأنك لن تستطيع أن تعيش الوقت الكافى لكى تخطىء كل هذه الأخطاء بنفسك

سام ليفينسون

عندما يكون من الواضح أن هذه الأهداف لا يمكن تحقيقها ، فلا تعدّل الأهداف و لكن عّدل أفعالك

كونفوشيوس

الاجتهاد هو أب الحظ السعيد

بنجامين فرانكلين

الأطفال بحاجة إلى قدوة و ليس ناقد

جوزيف جوبيرت

المفتاح ليس فى أن ترتب أولويات الأمور الموجودة أصلا فى جدول أعمالك ، و لكن فى أن ترتب أولوياتك فى جدول أعمال

ستيفن كوفى

القدرة على أن تعيش اللحظة الحالية، تمثل مكوّنا أساسيا للصحة الذهنية

إبراهام ماسلو

الشىء الطريف فى هذه الحياة ، هو أنك إذا رفضت أن تقبل إلا الأفضل، فغالبا ما ستحصل عليه

وليام سوميرست موجام

الذى يجد نفسه ، يفقد بؤسه

ماثيو أرنولد

دعنا لا ننظر فى غضب الماضى ، ولا فى خوف المستقبل ، و لكن فى إدراك الحاضر

جيمس ثاربور

فن أن تكون حكيما ، هو فن معرفة ما تتغاضى عنه

ويليام جيمس

عندما لا تمتلك سوى مطرقة، فكل مشكلة تواجهها ستبدو لك على أنها مسمار
إبراهام ماسلو

القراءة هى وسيلة التفكير بعقل شخص آخر حتى يمتد عقلك

تشارلز سكريبنر جونيور

تنويه + شرنقة أو ذئب مع ضبع

2009-07-22T22:45:00.000-07:00

تنويـــــــه

ــــــــــــــــــ

السلام عليكم و رحمة الله و بركاته

أولا : بجد ، جزاكم الله ألف خير لسؤالكم عنى فى الفترة السابقة، أشكركم جدا جدا على مشاعركم الطيبة اللى أثرت فى جدا ، و اعتذر عن انقطاعى الفترة السابقة و اللى كان لظروف خارجة عن إرادتى، و أشكر لكم دعائكم لى، جزاكم الله كل خير

و الحمد لله بدأت أعود تانى ، علشان اتابع موضوعاتكم و اتواصل معكم بإذن الله

ثانيا: فيه مدونة جديدة جميلة و أسلوبها و فكرتها متميزة و مبشرة جدا إن شاء الله، و أتمنى إنكم تساندوها و تتفاعلوا معها و هى مدونة (دموع الطبيعة) و هى مدونة لصديقة عزيزة على جدا جدا ، و ده رابط المدونة

http://naturetears.blogspot.com/

و ألف شكر مقدما على الدعم و التفاعل

----------------------------

كده التنويه خلص، فاضل إيه؟؟ ،فاضل البوست ، ما هو مش معقول بعد الغيبة دى كلها أرجع بإيدى فاضية، مش كده ؟؟؟؟

و هذا هو البوست الجديد

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

شرنقة أو ذئب مع ضبع

-------------------

"هو إيه اللى بيجرالى ده؟؟؟"

سؤال ممكن واحد يسأله لنفسه أو يسأله لحد تانى، لأنه ممكن يكون عنده إحساس إن كل الأمور ماشية ضده و الظروف ماشية فى عكس الاتجاه اللى عايزها تمشى فيه، يعنى مثلا يبقى نفسك قوى قوى فى حاجة و بعدين تحصل عشرات من العقبات اللى تعطلك أو تمنعك إنك تعمل الحاجة دى أو توصل لها، أو ممكن برضه تكون عايش فى أمان الله و فجأة تلاقى شدائد تكاثرت عليك من كذا جهة، و مش عارف تلاحق على إيه و اللا إيه

طب لما تلاقى عقبات كتير فى طريقك أو حتى عقبات تكاثرت عليك فى نفس الوقت، إيه اللى بتفكر فيه ساعتها؟؟ ، ممكن تكون بتفكر بطريقة" الموضوع ده كده خلاااص مش نافع ، و الهدف ده بعيد عنى قوى، و كفاية قوى التعب اللى تعبته لحد كده" ، أو بيجيلك إحساس إنك ضحية لكل المشاكل الكتير اللى حصلت دى ، و تبدأ تتألم و تفقد حماسك بالتدريج، و تحس إنك لا يمكن تقدر إنك تستمتع بحياتك أو تحقق غاياتك؟؟

على فكرة وارد جدا إنك تحس بكل ده، و ممكن كمان نقول إنه طبيعى ، و لكن....... لوقت معين ، يعنى الاحاسيس دى أو الأفكار دى كلها، طبيعى إنها تعدى عليك و تفكر فيها لبعض اللحظات، لكن اللى مش مقبول،... هو إنك تفضل تفكر بالطريقة دى على طول وما تخرجش من الأفكار دى، و ده بالضبط زى جملة قرأتها مرة و هى " أنت لا تغرق عندما تسقط فى المياه، و لكن تغرق عندما تظل فيها"،....... فلو الانسان فضل تحت المية شوية ، مااااااااشى ..مش مشكلة ...مسييييره هيطلع تانى ، و لكن الكارثة ، لو فضل تحت سطح المياه و حتى ماحاولش إنه يطلع،وفضل سايب نفسه يغرق و مستسلم تماما للغرق ، و نفس الكلام ينطبق على الأفكار اللى كنا بنتكلم عنها، لو فضل الإنسان فيها، يبقى هو كده ساب نفسه يغرق فى مشكلاته و فى أفكاره اللى تعباه

طب لو مش عايز تغرق؟ ، لو عايز إنك تخرج من المياه دى، تعمل إيييه؟
فكر فى التحدى ده على إنه ممكن يكون حاجة من اتنين، إما شرنقة أو ذئب مع ضبع
!!!!!!!!!!!!!!!!!!!!

يعنى إيه الكلام ده ؟؟
بالنسبة للشرنقة، فالفراشة علشان تتحول من طور اليرقة لطور الفراشة ، مش بتتحول كده بالساهل، لااااازم الأول تعمل شرنقة حوالين نفسها و تحبس نفسها فيها، علشان تنمو بالتدريج و تكون أقوى و علشان تكوّن أجنحة تقدر تطير بها، و تستحمل المصاعب اللى هتواجهها فى حياتها، يعنى لازم تتحبس و تتكتف جوة الشرنقة دى و تستحملها ، لأنه لولاها ماكنتش هتبقى أقوى ، و إذا فرضنا إن حد كان معدّى جنب الشرنقة دى، و صعبت عليه إن اليرقة محبوسة جواها ، ففتح الشرنقة دى قبل أوانها، يبقى المصير الطبيعى لليرقة دى إنها هتموت ، لأنها لسه مش مؤهلة لمواجهة العالم الخارجى و العيش فيه كفراشة
أهى المصاعب الى بتواجه الإنسان من وقت لآخر ساعات كتييير، بتكون زى الشرنقة دى، ممكن تكون بتضايقك و تكتفك و تتعبك و لكن ده فى الظاهر بس، إنما فى الحقيقة هى بتقويك علشان تقدر تواجه المجتمع و تتعامل مع حياتك بشكل أفضل، فلو فيه حاجة كان نفسك فيها و لسه محصلتش، أو هدف نفسك توصل له و حصلت لك عقبات كتير، إعرف أن ممكن جدا إن ربنا أراد إن العقبات دى تحصل لك لأنك لسه مش جاهز للمكان ده، و لسه مش مؤهل لأنك تتعامل مع الموقف ده، ومش شرط تكون مش مؤهل علميا، ممكن التأهيل اللى محتاج له الواحد، يكون من ناحية النضج فى التفكير ،أو التعامل مع المواقف و الضغوط ،أو التواصل مع أنواع مختلفة من الناس،,,,,إلخ، و لو فرضنا إنك كنت وصلت للهدف ده قبل ما تمر بالمعوقات اللى حصلت لك (الشرنقة)، ممكن جدا ماكنتش تصمد فى الهدف ده و ماكنتش تحقق قدر النجاح اللى نفسك فيه،.......... علشان كده ربنا حط فى طريقك إعداد و تجهيز لك ،أو ممكن نقول معسكر تدريب ، على هيئة معوقات و تحديات هى بمثابة الاختبارات اللى لما تعديها و تنجح فيها ، هتكون مؤهل للمرحلة اللى أعلى منها و اللى ماكُنتش هتقدر توصل لها، لولا الإعدادات دى،..... و زى ما هو مش من مصلحة الطفل إنه يسوق عربية، إلا لما يكبر الأول و بعدين يتعلم السواقة، علشان مايؤذيش نفسه و يؤذى غيره، فبرضه مش من مصلحتك إنك توصل لهدفك بسرعة غير لما تكون مستعد للهدف ده و تعدى بفترة الإعداد اللى تؤهلك لهدفك و نجاحك علشان تنفع نفسك و تنفع غيرك

طب ده بالنسبة للشرنقة، إيه بقى الذئب مع الضبع دى؟؟؟
أحيانا الانسان لما تتراكم عليه المشاكل يحس إنه الدنيا ضاقت عليه من كل الاتجاهات و يبدأ يتسلل له شعور باليأس و الإحباط، و لكن...... ممكن جدا المشاكل دى تكون هى مفتاح الحل، إزاااااى؟؟؟

تعرف حاجة ، كان العرب زمان لما يشرد منهم غنمهم، يدعوا و يقولوا"اللهم سلط عليهم الذئب و الضبعا"، اوعى تفتكر إنهم كده بيدعوا عليهم من غيظهم إنهم ضاعوا و اللا حاجة، لأ خالص، بالعكس، ده همّ كده -و زى ما قال الأصمعى- كانوا بيدعوا لهم

!!!!!!!!!!!!!!!!!!

إزاى؟؟ لأن الغنم لما شردت و اتفرقت ، مش ممكن إنها تتجمع لوحدها، و لو هجم عليهم الذئب لوحده فهيتغلب عليهم و يقدر يأكل منهم، أما لو هجم عليهم الذئب و الضبع مرة واحدة ، فالذئب و الضبع هيتحاربوا مع بعض بدل ما يهجموا على الغنم، فكده تبقى الغنم سلمت منهم ، و كمان الهجوم المزدوج ده ممكن يجمع شمل الغنم مرة أخرى بدل ما كانوا متفرقين، و يخليهم يغيروا مسارهم، و ساعتها هيسهل العثور عليهم ، يعنى راعى الغنم البسيط كان عنده من الوعى إنه يعرف إن أحيانا لما تحصل له مشكلة- زى شرود القطيع- فحلها بيتطلب حدوث مشكلتين ؛ و هما الذئب و الضبع معا،....... و فى الحياة كده برضه، ممكن جدا يكون تراكم العقبات ده حصل لك، علشان تدخل فى طريق ماكنتش هتدخله لو ماكانتش حصلت لك العقبات دى، و يكون اتقفل قدامك اتجاه معين ،علشان انت تروح فى اتجاه تانى أحسن لك بكثيييير من الأول، زى قصة كنت قرأتها من فترة بسيطة، عن راجل كان رايح يقدم فى وظيفة علشان يشتغل فرّاش فى شركة مايكروسوفت، لكن لما راح المقابلة الشخصية و عرفوا منه إنه ماعندهوش إيميل، رفضوا إنهم يشغلوه ، فلما اتقفل قدامه الطريق ده، راح اشترى شوية تفاح، و باعهم، و كسب فيهم ، و بدأ ياخد المشروع بجدية ،و شوية شوية كبر المشروع، و مرت السنين وبقى رجل أعمال و تاجر كبير، و فى يوم كده، كان حد بيسأله عن الإيميل بتاعه، فأجابه بإن معندهوش إيميل، فكان رد فعل السائل:" طيب انت ناجح كده و انت ماعندكش إيميل، أمّال لو كان عندك إيميل بقه ، شوف كان زمانك بقيت إيه؟"، فرد عليه و قال:"كان زمانى بقيت فرّاش فى شركة (مايكروسوفت)"...........، يعنى فعلا، لولا إن الطريق الأول اتقفل قدامه، ماكنش راح للطريق التانى و اللى كان فيه خير كبييييير له

و ده ممكن جدا يكون حاصل معاك، أحيانا ربنا يقفل قدامك طريق ، علشان يفتح لك الأكبر منه، و ربنا سبحانه و تعالى قال فى سورة البقرة
"لا يُكلِّفُ اللهُ نَفساً إلّا وُسعَها لَهَا ما كَسَبَت و عليْها مَا اكتَسَبَت" صدق الله العظيم
يعنى ربنا سبحانه و تعالى مش هيكلفك غير بما تقدر عليه ، فطالما ربنا سبحانه و تعالى كتب لك على عقبة معينة إنها تتحط فى طريقك، فثق إنك قدها و قدود ، و إنك تقدر تتغلب عليها و بالطرق الحلال، فحتى لو الظروف اللى حواليك ممكن تكون مش بإيدك ، لكن رد فعلك أنت تجاه الظروف دى ، فى إيدك جدااااااااا، و هتتحاسب على رد فعلك ده، و لك ما لك، و عليك ما عليك

فمن دلوقتى لما تلاقى عقبات فى طريقك، استوعبها على إنها إما شرنقة بتدربك و تقويك و تعلمك علشان تكون أقوى فى المرحلة القادمة فى حياتك، أو إن تراكم التحديات ده، زى بالضبط تراكم هجوم الذئب مع هجوم الضبع، فحتى لو كان تراكم للمصاعب فى ظاهر الأمر و لكن فى باطنه الفرج، أو ممكن يكون علشان يغير مسارك اللى انت ماشى فيه ، لمسار آخر، لك فيه خير أكبر بكتير

و إجمالا، سواءا كان الاحتمال الأول أو التانى ، فهتظل التحديات اللى انت بتواجها فى حياتك ما هى إلا هدايا ،ربنا سبحانه و تعالى بعتها لك لحكمة لا يعلمها إلا هو، فتقبل الهدية دى و اغتنمها ، و ممكن جدا تلاقيها شرنقة أو ذئب مع ضبع

إتفرج يا سلام + تحديث

2009-06-01T02:06:00.000-07:00

"هو أنا صح و اللا غلط ؟؟، هوّ أنا اتصرفت صح و اللا كان المفروض إنى أتصرف بشكل مختلف، و لو كان بشكل مختلف، يبقى المختلف ده هيكون إزااااى؟؟؟؟"

الأسئلة دى كلها ، طبيعى جدااااا ، إنها تدور فى ذهنك من وقت لآخر، و لكن علشان تقدر تجاوب على الأسئلة دى كلها بإجابات صحيحة قدر الإمكان ، المفروض إنك تعمل حاجة مهمة جدا، و هى............... الإدرااااك

بمعنى إنك لازم تدرك إنت بتفكر و تتصرف إزاى علشان تقدر توجّه نفسك صح، لأن ما ينفعش تحل موضوع معين ، و انت ماتعرفش هو فين المشكلة فى الموضوع ده أساسا، زى بالضبط المريض اللى بيكون تعبان، لازم الأول يعرف إيه هى مشكلته بالضبط، علشان يتعالج على أساسها

طيب ، و الإدراك ده يتحقق إزاى؟؟؟؟

علشان تقدر تحققه يبقى لازم تسأل نفسك سؤال مهم جداااا، و هو

هل أنت شايف نفسك كويس؟؟ أو بمعنى آخر، هل انت ملاحظ طريقة تفكيرك و سلوكياتك و كلامك بشكل كويس؟؟؟؟

يعنى إذا كنت فى موقف ما ،هل تقدر إنك تقف شوية وتتخيل نفسك فى الموقف ده و كإنك بتتفرج على نفسك فى شريط فيديو؟؟ و تعرف تحكم على تصرفاتك و أفكارك؟؟

فيه بعض الناس مرّوا فعلا بالتجربة ديه، إنهم يتفرجوا على سلوكياتهم كشريط فيديو، و أذكر من المواقف دى فى برنامج (المربية الخارقة)، إن المربية لاحظت إن الأولاد بيقولو ألفاظ و شتائم سيئة جدااا، و لما سألت الأب و الأم ، فالأم قالت لها بكل ثقة و صدق و شموخ: "أنا لااااااااا يمممممممممكن أقول قدام أولادى أى شتائم أبداااااااااا" ،...و بعد كده جت مرحلة تصوير حياة الأسرة اليومية ، علشان المربية تشوف بنفسها إيه اللى بيحصل فى البيت، و بعد ما المرحلة دى عدت، راحت المربية جابت تانى الأب و الأم و بتفرجهم على لقطات لسلوكياتهم، و من ضمن المشاهد دى كان مشهد الأم و هى بتتكلم فى التليفون مع إحدى صديقاتها و بتحكى عن حاجة مضايقها – و الأولاد جنبها- و هى فى خلال مكالمتها ، كانت تقريبا قالت القاموووووووس الكامل للشتائم

!!!!!!!!!!!!!!!!!!!!!!!!!!!

ما تتصورش رد فعل الأم و هى بتضحك على تصرفها و هى فى منتهى الإحراااااااااج، و منتهى الذهووووول، لأنها فعلا ما كانتش مدركة هى بتعمل إيه ، فعلشان كده كانت بتقول بكلللللل ثقة إن السلوك ده هى مش بتعمله- و هى فعلا مصدقة ده - فاتصدمت بالدليل القاطع الساطع بإنها بتتصرف بطريقة عكس اللى كانت فاكراها تمااااااااما، و ده كان بمثابة الصدمة اللى فوّقتها و خلّتها تدرك كويس قوى هى بتعمل إيه ،و لما أدركت سلوكها الخاطىء و استنكرته بشدة، كان سهل بعد كده إنها تتصرف بشكل أفضل بكتيييير
و تحسّن من سلوكياتها

طيب مع ذلك ، هل ده معناه إنى بقول لك إن علشان تعرف تحسّن من تصرفاتك ، يبقى تركب كاميرات فيديو فى كل حته تروحها و بعدين تقعد تتفرج على التسجيلات؟؟؟ لأ طبعا

( مع إن الأسلوب ده بيستخدم ، و لكن فى مواقف معينة، مش طول الحياة يعنى)

طيب أُمّال الحل إيه؟؟ الحل فى نعمة كبيرة أعطاها لنا ربنا سبحانه و تعالى و هى نعمة التخيل و التفكير، يعنى إذا كنت صحيح مش شايف الموقف فى شريط فيديو، فابدأ فكر فيه و بص عليه من فوق ، يعنى تصور كده لو حد كان معاك و مراقب خطواتك ، هيبقى شايف الموقف إزاى؟؟؟؟

د.واين داير، و هو أحد كبار علماء التنمية البشرية كان اتكلم مرة عن إنه من خلال قراءاته العديدة ، وجد مفهوم ما، يسمى بمفهوم المُلاحظ، يعنى إن الإنسان يتخيل أو يفكر إن جزء منه أصبح مُلاحظ للموقف و بيتفرج عليه من برة، و ضرب مثال على كده بإنه فى مرة و هو فى ممر الطائرة و بيتجه ناحية الكرسى ، كان فيه سيدة مش طويلة، و كانت مش قادرة تحط الشنط بتاعتها فى الرف العلوى ، فبالتالى كانت سدة الطريق عليه و على كل الناس اللى واقفين وراه و عايزين يعدّوا و تعبانين من مجهود السفر، فكل واحد بقى بيقول كلمة، اللى يقول : ما تخلصونا بقى، و اللى يقول: إيه العطلة ديه؟؟، و اللى يقول للسيدة: ما كنتى تطلعى فى الآخر بدل ما تعطلينا، ....هنا بقى (د.داير) و هو بيحكى ، قال: أنا كمان كنت تعبان من التعطيل و كان ممكن جدا إنى أتضايق أو أتعصب ، و لكــــــــــــن.........، تخيلت الموقف فى ذهنى من وجهة نظر المُلاحظ، و كأنى سَمَوت فوق الموقف و باتفرج عليه من برة، فلقيت إنى ساعتها كنت هاقول:" طب ما اللى واقفين دول ، ممكن إنهم يساعدوها بدل ما يتكلموا"،....... و فعلا نفذت وجهة نظر المُلاحظ و بدأت أساعدها فى وضع الشنط و من غير ما أضايق نفسى ، و الموقف عدّى بسلاسة و يسر، و حسيت إنى اتصرفت التصرف السليم

و فعلا، وقت ما الإنسان بيشوف نفسه من برة ، و يتخيل الموقف فى ذهنه من أسلوب الملاحظ، هيكون إدراكه للموقف أفضل و أشمل بكتير، و على فكرة أحيانا كتير ممكن تلاقى حولك ناس صدقوا فى كلمة وجهوها إليك، و بيلفتوا نظرك لعيوبك اللى انت ممكن تكون مش شايفها، و مش مدركها، ....فإعطى لنفسك فرصة إنك تفكر فى كلامهم ،و اعمل كده استرجاع لسلوكياتك ، (زى كده إعادة مشاهد إجوان ماتش الكورة)، و شوف بوجهة نظر المُلاحظ، هل هم بيقولوا كلام مش حقيقى، و اللا همّ أسدوا لك أكبر خدمة و لفتوا نظرك و وسعوا إدراكك لحاجة مهمة جدا ، ماكنتش واخد بالك منها
و فيه جملة شهيرة لسيدنا عمر بن الخطاب –رضى الله عنه- و هى: "رحم الله امرءًا أهدى إلىّ عيوبى " ، و فعلا لو الإنسان ده بيلفت نظرك لعيب حقيقى موجود فيك و انت مش واخد بالك ، فبيكون قدم لك أجمل هدية ، و هى الإدراك، و بعد الإدراك هيسهل إيجاد الحل، زى ما بتقول القاعدة الشهيرة فى التنمية البشرية : " إدراك المشكلة يمثل 50% من حلّها"

يبقى علشان تكون مصحصح لمسار حياتك و مدرك لأفكارك و سلوكياتك ، فمن وقت للتانى قف مع نفسك و اعمل (إيقاف ) لشريط حياتك و اتفرج عليه من برة و كإنك بتتفرج عليه فى التلفيزيون، و قيّم نفسك و أحداث حياتك ، سواءا كان تقييم ياخد ثوانى و تقدر تعمله فى موقف لحظى ( زى موقف د.داير)،أو تقييم ياخد أيام و يكون تقييم لمسار حياتك و سلوكياتك، و شوف نفسك -كبطل لقصة حياتك - بتتصرف إزاى و بتعمل إيه، و قيم نفسك بصدق ، وابدأ ارسم لنفسك الحل ، ونفذ أسلوب الحل اللى انت بترسمه و تتصوره، وبالرغم من التحديات اللى ممكن تحدث لك فى سيناريو حياتك، إلا إنك هتقدر –بعون الله – إنك تضع السيناريو لرد فعلك إنت على التحديات ديه ،و تقدر ترسم خط سيرك كبطل فى أحداث قصة حياتك

و افتكر قول الله تعالى: {بَلِ الْإنْسَانُ عَلَى نَفْسِهِ بَصِيرَةٌ وَلَوْ أَلْقَى مَعَاذِيرَهُ} صدق الله العظيم ،إذاً... فأنت بصير على نفسك و رقيب عليها مهما كانت الأعذار

و ذكّر نفسك باستمرار بــــ
(الله ناظرى ، الله شاهدى، الله رقيب علىّ)

================================

التحديث

http://advsarab.blogspot.com/2009/06/blog-post.html

من فضلك، لا تشعر هذا الشعور، الشعور فيه سُم قاتل

2009-05-21T13:42:00.000-07:00

كتير من الأحيان ، لما تشوف فيلم مثلا، و حصل في الأحداث، إن حد تسبب فى أذى لحد تانى ، فتلاقى اللى وقع عليه الأذى ده بيقول بكل حُرقة: "أنا لا يمكن أسامحه أبدا"، و ممكن تلاقى حد يرد عليه يقول له:" ما يبقاش قلبك إسود، ده مهما كان (مش عارفة مين كده)"....، فتلاقى التانى يقوله بمرارة:" لا يمكن أبدا، أنا لا يمكن أسامحه مهما حصل و مهما اترجانى"
طيب السؤال اللى بيطرح نفسه هنا، هو لما أنا ما سامحش شخص معين لأى سبب كان،....هل أنا كده بأعاقبه ؟؟؟ أو بسبب له ألم؟؟؟

و اللا أنا فى الأساس بأؤذى نفسى بشعور يسبب لى أنا الضيق و الخنقة، و الشخص التانى مش هيتأذى بحاجة؟؟؟؟؟
طيب نشوف كده....لو كان الشخص ده مش حاسس إنه أذاك أصلا، و مش حاسس بيك أساسا، يبقى شعورك بالمرارة ديه، هيفرق معاه فى إيه؟؟؟

و لو كان الشخص ده أصلا إنسان سلوكياته سيئة و فيها العِبر، فمش هتفرق معاه إذا كنت انت هتسامحه و اللا لأ، و مش بعيد لو عرف انك مش مسامحه، هتلاقيه يقول بلا مبالاه: و إيه يعنى؟؟

و لو كان الشخص ده ندمان على اللى عمله ، و اعتذر، و حاسس بالذنب، و بالرغم من كده انت ماسمحتوش، فهو ببساطة، مسيييره هيزهق و هيحس إنه طالما اعتذر لك إنه خلاص عمل اللى عليه، و كون إنك قبلت ده أو ماقبلتوش فده مش هيخُصّه، و لو الشخص ده عرف إنك مش مسامحه، ممكن جدا تلاقيه يقول بزهق و ضيق: خلاص بقى هو حر، و أنا هاعمل له إيه يعنى؟؟ مش عايز يسامحنى........ بلاااااااااش

طيب يبقى مين اللى تعبان هنا؟؟؟ إنت و اللا التانى؟؟؟؟

مين اللى بيتعاقب و حاسس بالألم و المرارة؟؟؟ إنت و اللا التانى؟؟؟

إذا لم تسامح فانت بكده بتإذى نفسك ، و بتظن إن الآخر هو اللى تعبان، .... و فيه تشبيه متداول لعدم التسامح و هو : إن اللى مش بيسامح ده عامل زى اللى بيشرب السم و متوقع إن الشخص الآخر هو اللى هيموت بيه

و لكن الحقيقة إن السم ده هو اللى بيشربه و هو اللى بيعانى من أثره قبل أى حد، و لما ما تسامحش، فانت اللى هتكون تعبان قبل أى حد،....لأنك طول ما بتفكر فى اللى عمله فيك الآخر ، و الآخر ده ممكن يكون جدا و لا هوّ هنا، و لا حاسس بيك، فكإنك بالظبط، شايله فوق كتافك وماشى بيه و ظهرك محنى من كُتر الألم، أما هو...فراكب فوق و هوّ و لااااااااا على باله

طب و بعدين؟؟؟ هتفضل شايله لحد امتى؟؟؟

هيفضل ضهرك محنى لحد امتى؟؟؟؟؟هتفضل تشرب السم لحد امتى؟؟؟؟

انت اللى بإيدك انك ترمى الحمل الثقييييل ده من على اكتافك، و انت اللى بإيدك إنك ترمى السم قبل ما يدمرك، و قبل ما مرارة الإحساس بالرغبة فى الانتقام ما تحول الانسان اللى مفطور على الفطرة السليمه إلى وعاء ملىء بالسم و عايز الكل يشرب منه

طيب السؤال المنطقى هنا اللى ممكن يتسأل، طب يعنى أسامح و أنسى كل الحصل و اتعامل مع الشخص ده زى الأول و كأن شيئا لم يكن؟؟؟الإجابه هنا............لأ طبعا، سااااامح ، و مع ذلك.........ماتنسااااش

!!!!!!!!!!!!!!!!!!

إزاى بقى؟؟؟؟ مش كده أبقى ماسامحتش؟؟؟؟؟؟

لو فرضنا إنك حصل لك موقف مع واحد صاحبك زعّلك منه جداااا، و هو إنك قلت له على حاجة إنها سر خاص بك، و مش المفروض إنه يقوله لحد، و لكـــن

بسم الله ما شاء الله

بسم الله ماااااااا شاااااء الله

مافيش حد ماعرفش، هو قام بالواجب و نشر السر ده،... اللى مابقاش سر خلاص
هنا بقى...... صاحبك ده سواء اعتذر أو لأ، أكيد أنت هتتضايق منه فى الأول....طبيعى يعنى، بس بعد شويه هتسامحه خلاص، طيب.......لو سامحته و نسيت اللى عمله، و نسيت الدرس اللى انت اتعلمته ، فمن غير ما تشعر هتروح قايل له تاااااانى على سِرّك، و هتلاقيه تااااااانى ماحافظش على السر، و هترجع تااااااااانى تزعل منه، و ندخل بقى فى دايرة مفرغة كل شوية ،.......... إنما لما تسامحه و مع ذلك تفتكر الدرس اللى انت اتعلمته و هو أن صاحبك بالرغم من مزاياه إلا إن عنده العيب ده، فهتفتكر كويس قوىىىى إنك تتجنب إنك تقول له على أسرارك، علشان ماتزعلش منه تانى،.................. فمش هتبقى سامحته و بس، لأ كمان هتكون من الذكاء إنك تتعلم من أخطاءك و تتعامل مع الجانب الحسن من الناس و تتجنب عيوبهم اللى اتلدغت منها قبل كده، و كما قال الرسول صلى الله عليه و سلم فى الحديث الشريف:"لا يلدغ المؤمن من جُحر مرتين" صدق رسول الله صلى الله عليه و سلم
و طبّق الكلام ده على المعاملات عموما، لما تلاقى صفة ضايقتك فى شخص معين فصحيح إنك هتضايق منه فى الأول، بس بعد كده ،خلاص سامحه و إذا كنت مضطر إنك تتعامل معه ، فاتعلم من التجربة اللى حصلِت و افتكرها كويس علشان تعرف تتجنب عيوبه و تتعامل مع مميزاته

و إذا كان الشخص ده انتهى من حياتك و مش هتتعامل معاه من تانى علشان سافر مثلا، أو لأى سبب كان، فسامحه برضه و افتكر الدرس اللى اتعلمته، لأن أكيد فيه حاجة هتقدر تستخلصها و تتعلمها من التجربة دى، و لو لقيت نفسك مش قادر تعرف إنت اتعلّمت إيه؟؟؟ يبقى اعرف ان لسه فيه بقايا مشاعر عدم تسامح موجودة جواك، لأن لما مشاعرالضيق و المرارة بتكون موجودة، بتغطى على المنطق و تشوّش عليه، و علشان تقدر إنك تسامح فعلا، فأول خطوة....إنك تواجه الحقيقة، يعنى لو لسه مش مسامح ،واجِه نفسك بالحقيقة دى، و على فكرة ...ما فيش حاجة اسمها مسامح الشخص ده بس ساعات، أو مسامح نُص نُص....إنت يا إمّا مسامح ،يا إمّا مش مسامح، و معنى إنك سامحت هو انك لما تفتكر الشخص اللى كان مسبب لك ألم، تلاقى نفسك مش عايز تسبب له ألم، و مشاعرك تجاهه عادية بدون مرارة و ممكن كمان تدعى له بالهداية

و إذا كنت فعلا لسه ما سامحتش، اتخذ قرار واعى منك انك ترمى حمل الشخص ده من على كتفك ، انك تتوقف عن شرب السم اللى مش هيإذى حد غيرك..... وإذا الشخص ده أذاك، فسامحه و اتعلم الدرس اللى ربنا بعته ليك علشان تتحصن فى المستقبل و إذا كان لك حق شرعى فعلا مسلوب منك، فاسعى انك تسترده، و بما يرضى الله، وإذاسعيت بكل قوتك و مع ذلك ماقدرتش، فاعرف كويس إن حتى لو عدل البشر لم ينصفك، فعدل رب البشر قادر إنه ينصفك، واتخذ قرار إنك تسامح............... لأن كده أو كده الشعور بعدم التسامح مش هيأثر على الطرف التانى فى حاجة، و مش هيإذى حد غيرك

فاعمل لنفسك خدمة كبيرة ، و ارحم نفسك من السم اللى بتشربه، و اتحرر من الدوران فى فلك الشخص الآخر،....... و ممكن كمان تكتب له رسالة- الرسالة دى لنفسك مش علشان هو يقراها- و اكتب فيها

بالرغم مما تسببته لى من ألم،.... و بالرغم من كل شىء،...... فلقد قررت أن أسامحك، و ليست هذه بهدية منى إليك و لكنها هديتى إلى نفسى، لأننى أطمح فى الراحة و الطمأنينة النفسية ،و لأننى أطمع فى عفو الله، فقررت أن تسامحى هذا ما هو إلا ثمن بخس للحصول على ذلك، .........و أشكرك كثيرا لأنك علمتنى دروسا فى الحياه لم أكن لأتعلّمها بدونك ، شكرا لك لأنك علمتنى أننى أقوى و أسمى مما كنت أتصور ، شكرا لك لأنك علمتنى أننى قادر على أن أسامح و أعفو

و أدعو من الله أن يتقبل عفوى ،و يعفو عنى

الإمضاء

شخص شاكر لك الجميل

يا كاتب المدونة Tag جالك الـ

2009-05-13T22:56:00.000-07:00

من فترة بسيطة جدا ماكنتش أعرف يعنى إيه تاج، و أول مرة شفته كان عند (قلب أرهقته الأحلام)، و من كتر ما أنا مش عارفة ده إيه، ....بعد ما شفته عندها ، شفت مدونة تانية عاملاه و زعلت جدااااااا علشانها و افتكرت إن فى حد سرق الوضوع بتاعها

!!!!!!!!!!!!!!!!!!!!!!!!!!!!!

بس الحمد لله ، بعد كده عملت بحث و فهمت الموضوع و دورت عليه كمـــــــــــان فى (جوجل) -اللى اتلسع من الشوربة بقى- و عرفت إنه التاج دى اسم لعبة بالانجليزى معناها حاجة كدة زى اللى يستلم من حد حاجة و بعدين يسلمها لشخص تانى، يعنى زى سباق التتابع كده

المهم، بافتح المدونة فى يوم كده، لقيت (رهف قلبى ) بتبارك لى و بتقول لى إنه جالى تاج من (مامة مازن)، الحقيقة إتفاجئت جدااااا ، ولكنى فى نفس الوقت سعدت بمبادرتها الرقيقة، جزاك الله خيرا يا أختى مامة مازن

و دلوقتى ، باتسلم التاج و أجاااوب عليه

س/اسمك؟

ج/ نهى

س/ المشهورة به وسط أصحابك؟

ج/ نهى ، نهى عبد المُنعم -مع الحرص و الحفاظ على الميم المضمومة

س/سنك؟

ج/ باتمنى من ربنا -سبحانه و تعالى -إنه ينعم علىّ بروح و براءة الطفلة و طاقة و صحة الشابة و زهد و حكمة الكهلة

نقّى منهم اللى يعجبك ، أو اجمعهم و خد المتوسط

س/اسم مدونتك؟

ج/ مدونة تأثير الفراشة

س/مجال دراستك؟

ج/ صيدلانية و مدربة تنمية بشرية

س/الصورة الرمزية لمدونتك بتعبر عن إيه؟

ج/ الصورة الرمزية لى هى فراشة على زهرة ، و فى قالب المدونة نفسه فى فراشتين، و كلللل الفراشات دى بتعبر إن كل كلمة باكتبها هنا، أتمنى إنها تأثر فى إنسان بشكل إيجابى، و يكون التأثير ده قوى مثل تأثير الفراشة، أو زى ما كتبت فى شعار المدونة

إذا الفراشة ممكن تعمل إعصار...يبقى الكلمة ممكن تغير مسار

س/هل فكرت فى إغلاق مدونتك؟لماذا؟

ج/ مع إن أكتر من تسعين فى المائة من الإجابات اللى قرأتها بيقولوا (لأ طبعا) ،إلا أننى أعترف بأنى فكرت فى غلقها أوووول ما فتحتها ، لولا إنى فكرت أستشير صديقة لىّ قبل ما أعمل كده، و هى اللى شجعتنى جدا و قالت لى كمّلى و بعدها صديقة كمان شجعتنى جدا و أصرّوا إنى لازم أكمل و هما (د.نهى) و (د.فاطمة) و بعدها جالى أول تعليق من حد خارج دائرة معارفى -وقتها- كان من الجميلة ( قلب أرهقته الأحلام) ، جزاهم الله عنى كل خير

س/إيه رد فعلك لو حد قل أدبه عليك؟

ج/وارد إن ناس تختلف فى الرأى أو تعترض و لكن يكون مع مراعاة آداب الحديث، و الكلام عموما يكون فيه احترام الضوابط فى الكلام بين الشباب و البنات و بدون تجاوز، أما لو حد قل أدبه ،فده موقف صعب و باتمنى من ربنا -سبحانه و تعالى -إنه ما يحصلش، لكن لو حصل فسأضطر آسفة إنى ألغى تعليقه

س/أسوأ مدونة

ج/ أى مدونة تسىء للإسلام ، و الحمد لله لغاية دلوقتى ما شفتش مدونة كده و لكن إذا فيه ،فهتبقى بالنسبة لى هى أسوأ مدونة

س/هيحصل إيه للإيميل لما تموت؟

ج/هيموت معايا

س/إديت الباسوورد بتاعتك لحد؟

ج/ كلا البتة

س/السفر بالنسبة لك؟

ج/ السفر مغامرة شيقة بكل معانى المغامرة، و باسعد جدا إن لسه فى حاجة فى الحياه تسبب للإنسان إحساس الفرحة الممزوجة بالدهشه و الانبهار و البراءة الشديدة،كأنه رجع زى الطفل اللى بيشوف الحاجة لأول مرة، و بالرغم من حبى للسفر فأنا أكره الغربة جدا و مش باستحملها

س/المود بتاعك؟

ج/بحاول أؤدى دورى فى الحياة بإتقان على قدر المستطاع، و الله المستعان

س/ بتعمل إيه فى وقت فراغك؟

ج/النت، القراءة، التليفزيون (لما بيكون فيه حاجة تستاهل)، الاسترخاء

س/الأكلة المفضلة لك؟

ج/ ما فيش حاجة ثابتة، حسب المود

س/الصفات اللى ورثتها عن والدك؟

ج/ التعبير عن الرأى و الإيجابية

س/الصفات التى ورثتها عن والدتك؟

ج/العطاء و التفكير التحليلى

س/أكتر ست حاجات بتكرهها؟

ج/ ممكن أختصرهم بإنى أقول الظلــــــــــــــــم بكــــــــــــــــــــل أشكالــــــــــــــــــــه لكن لو هقولهم يبقى

أولا: اللى يقبل على غيره حاجة غير اللى يقبلها على نفسه أى الكيل بمكيالين و الإزدواجية والكذب و نقض العهد و أكل حقوق الناس

ثانيا: اتهام الناس بالباطل و الخيانة و ظن السوء بالآخر، أو كمان ظن السوء بالنفس

ثالثا: إن الإنسان ينكر خطؤه و ما يعترفش بيه ، ودايما يلوم غيره إن همّ اللى غلط لكن لا يغلّط نفسه

رابعا: الكبر ، التكبر ، الأنانية ،الغرور ، باختصار، مشاكل الذات المتضخمة

خامسا: السلبية و إن الإنسان يعمّق بداخله إحساس الضحية، و من السلبية كمان، عدم تحمل المسؤلية بشكل متقن وعدم إعطائها حقها، ومن أشكالها الكثيرة ،عدم الإتقان فى العمل أو عدم إهتمام الشخص وعدم حرصه على أن يجتهد فى كل دور من أدوار حياته كـــ

(ابن، طالب،أخ،صديق، زوج، أب،زميل عمل، واصل رحم، جد، مدير عمل....إلخ )

سادسا: التظاهر بتقدير قيمة الدين و العلم ، و لكن عند السلوك، تكون المرجعية للموروث الاجتماعى و الثقافى حتى و لو كان يتعارض مع الدين و العلم

و كــــل ده فى رأى بيكون جزء من مظاهر الظلم، سواءا ظلم الإنسان لنفسه أو للآخرين أو للناس اللى اعتمدت عليه و ده غير كمان تأخيــر العدل و اللى يعتبر من أنواع الظلم المستترة

س/أكتر ست حاجات بتحبهم؟

ج/

الله -سبحانه و تعالى

الرسول(صلى الله عليه و سلم)و الأنبياء

أهلى و أصدقائى و بلدى

العلماء و الصالحين المصلحين

من يتمنى الخير للناس، لأن ده عنوان كبيــــــر للشخصية

كــــــل مظاهر العـــدل

س/ شخصيتك نوعها إيه؟

ج/ ده سؤال كبير و عميق، لو تعرف أنواع الشخصيات يبقى ممكن أجاوبك عليه بكلمتين فقط، أما لو لأ، فيكفى إنى أقول إنى أحب التفكير المنطقى و القدرة على التعبير، و أحب الحرية جدا (الحرية بمفهومها الصحيح، اللى بيبقى معاها المسؤلية خطوة بخطوة،مش المفهوم بتاع أنا حر و اعمل اللى أنا عايزه)

س/لماذا دخلت عالم التدوين؟

ج/ علشان أعبر عن أفكارى و عمّا يدور بخاطرى وأتمنى إنى أقدر أفيد من خلاله حد و أؤثر فيه بشكل إيجابى، و اتعلم كمان من التعليقات و المشاركات و أتفاعل مع الآخرين

و أشكر صديقتى ( د.مروة السيد) -المُشارِكة فى العدد الثالث للمدونات المصرية للجيب (أنا أنثى)-و لها خبرة كبيرة عنى فى التدوين، فهى اللى شجعتنى و علمتنى إزاى أعمل مدونة، جزاك الله خيرا يا مروة

والحقيقة، الموضوع عموما له قصة غريـــبة جدااااااا هابقى أحكيها لكم فى يوم من الأيام إن شاء الله

س/أجمل كلمة قيلت فى مدونتك؟

ج/فيه كلام جميل كتير اتقال-و لله الحمد- فى المدونة و فى شخصى الضعيف ، و أتمنى ربنا يوفقنى و يجعلنى خيرا من ما يظنون و يغفر لى ما لا يعلمون

و كل كلمة اتقالت لى أثرت فى جدااااا ، و أقول للناس اللى تفاعلوا و اللى لسه هياتفاعلوا مع المدونة، جزاكم الله ألف خير

س/ أهمية التعليق بالنسبة لك؟

ج/ الترمومتر اللى بقيس بيه حاجات كتيـــــــر

س/أحسن بوست كتبته؟

ج/أى بوست يكون أثر و لو بنسبة بسيطة فى انسان واحد بيكون بوست حقق هدفه بالنسبة لى، و كل بوست عندى له مكانه خاصة

و بعدين ده همّ كلهم على بعض ستة و التاج السابع

!!!!!!!!!!!!!!!!!!!!!

س/أفضل بوست قرأته و أفضل مدونة؟

ج/ما شاء الله، ربنا يبارك ، الحاجات الكويسة كتييير جدا و صعب أختار حاجة واحدة، لأن كل حاجة لها طعمها

س/الانترنت بالنسبة لك إيه؟

ج/ العالم بين يديك :) ، بكل ما فيه من خير و شر، و علينا مسؤلية الاختيار

س/تمرر التاج لمين؟

ج/أمرره لــ روح طفلة و رهف قلبى (هربت قبل كده من التاج اللى فات)، و الحقيقة كل اللى أعرفهم عملوه قبل كده، إنما لو فيه حد لسه ما عملوش و أنا ما أخدتش بالى فياريت يتقبله منى

أشكركم على حسن قرائتكم (ما هو ماينفعش أقول استماعكم) و تحياتى لكم جميعا

أتوبيس الرحلة

2009-05-08T18:00:00.000-07:00

" يااااه ، معقولة اللى حصل ده كان من سنتين، ده زى ما يكون كان امبارح !!!!!"

كام مرة فكرت فى الفكرة ديه؟؟

فكرة إن حاجة تكون حصلت من فترة طويلة لكن تحس كأنها حصلت قريب؟؟.. و الغريب دلوقتى إن ساعات الإحساس يكون متناقض، يعنى تحس ان الحاجة كانها لسه حاصلة و فى نفس الوقت كأنها من مائة سنة

!!!!!!!!!!!!!!!!!!

اما بشوف إزاى الوقت بيجرى كده ، بفكر: " ياترى الواحد كان مبسوط ، فى قد إيه من الوقت ده؟؟؟ ، " يا ترى كان مستمتع بجد أيام المدرسة...بس لأ، أصل أيام المدرسة الواحد كان قلقان من الإمتحانات ، و الصحيان بدرى و كده يعنى، طب يمكن أيام الكلية؟...بس يععععنى كان فيه ضغط برضه من المذاكرة و الحاجات دى كلها،....... مع إن الأيام دى كلها لما الواحد يبصلها (دلوقتى، بعد ما خلصها) يقول:" يا سلاااااام، و الله كانت أيام جميلة"، طب لما هى كانت أيام جميلة ، ما استمتعناش بيها فى وقتها ليه؟؟ هى لازم الحاجات اللى حصلت لنا تخلص الأول و بعدين نستمتع بيها؟؟ ، عندى إحساس إن اللى بيعمل كده بيبقى بالظبط ،عامل زى اللى قدامه أكلة جميلة جدااااا، بس طول ما هو بياكل عمّال يعيّط و يبكى و يتحسر و يشتكى، و بعد يوم ،راح قاعد مع نفسه

يفتكر الأكلة ديه و يقول" يا سلاااااام، و الله كانت أكلة حلوة قوى

!!!!!!!!!!!!!!!!!!

طب و بعدين، هنفضل لغاية امتى نستمتع بحياتنا بأسلوب القصور الذاتى؟؟؟؟؟، صحيح إن فيه تعب و فيه معوقات، لكن، ما كل فترة فيها تعبها و أكيد برضه فيها متعتها، و لما تقعد تفكر فى كل فترة فى حياتك و تقيمها بشكل حيادى، أكيد هتلاقى كان فيها إيجابيات زى ما كان فيها معوقات، و الحقيقة فكرت كتير فى مثال ، يكون الناس فيه بتطبّق الاستمتاع باللحظة بشكل سليم و مهما كانت المعوقات، و المثال ده فى رأى هو .....أتوبيس الرحلة

إزاااااااى؟؟؟؟

الناس لما بتركب فى الأتوبيس، ما بيكونش ده هدفها أصلا ( لأن الهدف هو مكان الرحلة نفسها) فالأتوبيس بيكون الطريق إلى الهدف ده، و قد إيه الطريق ده بيكون فيه تعب و مجهود و مسافة طويلة و ضيق فى المكان ، و ممكن جدا يكون فى أشخاص غير مرغوب فيهم، ده غيرالمطبات اللى فى السكة واحتمال إن الأتوبيس يعطل فى أى لحظة، و لكن مع كللللل المعوقات دى، الناس بتلاقيهم بيتفننوا إزاى يستغلوا وقت الأتوبيس ده بشكل إيجابى، ممكن تلاقيهم بيعملوا مسابقات و جوايز و يضحكوا مع بعض و يهزروا و يبصوا من الشباك و يتأملوا فى الطبيعة، يعنى بجد بجد بيستمتعوا بوقتهم، لدرجة إن ناس كتير بتقول" ده الأتوبيس ده رحلة فى حد ذاته"، و ناس تانية تقول:
"ده الأتوبيس ده كان أجمل من الرحلة نفسها"

فلما تيجى تقيس الكلام ده على الحيـاة، هتلاقى إن كل واحد عنده هدف معين (مهما كان ،صغير أو كبير) فالهدف ده عامل زى جهة الرحلة بتاعة الأتوبيس، مش لازم تستنى لما توصل له الأول علشان تفرح و تستمتع، و كل المصاعب اللى فى الطريق و فى الأتوبيس، ما هى إلا صورة مصغرة من اللى بيحصل فى الحياة

و طالما أخدت بكل الأسباب كاملة، و ماشى فى طريقك للهدف، و كده أو كده انت عايش، يبقى خلاص، استمتع بوقتك، و اجعل ثقتك فى الله ،لإنه طالما انت ماشى فى الطريق لهدفك، يبقى بإذن الله هتوصل، و ربنا مش هيضيع عملك و تعبك

ده حتى فيه قصة كنت عرفتها عن لاعب تنس مشهور جدا ، و هو (أندريه أجاسى)،إنه بعد ما كان متفوق جدا جدا، جات له فتره فى حياته ،مستواه انحدر بشكل ملحوظ،
و لما استعان بمدرب تنمية بشرية علشان يساعده، المدرب ده عرّفه سبب هبوط مستواه
عارف قال له إيه؟؟؟

قال له" انت دلوقتى بتلعب و انت مركّز تفكيرك على المكسب و الخسارة......فخسرت، أما قبل كده ،فكنت بتلعب و انت مركّزتفكيرك على انك تستمتع باللعب....فكسبت"
ياااااه

يعنى الانسان لما بيستمتع باللى بيعمله، فمش بس هيستمتع بوقته و يكسب فرحته فى الحياه، لأ ده كمان قلقه و توتره هيقلّوا ،و هيكون أداؤه و تفكيره أفضل لأنه مركز فى إنه ياخد بالأسباب و يستمتع بها، مش مركز على النتيجة.................. (و ده بجد معنى التوكل)

فخسارة الوقت الكتير اللى ممكن يضيع من غير ما تستمتع به فى لحظتها و ماتستمتعش بيه غير لما تفتكره بعدها بسنة و اللا إتنين، ......و زى ما قدرت تفتكر الإيجابيات اللى كانت فى فترات حياتك قبل كده ،مرن عقلك و تفكيرك على إنك تفكّر فى إيجابيات اللحظة اللى انت عايشها دلوقتى، و تستمتع بها كمان،.............. و خللى بالك ، فيه جملتين أساسيتين عدّوا دلوقتى ،وهما

مرن عقلك و تفكيرك: فاحرص على تدريبه على فكرة (أتوبيس الرحلة)، بأنك تذكر نفسك من وقت لآخر بأنك تستمتع باللحظة

و الجملة التانية هى: اللحظة اللى انت عايشها دلوقتى، يعنى مش بقول اليوم بحاله و لا الشهر، لأ الثانية دي، يعنى و انت دلوقتى بتقرأ الكلام ده، فهو ده اللى بتعمله فى الثانية دى، فركز فى اللحظة دي ( اللى انت عايشها دلوقتى) و ركز انك تستمتع بها

و يبقى أنت بتاخد بالأسباب كاملة ، و بتستمتع بها كمان مهما كانت التحديات ، و بكده يبقى انت حجزت لنفسك مكان فى.......... أتوبيس الرحلة

أنت القلب الكبير

2009-04-29T11:40:00.000-07:00

من فترة كده،كنت عرفت حقيقة طبية لطيفة جدا، و بليغة جدا جدا جدا تخص القلب........والحقيقة الطبية دى فكرتنى بإن فيه قوانين أساسية ثابتة فى الكون، و لو تأملنا حوالينا شوية و بالذات فى الكائنات الأخرى، هنتعلم حاجات كثيرة قوى، و لو كنت مندهش من الكلام ده، تندهش من إيه؟؟ مش قابيل تعلم الدفن من الغراب؟ و دايما يقولوا إن مملكة النحل هى أفضل مثال على العمل الجماعى الناجح، ده حتى فى الصيدلة، أنا فاكرة كويس إن أستاذ عندنا فى الكلية فى مادة العقاقير كان بيقول أنهم اكتشفو فوائد طبية لنبات عروش الجزر لما لقوا إن الحمار فى الأوقات العادية مابياكولهوش بس لما تعب شوية -من نفسه كده- راح أكل من عروش الجزر و خف بعدها و بقى تمام، و لما خدوا بالهم من النبات ده و حللوه لقو فعلا إن الحمار كان عنده حق!!!!!!!!، آه و الله، و فى الهندسة كمان ، لما شركة بترول (أرامكو) كانت مش عارفة تشتغل فى صحراء المملكة العربية السعودية علشان العربات بتاعتها مش مصممة على إنها تمشى فى الصحراء، و كان المشروع مهدد بالفشل، لحد لما مهندس جات له فكرة التصميم المناسب للعربات دى علشان تقدر تمشى فى الرمال من غير ما تغرز، و التصميم المناسب ده توصل إليه لما قعد يدرس و يقلد الجمل،......سبحان الله

المهم، نرجع بقى للحقيقة الطبية اللطيفة و البليغة اللى عرفتها عن القلب و اللى لفت نظرى لها من حوالى سنتين هو( د.ميمت أوز) فى حلقة تليفيزيونية، والحقيقة الطبية دى هى إن: (أول ما يغذيه القلب هو نفسه،لكى يستطيع أن يضخ الدم إلى باقى الأعضاء،و إلا سيموت و يموت باقى الجسم معه)......، النظرية دى لما قالها د.أوز، ربطها بإن الإنسان برضه كده،لازم يهتم بنفسه علشان يقدر يهتم بالآخرين، و إلا هيتعب و الآخرين كمان هيتعبوا معاه، و ده بالظبط اللى كنت درسته مع د.إبراهيم الفقى لما كان بيشرح لنا أركان الاتزان السبعة للإنسان، و قال إن الركن الأول للاتزان هو الركن الإيمانى و التانى هو الصحى و التالت هو الشخصى و الرابع يبقى الإجتماعى، بالترتيب ده، يعنى اول تلات أركان للاتزان بيخصوا الإنسان نفسه قبل الناس ،علشان يقدربعد كده إنه يفيد الناس .إزاى الكلام ده؟؟ هوه مش كده يبقى أنانى؟؟؟

تعالو ناخد شوية أمثلة:لو قلنا مثلا إن فيه اتنين بيغرقوا لكن واحد فيهم بس هوه اللى بيعرف يعوم،مش المفروض إن الواحد ده يكون متزن هو الأول فى المياه علشان يقدر ينقذ الشخص التانى، لأنه لو ما حاولش إنه يستعيد توازنه هوه الأول ،وقال"أنا مش مهم"و حاول ينقذ التانى مع إنه هو مش متمالك نفسه كويس جوة المياه ، يبقى مش هيكون عنده القدرة إنه ينقذ التانى ،و بعد شوية ،مش هيبقى عنده القدرة إنه ينقذ نفسه و بالتالى هيغرقوا الاتنين

و إذا جينا مثلا نتكلم عن دكتور ،مش المفروض إن الدكتور ده يهتم بنفسه بإنه يذاكر هوه الأول و يحصل العلم قبل ما يروح يعالج الناس؟ لأنه لو ما اهتمش بنفسه و قال "أنا مش مهم" و قعد يعمل حاجات تانية فبعد كده مش هيعرف يعالج حد، أو هيعالج الناس غلط، و بالعكس هيبقى بيإذى الناس قبل ما يكون بيإذى نفسه،

و لو قلنا إن فيه أم قعدت تهمل فى صحتها علشان تعرف تاخد بالها من أولادها و قعدت تقول"أنا مش مهم"-و ده بيحصل كتير- طيب ما هى كده هتبقى مرهقة و مش بعيد تمرض و ساعتها أولادها هم أول ناس هيتأذوا، لأن مامتهم مش قادرة تاخد بالها منهم،ده غير طبعا إنهم هيتأذوا نفسيا لتعبها . ده غير كمان إن لما الأم و الأب كل واحد فيهم يقول :"أنا مش مهم، المهم الأولاد" فكده بيزرعوا فى أولادهم حاجة من الاتنين-و همه و حظهم بقى- يا إما الأولاد هيتعلموا إن (بابا و ماما مش مهم، إنما أنا مهم) و ده هيبان فى السلوكيات أكثر منه هيتقال بالكلام، و بكده يبقى الأولاد اتعلموا الأنانية، و الاحتمال التانى، هو إن الأولاد بيتأثروا و يقتدوا بمامتهم وباباهم، فهيقلدوهم ويبقى همه كمان جواهم مفهوم:"أنا مش مهم"،و يبقى الأولاد عندهم نفس المشكلة اللى بنتكلم عنها، يعنى فى الحالتين همه كده أضروا بأولادهم-بدون قصد- قبل ما يكونوا أضروا بنفسهم.

وإذا فى واحد متضايق و مستسلم لضيقه وبيبخل على نفسه بوقت يعمل فيه الحاجة اللى بيحبها اللى كانت فى يوم من الأيام بتحسن -إلى حد ما- حالته النفسية و استخسر فى نفسه ده و قال :"أنا مش مهم"، طب ما هو كده هينكد على اللى الناس اللى حواليه و اللى همه مهمين بالنسبة له سواءا مراته أو أولاده أو عيلته أوحتى أصحابه

لما تسرح بخيالك فى الكلام ده هتلاقى إن فى أمثله أكتر من كده بكتييير، و كلها بتعبر عن مفهوم:"أنا مش مهم" ،يعنى( ضعف تقدير ذاتى) و يعنى (قلة ثقة بالنفس) لأن الإنسان اللى مش قادر يقدَر نفسه هتبقى ثقته بنفسه ضعيفة و بالتالى مش هتبان امكانياته، اللى ممكن جدا إذا بانت تنفع ناس كتير،و اللى لو ما بانتش، يبقى كده بيظلم الناس بشكل غير مباشر (لأنه منعهم انتاجه)،قبل ما يكون بيظلم نفسه

يعنى فعلا أهه زى مثال القلب اللى قلنا عليه، لازم القلب يوصَل لنفسه هوه الدم الأول،علشان يقدر يضخه لباقى الجسم، فلو تخيلنا إن القلب قال: "أنا مش مهم " و المهم الجسم يتغذى، يبقى ساعتها القلب ده هيموت -لأن مش واصل له تغذية- و يموت معاه الجسم اللى هو كان تعبان عشانه، و لو تخيلنا إن القلب اتحول و بقى أنانى و قال أنا هاخد الدم كللله لى لوحدى و مش هسيب للجسم و لا نقطة، فالجسم هيموت و القلب مسييييييييره هيموت معاه ،ده إذا القلب ما انفجرش قبلها من الستة لتر دم اللى عايز ياخدهم كلهم لوحده و مايديش لحد ، و الانسان الأنانى برضه كده، لو فضل على أنانيته، هيتهيأ له فى الأول إنه بيإذى الناس بس، إنما فى الآخر، الأذى ده مسيييييييره هيعود عليه، و هيبقى أذى نفسه قبل ما يكون أذى أى حد تانى

يبقى ربنا عاطي لنا مثال حى للتوازن بين الاهتمام بنفسك و الاهتمام بالناس، و المثال ده موجود و بينبض جوه كل واحد فينا - يعنى مالكش حجة-و المثال ده لو كان بينطق، يبقى هيقولك إنه: شىء أساسى إنك تهتم بنفسك، وتثق فى نفسك، و تحب نفسك كمان، علشان تقدر إنك تهتم بالناس ،و تثق فى الناس، و تحب الناس، فلازم تعرف تسعد نفسك علشان تعرف تسعد غيرك، و ده بيبان قوى قوى بالذات فى الجواز، فالانسان اللى بيعرف يهتم بنفسه،....بيعرف بعد كده يهتم بشريك حياته، .....و بيعرف بعد كده يهتم بأسرته، أما بقى لو هوه حاسس بفكرة"أنه مش مهم" ، فيبقى ده معناه إن جزء أساسى من الأسرة معتقد فى نفسه أنه مش مهم، فهتتأثر الأسرة بحالها ،و هى كمان، شوية شوية هتكون مش مهمة

و بعدين لما كل واحد يقول انه مش مهم و أولاده يتعلموا إنهم يبقوا زيه و يبقوا مش مهمين ،و أولادهم همه كمان يبقى عندهم اعتقاد إنهم مش مهمين،.... طب ما كده يبقى معظم الناس مش مهمة و النتيجة الطبيعية ،إننا نبقى ضمن شعوب العالم مش مهمين

و لو كنت عايز مثال تانى ،تقدر تشوفه بعينيك، فتأمل جذور الشجرة ،و إزاى ربنا خلقها إنها لازم تهتم بأنها تثبت فى الأرض و تتغذى هى كويس الأول علشان تقدر تطلع أوراق و تنتج و تطلع ثمار سليمة و صحية يستفاد بها غيرها،.....و انت كمان، لازم تهتم بأنك ترسخ أقدامك الأول بطاعتك لربنا سبحانه و تعالى و بالاهتمام بصحتك و بالتعلم و باهتمامك بنفسيتك علشان تقدر تنتج و تفيد الناس ، و ساعتها الناس هى اللى هتحس بأهميتك بالنسبة لهم ، يمكن أكثر ما أنت حاسس بيها.

و افتكر انك أولا و أخيرا..إنســـــان، يعنى خليفة الله فى الأرض، و طالما ربنا أذن إنك تتولد و تيجى الدنيا، واختار لك إنك تكون إنســـان (مش أى كائن آخر)، يبقى أكيد إنت مهم، و دورك بقى أنك تؤمن بده علشان تقدر تفيد نفسك و تفيد غيرك كمان ، فخليك زى القلب السليم ما هو شغال -بس هتبقى قلب على كبير شوية- ،و بكده تبقى

أنت القلب الكبير

فكر فى التفكير،فكر..يفكر..تفكيرا

2009-04-26T21:53:00.000-07:00

هل عدى عليك وقت من الأوقات لقيت نفسك بتقول"أنا متضايق،بس مش عارف ليه"؟؟ أو زهقان أو فرحان أو قلقان...يعنى عدى عليك إحساس معين بس مش عارف سببه و مش عارف جه منين؟؟؟؟؟ ، و لو كان الاحساس ده سلبى-زى الضيق أو الزهق- بتحاول إنك تخلص منه، فتلاقى السؤال المنطقى اللى بيطرح نفسه: "طب هوه أنا متضايق ليه؟؟؟؟" ، الموضوع ده ممكن يبقى له أكثر من سبب، بس الغالب فى سبب أساسى جدااااااا.

بص بقى... وخذها قاعدة: "أى إحساس فى الدنيا بيكون نتيجة للإفكار" ، مش بتلاقى نفسك ممكن تكون قاعد لوحدك فى أمان الله و تفتكر أحداث اليوم و تقف عند حدث معين ضايقك جدا،فتلاقى نفسك اتضايقت و لما حد يجى ساعتها يكلمك تلاقى نفسك اتنرفزت عليه،أو رديت رد بايخ أو حتى بكيت (يعنى حسب طبيعة شخصيتك)، و لو قعدت مع نفسك برضه فى أمان الله ممكن تفتكر حاجة مبهجة أو موقف مضحك حصل و من غير ما تاخد بالك تلاقى نفسك بتبتسم أو حتى بتضحك بصوت عالى ؟؟ و مش بعيد كمان أكون دلوقتى فكرتك بموقف حصل و لقيت نفسك بتبتسم و انت بتقرا.....كلللل المواقف دى و غيرها كتير جدا بيوضح اللفة اللى بتحصل جوة الإنسان: إنه الأول بيفكر فى حاجة و الحاجة الأولانية تفكره بالحاجة التانية، و التانية تفكره بالتالتة،...و هكذا، و الأفكار دى هتوصل له إحساس معين هيشعر بيه، و اللى على أساسه هيتصرف و ينتج السلوك.

كلام جميل....يبقى لما الإنسان بيشعر بإى إحساس، أكيد قبلها كان فيه أفكار فكر فيها و هى اللى وصلته للإحساس ده، يبقى لو عايزين نعرف إجابة السؤال " أنا متضايق ليه؟" يبقى لازم نسأل الأول:"أنا فكرت فى إيه خلانى أتضايق كده؟؟" و ابدأ فكر: إيه الأفكار اللى وصلتك لكده؟؟، و لو عايز كمان ،اكتب كل الأفكار اللى وصلتك للإحساس ده فى ورقة ،حتى لو بان فى البداية إن كل الأفكار دى مالهومش علاقة ببعض، لأن غالبا هيكون لهم علاقة ، و مهم قوى قوى انك تكون صادق مع نفسك و ما تضحكش على نفسك و اكتب بجد كلللللل الحاجات اللى فكرت فيها ، ده هيساعدك إنك تعرف إيه اللى ضايقك بالظبط، و زى ما بيقولو :"إدراك المشكلة يمثل 50% من حلها" لأنك لا يمكن تقدر تحل مشكلة و انت مش عارف هى إيه أصلا...، و بعد ما تكتبهم، امسك فكرة فكرة و فكر فى حل لكل واحدة فيهم لوحدها ،أو حتى طمن نفسك ، و اللى يساعدك على كده ،حيلة لذيذة قوى، و هى إنك تبص للمشكلة و تعتبر إنها مشكلة واحد تانى خاااااالص، صدقنى هتلاقى الحكمة كلها و العقل طلع، لإن لما حد بيلجأ لنا فى مشكلة مش بتاعتنا ،بنبص على المشكلة من برة و بتخرج من جوانا الذات الحكيمة، اللى ممكن جدا تكون ما بتطلعش لما احنا نفسنا نكون واقعين فى مشكلة

و زى ما بحب دايما إنى أشبهها للمتدربين : إن المشكلة بتبقى عاملة زى المتاهة، لو انت بتبص من جواها هتلاقى حيطة سد فى كل الاتجاهات، و لكن لو بصيت عليها من فوق (زى ألعاب المتاهة اللى فى كتب الاطفال، انك توصل الأرنب للجزرة اللى جوة المتاهة من خلال الفتحات الصغيرة اللى فى الحيطان) بتلاقى الموضوع أسهل بكتيييير و بتعرف الطريق جوة المتاهة بسهولة ، أهى أى مشكلة بتواجه البنى آدم بتبقى كده برضه، و أنسب طريقة علشان تطلع نفسك برة المشكلة هى إنك تتخيلها بتاعة حد تانى ، و ابدأ اكتب الحل جنب كل فكرة جات لك ،و لو عايز تحبكها قوى ،تصور و فكر فى نفسك إن الورقة اللى انت كتبتها دى بتاعة واحد أمله فيك كبييييرقوى (بعد الأمل فى ربنا سبحانه و تعالى) و إنه متعشم فيك جداااا و إن محدش هيعرف يحل له المشكلة دى غيرك.

و بكده،يبقى انت فكرت فى الأفكار اللى جات لك، و فكرت فى فرزها ، و فكرت إنها بتاعة واحد تانى، و فكرت كمان فى الحل....فكر ...يفكر...تفكيرا

مش كان زمانى خلصت؟؟

2009-04-25T16:35:00.000-07:00

كنت من فترة،قريت عنوان فى جريدة الأهرام عن سيدة أسترالية خدت الماجيستير أخيرا و هى عندها 94 سنة، أيوة ..دى مش غلطة مطبعية..همه 94، و لما قرأت المقالة لقيتها كانت سابت الدراسة و هى عندها 12 سنة، و بعد 60 سنة رجعت للدراسة تانى!!!! يعنى ده معناه أنها و هى عندها 72 سنة كانت بتقول للى يعرفوها "أنا هارجع أكمل دراستى" و تخيلتها كدة انها ممكن تكون قالت لهم "عايزة أحقق ذاتى " أو "عايزة أبنى مستقبلى" ؟

بيتهيأ لى إن أى واحد قدام خبر زى ده هيعمل حاجة من التلاتة: يا إما

هيتتريق ويقول "ناس رايقة و فاضية"...و يرمى الجرنال....أو

هيستغرب شوية فى الأول و بعد كده ينسى الموضوع من أساسه ...أو

هيقف شوية و يفكر -فى السيدة دى إللى عشان خاطر تكمل للماجيستير كان لسة قدامها 22 سنة و هى عندها 72 سنة أصلا!!!! ...يعنى مشوار طويييييل قوى- و هيسأل نفسه: "يا ترى لو كنت مكانها كنت عملت كده؟؟؟" ....طب بلااااش نقول إن

عندك 72 سنة و راجع للمدرسة تانى، لكن لما بتتعرض لموقف من نوعية أنه نفسك مثلا تاخد كورس معين مهم إنك تدرسه، او نفسك تعمل حاجات معينة عشان تحسن بيها صحتك... أو نفسك تعمل حاجة معينة مهمة بالنسبة لك بس أى حاجة من دول هتاخد لها سنة-مثلا يعنى-علشان تتعمل، يا ترى بتبدأ فيها فعلا و اللا بيكون رد الفعل التلقائى هو:"ياااه...سنة....هو أنا لسة هاستنى سنة ؟؟؟؟" و بتصرف نظر عن الموضوع من أساسه ، حتى لو كان مهم بالنسبة لك وكمان تقدر إنك تعمله؟؟

و قيس على كده بقه قرارات كثيرة فى حياة البنى آدم، يعنى لو مسكنا المثال إن واحد قدامه سنة علشان يوصل للحاجة اللى هو عايزها بس هو شاف إن ده وقت طويل فمبدأش أصلا

!!!

طيب ،نفكر فيها واحدة واحدة.. ما هو -لو ربنا كتب له عمر- كده كده هتعدى عليه سنة، طيب ما تعدى عليه و هو بيعمل الحاجة اللى هو عايزها و اللى على بال ما تخلص السنة هيكون خلصها، بدل ما تعدى عليه (هيه هيه سنة برضه) و هو لسة محلك سر؟؟؟؟

يعنى لو قلنا إن عنده دلوقتى 30 سنة، فبعد سنة لما يكون أنجز اللى عايز يعمله هيكون بقى عنده 31 ، و لو ما أنجزش و معملش اللى عايز يعمله هيكون بقى عنده.............برضه همه همه الــ 31 ، يعنى مش هيتحولو و يبقو 29مثلا

!!!!!!!!!!!!!!!!!!!!

والحقيقة لما بتخيل الشخص ده فى شكل مشاهد متتابعة، بتخيله كده

كلاكيت أول مرة

"هو أنا لسه هاستنى سنة؟؟؟؟....و على إيه..بلاش أحسن"

و بعد سنة.....كلاكيت تانى مرة

"مش كان زمانى خلصت؟؟؟؟...إيييه(بتنهيدة متحسرة)..... ياللا بقه أهو اللى حصل"

و بعد سنة أخرى....كلاكيت تالت مرة

مش كان زمانى خلصت مرتين دلوقتى؟؟؟..إييه (بنفس التنهيدة المتحسرة إياها)...ياللا بقه أهو اللى حصل

فإذا كنت عايز تبدأ فى حاجة و فى إمكانك إنك تبدأ فيها،إبدأ فورا بعد ما تدرس الموضوع و تنظم وقتك و تستخير ربنا سبحانه و تعالى ،......و تلغى تماما الجملة اللى بتتكرر كل شوية

(مش كان زمانى خلصت؟؟؟؟)

علشان و الوقت بيمر ماتبقاش بس بتكبر فى عمرك، تبقى كمان بتكبر فى إنجازات حياتك

و كده المشهد اللى جاى هيكون

و بعد سنة كمان...كلاكيت رابع مرة

"أنا أخيرا أنجزت، و خلاص خلصت"

الكراسى الموسيقية

2009-04-23T01:32:00.000-07:00

"نجاح الآخرين هو فشلى، و لابد من أن يفشل الآخرون، لكى أنجح أنا"

مش عارفة ليه المفهوم ده متأصل و مترسخ و متشعب و متــ....حاجات كثيرة قوى فى وجدان الكثير من الناس، يعنى لما (س) يشوف أن (ص) عمل حاجة حلوة أو حصلت له حاجة كويسة أو حتى مناسبة سعيدة ،أو يسمع عنه أنه حقق نجاح كبير -أو حتى صغير- فى حاجة معينة.....ينزل عليه الخبر كالصاعقة وفجأه يسمع فى ودانه حاجة كده زى صدى الصوت بتقول كلام من نوعية

فاشل ...فاشل...فااااااشل

أو يمكن يكون الصوت مختلف شوية، ويكون من نوعية

تعيس ...تعيس...تعيييييس

و ياه بقى لو كان من نوعية

حظوظ.....حظوظ.....حظووووووظ

و يا سلام ...يا سلام بقى لو همه الإثنين بيشتغلوا فى نفس المجال، تبقى كارررررثة و مصيييبة ، ويبدأ (س) يدور و يدعبس و يد.....حاجات كثيرة قوى برضه علشان يلاقى أى عيب فى اللى عمله (ص)، أو يبدأ يقلل منه و طبعا غنى عن الذكر أنه فى أغلب الأحوال لو (س) ده ربنا كرمه و نجح فى حاجة ، (ص) هيعمل المثل،.. ما القلوب عند بعضها!!!!!، (طبعا إلا من رحم ربى) قعدت أفكر فى السبب فى المفهوم العجيب ده،.......... يمكن علشان منذ الطفولة لما بيجوا يشجعوا الطفل علشان يذاكر (أو حتى علشان يعمل أى حاجة) بيقولو له "ذاكر علشان ما تبقاش أقل من فلان ؟ و عشان فلان مايجبش درجات أكثر منك و يبقى شكلك وحش"؟؟

يعنى تشجيعهم له مش يذاكر علشان يتعلم و اللا حتى علشان يجيب درجات عالية،لاااااااااااا.... المهم فى الموضوع أن درجاته تكون أعلى من درجات زمايله، و بالتالى كل ما زمايله يفشلو ,ده معناه إن فرصته أحسن للنجاح.

آآه، يبقى الموضوع بقى ما بقاش بينه و بين العلم و الكتاب ، لأ... ده كده بقت مسألة شخصية، بينه و بين الأعداء( ما هم بقو أعداء خلاص) فكل ما هينجحوا هيكون ده فشل ليه و برضه العكس صحيح، يعنى بطريقة التفكير دى ،لما واحد يطلع الأول بمجموع 60% (علشان التلامذة اللى فى فصله ما بيذاكروش)، هيبقى أحسن من واحد جايب 95% بس طالع الحداشر على الفصل (علشان الفصل اللى هو فيه كله تلامذة شاطرين).

يبقى بدل ما كل واحد فيهم يركز على العلم، هيركز على إزاى يخللى زميله يفشل، و لو اطمن إن زميله مش بيجتهد ، هيقلل من مذاكرته ...ما هو يتعب نفسه ليه؟؟؟؟ العلم مش فارق معاه، المهم الترتيب.

ولو واحد بقى من الناس اللى ما بيحبوش المذاكرة و مفيش بينهم و بينها عمار ، هيتضايق من اللى بيذاكروا جدا و يحس إن هم سبب تعاسته ، لأن دول هم السبب فى إن شكله بايخ ،

لأن لو ما كانوش شاطرين كان زمانه طالع الأول بمجموع 49,99% قد الدنيا ، فهيركززززززز طاقته كلها فى الحقد والتفكير السلبى ، بدل ما يركزها على نفسه و يشوف إزاى يحسن و يطور من نفسه و يكون متميز هو كمان، و ده طبيعى لأن

الإحساس السلبى بيوقف التفكير الإيجابى

و دى كلها صورة مصغرة من اللى بيحصل فى الحياة عموما من الكبار قبل الصغيرين،

-الظاهر الحياة هتقلب لفصل كبير بعد ما كانت مسرح كبير-

طب و بعديييين؟؟؟؟؟؟؟؟

فبعد التفكير و الفحص، توصلت إلى إن النجاح فى أى مجال فى الحياة بيتبصله على إنه لعبة الكراسى الموسيقية، يعنى لو احنا 6 يبقى مافيش غير 5 كراسى و لو كنا 5 يبقى بقدرة قادر الكراسى بقو 4 بس ، يعنى لو عملنا إييه بالذى لاااااازم و أكييييد هيكون فى حد مالوش مكان و كل واحد خايف ليكون الحد ده، علشان كده بيزق و يوقع غيره على الأرض علشان خاطر يقدر يلاقى كرسى يقعد عليه أوعلى الأقل علشان مايبقاش شكله وحش إذا هو اللى وقع-،.............. إنما لأ و ألف لأ

و أنا على يقين أن"النجاح و أى حاجة حلوة فى الحياة ليست كراسى موسيقية"، و لما بنقول " مش ممكن كلنا نطلع الأول" فى رأى إن الجملة دى مش كاملة وعلشان تبقى كاملة يبقى المفروض تتقال

"مش ممكن كلنا نطلع الأول فى نفس الوقت و فى نفس المجال و بنفس المكانة و بنفس البصمة"

و ركزززززززز قوى على كلمة نفس البصمة دى، لأن ده معناه إن ممكن قوى كلنا نكون أوائل ،كل واحد ببصمته و سمته و أسلوبه و تميزه من غير ما يحتاج أنه يشغل نفسه بإزاى يهد الآخر أو يحل محله و الدليل على كده إن فى كل المجالات هتلاقى ناس ناجحة كثير وناس بيشتغلوا فى نفس المجال و كل واحد فيهم له مميزاته الخاصة اللى بتختلف عن الآخر و متقدرش تحط واحد منهم مكان الثانى أو تقول إن ده يحل محله، لأن كل ناجح حط البصمة بتاعته هو بس اللى محدش يقدر يكررها، و لو حد حاول يقلده هيكون نسخة،و مهما نجح فى تقليده، أعلى حاجة هيوصل لها ،أنه هيكون نسخة كويسة

إنما الشخص الآخر هيفضل الأصل لأن بصمته ماحدش هيقدر يحطها غيره،.... فمترضاش لنفسك إنك تكون مجرد نسخة ، إنما اعمل لنفسك مكانك الخاص بك و اطمئن إن لك رزقك اللى متحدد لك و ماحدش هياخده غيرك ، و أى زيادة فى رزق الآخرين مش معناه نقص فى رزقك انت

فـ.... لا تصارع الآخرين على أماكنهم و لكن اصنع لنفسك مكانا بجوارهم

وخليك أصل جديد ..أصل لنفسك و كل أصل بيجيب كرسيه معاه من غير ما يحتاج أنه يزق حد علشان يقعد

بسم الله ، نفتتح المدونة

2009-04-22T20:32:00.000-07:00

بسم الله الرحمن الرحيم

السلام عليكم و رحمة الله و بركاته

أهلا و سهلا بك فى مدونتى المتواضعة اللى ربنا هدانى لأنى أعملها بعد وقت من التفكير،.... و بما إن ده أول بوست لى فأحب أوضح حاجة أساسية، وهى: إيه ده؟؟ ايه المدونة دى؟ و إيه الاسم العجيب ده ( ده لو كنت شايفه عجيب)؟
تأثير الفراشة ده اسم نظرية كده بتقول:"إن تحرك اجنحة فراشة فى البرازيل، ممكن يؤدى لإعصار فى أميركا"!!!! أييييييوه...ده بجد ، النظرية فعلا بتقول كده ،إزاى الكلام ده؟
بقى العالم اللى قال كده كان اسمه (إدوارد لورينز) وبيشتغل فى الأرصاد الجوية و توقعات المناخ ،و فى عمله ، أثناء ما كان بيدخل البيانات فى الكمبيوتر راح مدخل بيان

بالرقم 0,506 بدل ما يدخل الرقم الأصلى اللى هوه 0,506127 يعنى من باب الاختصار و حس إنها مش هتفرق قوى يعنى ، و هنا كانت المفاجأة...... و اندهش العالم بأن النتائج لتوقعات المناخ هتطلع مختلفة تمااااااما ، و كل ده بسبب رقم بسيط جدا يمثل 127 على مليون، يعنى لو اختلاف بسييييط جدا حصل فى الجو( و الاختلاف ده ممكن جدا اللى يسببه هو حركة من جناح فراشة) يبقى هيؤدى فى النهاية لاختلاف كبيير جدا فى النتائج ينتج عنه تأخير أو تعجيل حدوث إعصار أو منع حدوثه أو حتى التحفيز على حدوث الإعصار!!!!!!! ،سبحان الله..فعلا كل شىء بقدر

فلما نفكر فيها كده هنلاقى إن ده معناه إن أصغر الأسباب ممكن تؤدى لأكبر النتائج، و ده مش بس فى المناخ، لأ ....لما تبص كده شوية فى حياتك و تتأمل فيها حبتين و ترجع بالذاكرة ، ممكن تلاقى حاجات مهمة و جامدة جدا حصلت فى حياتك كان سببها حاجة بسيطة و صغيرة جدا جدا جدا و ممكن تكون الحاجة الصغيرة دى مجرد كلمة سمعتها أو قرأتها (و طبعا كله بترتيب من ربنا سبحانه و تعالى، هيه بس أسباب) فمن أجل ذلك ومن موقعى هذا فكرت انه : ما يمكن كلمة تتكتب هنا تعمل تأثير في حد كده زى تأثير الفراشة؟ أوممكن حد يعلق و يقول حاجة تؤثر فىَ زى تأثير الفراشة؟؟ و الله....ليه لأ؟؟، يعنى هى الفراشة تكون إيجابية و احنا لأ؟؟؟؟
بيتهيألى كده إن الصورة وضحت و الرؤية بانت ،.......
فاضل إيه؟
فاضل حاجة كده ربنا ألهمنى بيها من كتر ما الفكرة سيطرت على دماغى و شغلت أفكارى
ألا و هى:

قالو الناس، فراشة إيه.......اللى هتيجى فى يوم و تأثر
جالهم عالم فكره اتغير.......قال لك لأه أنا اللى هفسر
دى لو بجناحها ضربت نسمة......تجيب إعصار يشيل و يكسر
فمهما صغرت لها تأثيرها........اللى يوصل لحاجات أكتر
يعنى الكلمة الصادقة مسيرها.......تيجى فى يوم تنفع و تكبر
يبقى خلاص..نتكلم..نكتب ......... قبل ما نيجى فى يوم نتحسر